Helagui Umuia
11
Hemea na fanau hepalo tatapai aleꞌei manumanuu wawarei puduu malaa manumanu ma na warefanau, “Re tapainaa malaa fei humuu mei Haidaa ma fei tawahafi na apunai ma wareinaa ei losuia lalona. 2 Maꞌuaa, fei malalaa humuu i ano; oneiꞌaa tapainia uaa na udenaa aꞌa ei Gentile. Ropowe tatalai pafoo fei gufu apuna laloo gunaroa paꞌania ma guai puda. 3 Ma a fani faufau aꞌa laguei umuiaa umuu ma laguwe wareaa ei diwareꞌauga laloo hefa pufabaꞌa ma enu puꞌu ma oloroa paꞌania arewaa ma susuu lagua aleꞌei susuu ei rona faloloaꞌi. 4 Laguei, ana siguapaloei haihai olive ma guapaloei udeꞌudee weꞌai yei maꞌaa mei Fasuu feni malagufu. 5 Nabaa nemea ba i fafeloaa lagua, i leleꞌamai poaa lagua hafi ma pisiꞌonomaa ei bidibidii unuu lagua. Fei mau maꞌea aleꞌei i tonia mei ba i fafeloaa lagua. 6 Na paꞌi faufau lagua ba laguꞌaa fawiꞌaa fei pumanugawe lomi i paꞌi maunu aꞌa fei au laguna wareaa ei diwareꞌauga ma ana paꞌi faufau lagua ba laguꞌaa filoginaa namo fei agi ma fagianainaa feni malagufu aꞌa minaa ei mau funua ana aleꞌei nunumiaa lagua. 7 Ena laguna fapedugaa uꞌugaa lagua, fei manulelele na walaꞌanamai aꞌa fei walaloa lomi iaꞌiana ba i fanimaꞌaa lagua ma na fugoinaa lagua ma foꞌafamaꞌeaa lagua. 8 Ei hudi unuu lagua na haino ua wagii fei talaa fei baua gufu, fei rona roroihanunuinia ba Sodom ma Egypt, fawelei ana rona fatawaiaa mei Fasuu roꞌou. 9 Laloo oduai ma hesuwi arewaa ei ramaꞌa, noramiaa roꞌou aꞌa minaa ei ramaꞌa, ei pai ramaꞌa, minaa ei wareagufu ma ei baua gufu ma roꞌaa uꞌigoaa hudi unuu lagua ma lomi roꞌaa uga ba roꞌaa iꞌifinaa lagua. 10 Ei ramaꞌaa malagufu roꞌaa niꞌeniꞌe wagii fei lagii lagua ma hamamani, fifanii fanaa roꞌou, uaa laguei mamamaꞌa laguei, lagunadoꞌo fanimaꞌaa ei rona guta yeni malagufu.
11 Maꞌuaa, nenee oduai ma hesuwi arewaa fei fawewenii harenuaa mei Haidaa na waduꞌaa lagua ma laguna asiꞌaꞌunaa pinee lagua ma ronamina maꞌaurerere ei rona fanunuaa lagua. 12 Ma lagunawe guainaa hepalo baua lao noramiana pafea na warenaa aꞌa lagua ba, “Nomai yeni pafea.” Ma laguna dinaa pafea wagii hepalo papalei ma rona ufanunulao ei bidibidii unuu lagua.
13 Ana aꞌa fei au fei, namina rerefabauana fei malagufu ma hepalo aꞌa hefua wagii minaa ei manumanu laloo fei baua gufu na wataꞌoꞌo. Ma oloromfua pufabaꞌa ramaꞌa, rona maꞌe wagii fei rereaa fei malagufu. Ma ei dufuu ramaꞌa, rona maꞌaufafelo ma fani honua aꞌa mei Haidaniaa fei gufuu pafea.
14 Fei faguaiaa fagianaa na nodigilao; lomi i madii ma iwe nomai fei faꞌoduaiaa fagianaa.
Fei Faꞌolorompaloaa Maniwa
15 Mei faꞌoloromeaiaa aloꞌalo na hugufaa fei maniwana ma hefiꞌa baua lao i pafea na ware:
“Fei haparaiaa feni ano
nawe oanaa haparaiaa mei Fasuu oꞌou
mawe mei Christ,
ma ipowe oanaa hapara ranimai ranimai.”
16 Ma ei enu paꞌania ma gunaroa forafora mina mina, ei rona guta pafoo ei gutanaa roꞌou gutaa hapara i maꞌaa mei Haidaa, rona fapasiꞌoꞌoꞌui ma losuinaa mei Haidaa 17 ma rona ware,
“Haiꞌoufi ware ‘ta’ aꞌamu mena Fasu, mena Faufau Haidaa,
yoi mena oifi oa eni ma mina,
uaa onawe tonaa fei baua faufaumu
ma faꞌasiꞌanaa fei haparaiamu.
18 Ei baua gufu, rona siba;
ma fei sibamu na nomai.
Na nodigimai fei au ba oꞌaa dududuaa ei maꞌea,
ma ponoꞌaa ei nafimu, ei mamamaꞌa,
ma ei apunaiamu ma ei rona fahonuaa fei haramu,
fipuinaa ei rona paꞌi haraa roꞌou ma ei lomi—
ma ana ba oꞌaa fagianainaa
ei rona fagianainaa feni malagufu.”
19 Ma fei humuu mei Haidaa i pafea na gigi ma i laloo humuna una fanunupaꞌaa fei bao fei fiꞌugaiana. Ma na aꞌegimeꞌaimai fei usida ma na memeꞌai fei hugugu ma parara ma na rerere fei malagufu ma na ropa ei weꞌia manumanu aleꞌei mugoo.