Hemei Aloꞌalo ma fei Pusuꞌo Holobenaa
10
I dii, una fanunupaꞌaa hemeadiai faufau aloꞌalo fi norai pafea. Hawaa uguna, papalei ma na paꞌi puaꞌoo palalaa tabana; mau pudana aleꞌei fei halo ma guei pinena aleꞌei u ma na weguwegu. 2 Ina panarofaa hepalo pusuꞌo holobenaa na folorai i panina. Ina faꞌugaa raudei pinena maꞌau i pafoo fei agi ma raudei mauwina, i pafoo fei malagufu 3 ma ina memewai aleꞌei hepalo lion. Iꞌa haroharo, ei lao olorompaloei parara na wareware. 4 Ma roꞌaa ware olorompaloei parara ba a neꞌi maꞌuaa, una guainaa hepalo lao pafea na ware, “Obainaa tamanu rona wareia ei olorompalo parara ma oneiꞌaa neꞌinia.” 5 Ma mei aloꞌalo, mei unadoꞌo fanunupaꞌia na u i pafoo fei agi ma fei malagufu, ina roainaa pafea raudei panina maꞌau. 6 Ma ina warefaꞌunai aꞌa mei fi oalao ranimai ranimai, mei na famamaraiaa fei pumanugawe, minaa ei haroo pafea, fei malagufu ma minaa ei wagina, fei agi ma minaa ei lalona ma ina ware, “Lomidiai fawiwiꞌaia! 7 Maꞌuaa, laloo ena arewaa na hugufaa fei maniwana mei faꞌoloromeaiaa aloꞌalo, fei opaꞌaiaa mei Haidaa, i powe arewapedu ana aleꞌei idii wareia aꞌa ei nafina, ei mamamaꞌa.”
8 Ma fei lao adoꞌo guainia noranarai pafea na ware hepoadiai aꞌau ba: “Re tonaa fei holobenaa, fei na folorai panii mei aloꞌalo, mei na ufalarai pafoo fei agi ma fei malagufu.”
9 Siꞌei una dinaa aꞌa mei aloꞌalo ma iꞌiginia ba nei fanau fei pusuꞌo holobenaa. Ina ware aꞌau ba, “Ni. Hanaia. I paraꞌa i laloo pahanamu maꞌuaa laloo poamu i roꞌo aleꞌei musii lao.” 10 Una tonaa fei pusuꞌo holobenaa i panii mei aloꞌalo ma hanaia. Namina roꞌo aleꞌei musii lao laloo poau, maꞌuaa a hanapedudigia, namina paraꞌa. 11 Ma na warefanau, “Onei diwareꞌaudinaa watauda ramaꞌa ma ei baua gufu, ei ramaꞌaa uꞌugai wareagufu ma ei hapara.”