Mei Pifine pafoo fei Manulelele
17
Hemea ei oloromea aloꞌalo, ei rona paꞌi ei olorompalo lopi namii ware aꞌau ba, “Nomai, a famaꞌaio fei lagii mei paꞌaa pifinee tala, mei fi guta pafoo watauda ranu. 2 Ei haparaa feni malagufu, rona fiharoharoipaꞌai aꞌana ma ei ramaꞌaa malagufu, rona poapoai aꞌa fei wine wagii ei fiharoharoipaꞌaiana.” 3 Aꞌa fei Spiriti mei aloꞌalo na noduginaa yau fawelei lomi haihai o guana. Ma yei una fanunupaꞌaa hemea pifine fi guta pafoo hefaa roa manulelele, fei na pepesu ununa aꞌa ei hara na warefafeloaa mei Haidaa ma na paꞌi olorompalo taba ma hefua wadu wagina. 4 Pomaa susuu mei pifine, marawi ma roa ma na agime fininaa gold, ei mau rawani mugoo ma ei pearl. Ina panarofaa hepalo bara, paꞌafina gold, na mere aꞌa ei hafeloꞌa manumanu mawe ei loloaa ei fiharoharoiana. 5 Pafoo rawana na paꞌi fei warea fei:
MANUMANU OPAꞌAIA FEI BAUA GUFU BABYLON MEI INAA EI PIFINEE TALA MAWE EI HAFELOꞌAA FENI ANO.
6 Una fanunupaꞌia ba mei pifine mei, na hunu poapoai aꞌa ei namoo ei apunaiaa mei Haidaa, ei namoo ei rona harenaa fei uꞌugaa Jesus.
Ei uꞌa fanunuia, namina baꞌarofo. 7 Mei aloꞌalo na warenaa aꞌau ba, “Tani omina baꞌarofo? Awe warefaꞌaio fei manumanu opaꞌaia aꞌa mei pifine ma fei manulelele, fei ina hugi pafona, fei na paꞌi olorompalo taba ma hefua wadu. 8 Fei manulelele ona fanunuia, mina na paꞌi, maꞌuaa lomi eni ma nefarani iwe walaꞌamai aꞌa fei walaloa lomi iaꞌiana ma tonaa fei arena. Ei ramaꞌaa fei malagufu, ei lomi na paꞌi haraa roꞌou laloo fei buꞌuu harenua wagii fei mamaraiamii feni ano, roꞌaa baꞌarofo ena rona fanunupaꞌaa fei manulelele, uaa mina na paꞌi, maꞌuaa lomi eni ma iwe nomai nefarani.
9 “Wagii fei, nei bauanai apaꞌamu. Ei olorompalo taba ei, olorompalo maugeni, ei na guta pafoo roꞌou mei pifine. 10 Ana haduoo ei oloromea hapara. Haipani na pasi, hemea fi guta ma hemeadiai ataa nomai; maꞌuaa, ena na nomai, ineidoꞌo guta maꞌida. 11 Fei manulelele, fei nadoꞌo paꞌi mina maꞌuaa lomi eni, hia mei fafainaroaa hapara. Hia maroaa ei oloromea ma ipowe dinaa pedupeduna eni.
12 “Ena fanunuamu hefua wadu, roꞌou ei hefua hapara, ei ana rotawe tonaa haparaiaa roꞌou, maꞌuaa laloo heai hour ua, roꞌaa to forafora aleꞌei hapara fipui aꞌa fei manulelele. 13 Hepalo ua naranaraa roꞌou ma roꞌaa fanaa ei faufau ma foraforaa roꞌou aꞌa fei manulelele. 14 Roꞌaa fifoꞌaifipui aꞌa fei Naꞌuu Sipsipi, maꞌuaa, fei Naꞌuu Sipsipi, i muainaa roꞌou, uaa hia mei Fasuu minaa ei fasu ma Haparaa minaa ei hapara—ma roꞌaa oafipui aꞌana ei lalaꞌana, rafeiana mawe ei nenerana, ei rona oafagugu.”
15 Ma mei aloꞌalo na warenaa aꞌau ba, “Ei fanunuamu ranu, ei na guta pafona mei pifinee tala, haduoo ei ramaꞌa, gupuu ramaꞌa, baua gufu mawe ramaꞌa uꞌugai wareagufu. 16 Fei fanunuamu fei manulelele ma ei hefua wadu, roꞌaa fabidinaa unuu roꞌou mei pifinee tala. Roꞌaa fagianainia ma faꞌalawataia ma diꞌininia; roꞌawe hanaiaa pigiona ma faguꞌanaa hia hafi. 17 Uaa mei Haidaa na fafaiaa naranaraa roꞌou ba nei neneraa fei nunumiana wagii fei ugaiana ba i fanaa fei manulelele fei faufau ma foraforaa roꞌou ba nei haparai nopaꞌaloo fei ba nawe nomai ei wareaa mei Haidaa. 18 Mei pifine ona fanunuia, haduoo fei baua gufu, fei na famamoaa ei haparaa feni ano.”