Ma una fanunupaꞌaa hepalo manulelele fi leleꞌamai agi. Ina paꞌi hefua waduu tabana ma olorompalo tabana ma hefua tao, hepalo pafoo hepapalo wadu ma pafoo hepapalo tabana na paꞌi hepalo hara na warefafeloaa mei Haidaa. 2 Maumau fei manulelele fanunupaꞌau aleꞌei leopard, maꞌuaa pinena aleꞌei bear ma poana aleꞌei lion. Fei dragon na fanaa fei manulelele fei faufauna, fei gutanana, gutaa hapara ma fei baua forafora. 3 Hepalo ei tabaa fei manulelele na paꞌi baua dibaa loralora, dibaa wadu, fei anaa i famaꞌeia, maꞌuaa na mafo fei loralorana. Ma minaa feni ano, ronamina maduofo ma neneraa fei manulelele. 4 Ei ramaꞌa, rona losuinaa fei dragon uaa ina fanaa fei forafora aꞌa fei manulelele ma ana rona losuinia ma iꞌigai, “Hini i aleꞌei fei manulelele? Hini i fifoꞌaipaꞌi aꞌana?”

5 Hemea na fani poaa fei manulelele ba nei warefaꞌaguꞌagui, warefafeloaa mei Haidaa ma faꞌasiꞌanaa fei foraforana laloo gunaroa paꞌania ma guai puda. 6 Ina warefafeloaa mei Haidaa, fei harana, fei gufuna mawe ei rona guta i gufu pafea. 7 Ina paꞌi fei faufau ba i fifoꞌai aꞌa ei apunaiaa mei Haidaa ma muainaa roꞌou. Ma na tonaa fei forafora aꞌa minaa ei pai, gufu, ramaꞌa uꞌugai wareagufu ma baua gufu. 8 Minaa ei ramaꞌaa malagufu roꞌaa losuinaa fei manulelele—minaa ei lomi haraa roꞌou laloo fei buꞌuu harenua, fei buꞌuu fei Naꞌuu Sipsipi, fei rona foꞌafamaꞌeia wagii fei mamaraiamii feni malagufu.^b

9 Hini na paꞌi adiana nei guai.

11 Ma una fanunupaꞌaa hepalodiai manulelele fi leleꞌamai aꞌa feni malagufu. Ina paꞌi guapalo wadu tabana aleꞌei naꞌuu sipsipi, maꞌuaa na wareware aleꞌei dragon. 12 Ina tonaa fei foraforaa fei rawarawa manulelele ba haduhaduna ma ware ba minaa ei ramaꞌaa malagufu nei losuinaa fei rawarawa manulelele, fei nawe mafo fei loralorana, fei anaa i famaꞌeia. 13 Ma ina bigiꞌaa ei baua hilalaa foigia ma ana na fapasiaree fei hafi pafea dinaree pu i pudaa ei ramaꞌa. 14 Siꞌei ba ina bigiꞌaa ei hilala aꞌa ei faufau fei rawarawa manulelele, ina sifiꞌaa ei ramaꞌaa malagufu. Ina ware ba ronei faꞌufalarainaa hepalo aleꞌei haduo, hepalo ba i fani honua aꞌa fei manulelele, fei na paugia fei wadu maꞌuaa ana fi guta. 15 Ina tonaa fei faufau ba i fani faweweni aꞌa fei haduoo fei rawarawa manulelele ba i warepaꞌi ma ware ba hini lomi i losuinaa fei haduo, nei maꞌe. 16 Ana ina ware ba hememea nei tonaa fei lala i panina pepei maꞌau o pafoo rawana, minaa ei rona paꞌi haraa roꞌou, o loꞌe, na paꞌi watauda manumanu, o loꞌe, rona humuwai, o loꞌe. 17 Ma lomi nemea ba i pono o alo manumanu nabaa lomi na paꞌi fei lala, fei na paꞌi haraa fei manulelele o fei puduu wawarei fei harana.

18 Sifeni feni ba onei paꞌi fei apaꞌifarawania. Hini na paꞌi apaꞌana nei wareinaa fei wareiaa fei manulelele, uaa fei, wawarei fei wareiaa hemea ramaꞌa. Fei wareiana, 666.