Fei Naꞌuu Sipsipi ma ei 144,000
14
Ma una fanunu ma ina u i maꞌau fei Naꞌuu Sipsipi, na u pafoo fei Maugeni Zion ma i aꞌana 144,000, ei rona paꞌi fei harana ma fei haraa mei Amana pafoo rawaa roꞌou. 2 Ma una guainaa hepalo manumanu na norai pafea aleꞌei memeꞌii unuu mamaua ma hefaa baua parara. Fei guaiau aleꞌei ei inaiaa ei harp. 3 Ma rona laugaa hepalo manufau lauga i maꞌaa fei gutanaa hapara, ei gunaroa manumanu, ei rona fawewenai mawe ei forafora. Lomi nemea na ono fei lauga, uniaa ei 144,000, ei ponohadiweꞌia aꞌa feni malagufu. 4 Eꞌei lomi rona faꞌidoꞌidonaa unuu roꞌou aꞌa ei pifine, uaa rona fanimaꞌaiaa ana roꞌou ma fafaꞌarai ma i dinaia fei Naꞌuu Sipsipi, rona nenegia. Ina ponoꞌaa roꞌou dupuaa ramaꞌa ba roꞌou aleꞌei rawarawa fana aꞌa mei Haidaa mawe fei Naꞌuu Sipsipi. 5 Lomi hepalo sifiꞌa i leleꞌamai poaa roꞌou; lomi hepalo tataa roꞌou.Oꞌoduei Aloꞌalo
6 Ma una fanunupaꞌaa hemeadiai aloꞌalo na fidufidu haroo pafea ma i aꞌana fei rawaniꞌa warea, fei i udelao ba i uꞌufanaa ei rona guta i malagufu—aꞌa minaa ei gufu, ei pai, ei ramaꞌa uꞌugai wareagufu ma ei mau ramaꞌa. 7 Ma ina warefabauana, “Maꞌauaa mei Haidaa ma fani hawera aꞌana, uaa na nodigimai fei au dududuana. Losuinaa mei na famamaraa fei pumanugawe, fei malagufu, fei agi ma minaa ei wediwedii ranu.”
8 Mei fahelaguiaa aloꞌalo na neneramai ma ware, “Na pasi! Na pasi fei Baua Gufu Babylon, fei na fahunumaa minaa ei gufu aꞌa fei numana wine, fei i fapoapoainaa roꞌou aꞌa ei fiharoharoipaꞌaiana.”
9 Ma mei faꞌoꞌoduiaa aloꞌalo na neneramai ma warefabauana, “Hini i losuinaa fei manulelele ma fei haduona ma tonaa fei tamatamana pafoo rawana o panina, 10 hia ana i hunumaa fei wine, fei sibaa mei Haidaa, fei namina rata, fei na ipia laloo fei baraa fei sibana. Mei ramaꞌa mei i fagiana aꞌa fei babaiaa mugoo na guꞌaguꞌa inamoaa ei apunai aloꞌalo mawe fei Naꞌuu Sipsipi. 11 Ma fei haguu fei fagianaa roꞌou i asiꞌanaa pafea ranimai ranimai. Lomi hepalo arewaa o poi gutafawenaia aꞌa ei rona losuinaa fei manulelele mawe fei haduona, o ei rona tonaa fei lalaa fei harana.” 12 Sifeni hepalo manumanu ba ronei apitai wagina, ei apunaia, ei rona neneraa ei wareaa mei Haidaa ma oafagugufipui aꞌa Jesus.
13 Ma una guainaa hepalo lao na norai pafea ma na ware, “Neꞌi: Na paꞌi hawegiaa ei maꞌea, ei roꞌaa maꞌe aꞌa mei Fasu eꞌeni ma nolao.”
Na ware fei Spiriti ba, “Hiꞌi, ropowe fawenai aꞌa fei bigiꞌaa roꞌou, uaa ei bigiꞌaa roꞌou i neneraa roꞌou.”
Fei Au Hufuꞌaa feni Malagufu
14 Una fanunu ma i maꞌau na paꞌi hepalo poꞌiaa papalei ma mei “aleꞌei naꞌuu ramaꞌa” na guta pafoo fei papalei ma na paꞌi taona, paꞌafina gold ma na paꞌi hepalo wararoa wadu i panina. 15 Ma hemeadiai aloꞌalo na walaꞌamai aꞌa fei humuu mei Haidaa ma harofabauana aꞌa mei fi guta pafoo fei papalei, “Tonaa fei wadumu ma hufu, uaa fei au hufuꞌa na nodigimai, uaa fei malagufu na mara.” 16 Siꞌei, mei pafoo fei papalei na lalaninaa fei waduna pafoo feni malagufu ma hufuꞌaa feni malagufu.
17 Hemeadiai aloꞌalo na walaꞌamai aꞌa fei humuu mei Haidaa i pafea ma ana na paꞌi wararoa waduna. 18 Ma hemeadiai aloꞌalo, mei omaꞌaa fei hafi, noramiana aꞌa fei tawahafi na apunai na warefabauanainaa aꞌa mei hemeadiai na paꞌi fei wararoa wadu ba, “Tonaa fei wararoaa wadumu ma hufuꞌaa ei puroroaa fuaa grape aꞌa fei paꞌapaꞌaa fei malagufu, uaa rona mara.” 19 Mei aloꞌalo na lalaninaloo fei waduna aꞌa fei malagufu, na dupuaa ei fua ma siminia aꞌa fei apiaa fofoo wine, fei sibaa mei Haidaa. 20 Rona hapunirataiaa roꞌou aꞌa fei apiaa fofoo wine auguu fei baua gufu ma na wigii namo wagii fei apiaa fofoo. Merena na fipupudui aꞌa fei taree tabaa fei hosi, malana aleꞌei 1,600 stadia.a