Mei Pifine ma fei Dragon
12
Ma na arewamai i pafea hepalo baua hilala i fananawalaiaa puda: hemea pifine na lalawainaa fei halo ma na ude i haroo pinena fei puda ma tao tabana ei hefua ma guapalo piꞌu. 2 Ina wareu ma aifabauana aꞌa fei fiꞌina hamatee ba i wanini. 3 Ma hepalodiai hilala na arewamai i pafea: hepalo baua roa dragon na paꞌi olorompalo tabana ma hefua waduu taba ma olorompalo tao ei tabana. 4 Fei wawana na rosiminaa hepalo aꞌa odumanu wagii minaa ei piꞌu pafea ma nafaꞌinaa roꞌou i malagufu. Fei dragon na u i maꞌaa mei pifine, mei ba i wanini ba i pisiꞌonomaa mei baduu ena na a waninimai. 5 Ina waninaa hemea naꞌu wawane, mei ba i haparainaa minaa ei baua gufu aꞌa fei o, paꞌafina iron. Ma mei baduu hemea na poronaa pafea aꞌa mei Haidaa ma aꞌa fei gutanana, fei gutaa haparaiana. 6 Mei pifine na adigupenaa fawelei lomi haihai o guana aꞌa fei gutanana, fei pagiꞌaugaa mei Haidaa, mei ba i wagiꞌinia laloo hefa pufabaꞌa ma enu puꞌu ma oloroa paꞌania arewaa. 7 Ma na paꞌi fifoꞌaia i gufu pafea. Michael mawe ei aloꞌalona na fifoꞌai aꞌa fei dragon ma ei aloꞌalona. 8 Maꞌuaa lomi ronamina faufau lalau ma rona pasidiꞌininaa fei gutanaa roꞌou i pafea. 9 Fei baua dragon, rona bainafaꞌinia pu—fei waꞌa mina mina, harana mei haniꞌu o Satan, mei i susuaninaa minaa feni malagufu. Rona bainafaꞌinia pu fipuinaa ei aloꞌalona.
10 Ma una guainaa hefaa baua lao i pafea na ware ba:
“Eꞌeni nawe nomai fei telaꞌana,
fei faufau ma fei haparaiaa mei Haidaniaa oꞌou,
ma fei foraforaa mei Christ.
Uaa mei i ware ba rona tata ei lofuu oꞌou,
mei i ware aleꞌei i pudaa mei Haidaa arewaa ma poi,
rona bainafaꞌinia pu.
11 Rona fugoinia
wagii fei namoo fei Naꞌuu Sipsipi
ma wagii fei uꞌugaa roꞌou;
lomi ronamina haguaa ei fawewenii roꞌou
ba roꞌaa maꞌauputoto aꞌa fei maꞌea.
12 Siꞌei, hamonei niꞌeniꞌe, hamuꞌou ena haroo pafea
ma hamuꞌou ena hamona guta wagina!
Maꞌuaa, aꞌa fei malagufu ma fei agi, hamuna fagiana,
uaa mei haniꞌu na upunaree aꞌa hamugua.
Inamina siba,
uaa ina aida ba fei auna na gu.”
13 Iꞌa fanunupaꞌia fei dragon ba rona bainafaꞌinia malagufu, ina teteaa mei pifine, mei na waniniaa mei baduu wawane. 14 Rona fanaa mei pifine guapaloei pau manuaa ba nei fidunaa aꞌa fei gutana, fei na pagiꞌaudii fawelei lomi haihai o guana ba hefiꞌa roꞌadoꞌo omaꞌaia laloo fei au, ei au ma hesuwi au ma i tauhafo panii fei waꞌa. 15 Ma na mumunisiminaa watauda ranuu poana fei waꞌa ba i nuguitonaa mei pifine aꞌa fei wanii ununa. 16 Maꞌuaa fei malagufu na hadumaa mei pifine mei hamatee na hawainaa poana ma hunumaa fei ranu, fei mumunisimiaa fei dragon i poana. 17 Ma fei dragon namina siba aꞌa mei pifine ma na asiꞌaa ba i fifoꞌai aꞌa ei dufuu naꞌuna—ei rona neneraa ei wareaa mei Haidaa ma panarofaa fei uꞌugaa Jesus.