Oloromeai Aloꞌalo aꞌa ei Olorompaloei Mau Funua Hafeloꞌa
15
I pafea una fanunupaꞌaa hepalodiai paꞌaa baua hilala: oloromea aloꞌalo aꞌa ei olorompalo aꞌapoo funua hafelo. Nenee eꞌei, ipowe pedu fei sibaa mei Haidaa. 2 Ma una fanunupaꞌaa fei aleꞌei agi ba ina malewa, fihafuinaa hafi ma ei rona muainaa fei manulelele ma fei haduona ma fei wawarei harana, rona ufalarai yei piye. Mei Haidaa na fanaa roꞌou ei harp 3 ma rona laugaa fei laugaa Moses, mei nafii mei Haidaa ma fei laugaa fei Naꞌuu Sipsipi:“Na bauana ma na rawani ei bigiꞌamu mena Fasu,
mena Faufau Haidaa.
Ei maumaumu na wanewane ma faꞌuai,
mena Hapara aꞌa minaa ei arewaa.
4 Hini ba lomi i maꞌauio,
ma lomi i fani hawera aꞌa fei haramu, mena Fasu?
Uaa ana yoi ua, mena na apunai.
Minaa ei baua gufu
rowemii losui i maꞌamu,
uaa ei wanewanea bigiꞌamu nawe arewa.”
5 Nenee fei una aranaa pafea ma na gigi fei humuu mei Haidaa poroporo, fei na paꞌi fei Uꞌuga lalona. 6 Aꞌa fei humuu mei Haidaa, rona walaꞌamai ei oloromea aloꞌalo fininaa olorompaloei mau funua hafelo. Ei susuu roꞌou namina malewa ua, namina agime ma na paꞌi adii niniwai roꞌou, paꞌafina gold. 7 Ma hepalo aꞌa obaoei manumanu, ei rona fawewenai, na fanaa ei oloromea aloꞌalo ei olorompalo lopi paꞌafina gold, ei na pepesu aꞌa fei sibaa mei Haidaa, mei fi oalao ranimai ranimai. 8 Ma fei humuu mei Haidaa na pepesu aꞌa fei hagu wagii fei hawerana ma fei faufauna ma lomi hemea ba i waduꞌainaa fei humuu mei Haidaa hawina ba ei olorompaloei mau funua hafelo i aꞌa ei oloromea aloꞌalo na pedu.