Ei Olorompalo Lopii fei Sibaa mei Haidaa
16
Ma una guainaa hepalo baua lao noramiana wagii fei humuu mei Haidaa ma na warenaa aꞌa ei oloromea aloꞌalo ba, “I pafoo fei malagufu, wi ipiaa ei olorompalo lopi, ei na paꞌi fei sibaa mei Haidaa lalona.”2 Mei rawarawaa aloꞌalo naree ipiaa fei lopina i pafoo fei malagufu ma aꞌa ei rona paꞌi fei lalaa fei manulelele ma losuinaa fei haduona, rona tonaa ei baua loralora ma namina fiꞌifafelo.
3 Mei fahelaguiaa aloꞌalo na ipiaa fei lopina pafoo agi ma na filoginaa namo fei agi aleꞌei namoo maꞌea ma minaa ei manumanu laloo agi na maꞌe.
4 Mei faꞌoꞌoduiaa aloꞌalo na ipiaa fei lopina i pafoo ei bauanai ma pusuꞌo ranu ma na filoginaa raraa. 5 I dii, una guainaa mei aloꞌalo, mei omaꞌaa ei ranu na ware,
“Na wanewane fei dududuamu,
yoi, mena oifi oa eni, mena ona oa mina mina, mena Apunaia,
ma na wanewane fei;
6 uaa rona fawiginaa namoo ei mamamaꞌa mawe ei apunaiamu,
ma ona fani numaa roꞌou raraa aleꞌei lagii roꞌou.”
7 Ma una guainaa fei tawahafi na apunai na ware:
“Hiꞌi, mena Fasu, mena Faufau Haidaa,
na wanewane ma faꞌuai fei dududuamu.”
8 Mei fagunaroaa aloꞌalo na ipiaa fei lopina i pafoo fei halo ma fei halo na tonaa fei faufau ba i faloranaa ei ramaꞌa fei hafi. 9 Ronamina rora aꞌa fei babaiaa fei ma rona umuaa fei haraa mei Haidaa, mei na omaꞌaa ei mau hafeloꞌa funua, maꞌuaa, lomi ronaꞌu filoginaa naranaraa roꞌou ma fani udugia aꞌana.
10 Mei fahaipaniaa aloꞌalo na ipiaa fei lopina i pafoo fei gutanaa fei manulelele, fei gutanaa hapara ma fei haparaiana nawemina roroma ua. Ronamina taduaa rawerawee roꞌou ei ramaꞌa aꞌa fei fiꞌia 11 ma rona umuaa mei Haidaniaa fei gufu pafea, uaa ei fiꞌia ma loraloraa roꞌou, maꞌuaa lomi ronaꞌu filoginaa naranaraa roꞌou wagii ei bigiꞌaa roꞌou.
12 Mei faꞌoloroaa aloꞌalo na ipiaa fei lopina i pafoo fei Baua Ranu Euphrates ma fei ranuna na nunu ba ei hapara noramiaa roꞌou anaa halo ronei paꞌi talaa roꞌou. 13 Ma una fanunupaꞌaa odumanuei hafeloꞌaa spiriti, maumau roꞌou aleꞌei mudau; rona walaꞌamai poaa fei dragon, poaa fei manulelele ma poaa mei sifisifi mamamaꞌa. 14 Roꞌou spiritii pigea ma rona bigiꞌaa ei hilalaa foigia ma aununaa aꞌa ei haparaa minaa feni ano ma figupuinaa roꞌou ba ronei foꞌai wagii fei baua arewaa mei Faufau Haidaa.
15 “Fanunu, una nomai aleꞌei hemea fafanao! Na paꞌi hawegiana mei i werawera ma na paꞌi susuna ba lomi i alawata ma mamafa.”
16 Ma rona figupuinaa ei hapara fawelei rona roroinia Armageddon aꞌa warea Aramea.
17 Mei faꞌoloromeaa aloꞌalo na ipiaa fei lopina haroo pafea ma hepalo baua lao noranamai laloo fei humuu mei Haidaa wagii fei gutanaa hapara na ware ba, “Ina haꞌiai!” 18 Ma na paꞌi aꞌegimeꞌaiaa fei usida, na oꞌonu fei hugugu, na pararai fei parara ma namina bauanai fei rereaa fei malagufu. Lomi na paꞌi rereaa feni malagufu aleꞌei mina nopaꞌamii fei, namina ratadiai fei rererea fei. 19 Fei baua gufu na baꞌatawaranaa odumanu ma ei pusuꞌo gufu laloo ei baua gufu rona pasi. Mei Haidaa na nonominaa fei Baua Gufu Babylon, fei Bauana ma na fania fei bara, fei na mere aꞌa fei wine fei baua sibana. 20 Minaa ei gufu i pafoo agi rona paꞌai ua ma ei maugeni ana lomi roꞌou yei. 21 I haroo pafea na ropagio i pafoo ei ramaꞌa ei baua mugoo awataa roꞌou aleꞌei 45 kilogram. Ma rona umuaa mei Haidaa wagii fei, uaa fei hafeloꞌa manumanu fei, namina rata.