9
Mei fahaipaniaa aloꞌalo na hugufaa fei maniwana ma una fanunupaꞌaa hepalo piꞌu na pasirai pafea dinaa malagufu. Fei piꞌu na tonaa fei gigigii fei walaloa lomi iaꞌiana. 2 Iꞌa gigiaa fei walaloa lomi iaꞌiana, fei hagu na asiꞌaa wagina aleꞌei haguu hepalo baua feꞌaa. Fei halo ma fei pumanugawe na roro aꞌa fei haguu fei walaloa lomi iaꞌiana. 3 Ma wagii fei haguu ei teraupu na pasinaree feni malagufu ma na fanaa roꞌou fei faufau aleꞌei ei difowai. 4 Hemea na ware aꞌa roꞌou ba roneiꞌaa fafeloaa ei guanaa feni malagufu o hepalo haihai maꞌuaa, uniaa ei lomi rona paꞌi fei tamatamaa mei Haidaa pafoo rawaa roꞌou. 5 Lomi rona tonaa fei faufau ba roꞌaa foꞌafamaꞌeaa roꞌou, maꞌuaa, ronei haperaraꞌuaiaa roꞌou laloo haipani puda. Ma fei fiꞌiaa roꞌou ana paꞌaa aleꞌei fei taduaa fei difowai. 6 Aꞌa ei arewaa ei, ei ramaꞌa, roꞌaa labarai famaꞌemaꞌee roꞌou, maꞌuaa lomi roꞌaa paꞌia; nunumiaa roꞌou ba ro maꞌe, maꞌuaa fei maꞌea lomi i paꞌaa roꞌou.7 Fei maumau ei teraupu aleꞌei ei hosi, ei ba roꞌaa adigupenaa fifoꞌaia. Pafoo tabaa roꞌou, na paꞌi aleꞌei tao, paꞌafina gold ma fei mau pudaa roꞌou aleꞌei ramaꞌa. 8 Hugoo tabaa roꞌou aleꞌei hugoo paraa pifine ma difoo roꞌou aleꞌei lion. 9 Rona paꞌi rapirapii niniwai, paꞌafina iron ma inaiaa pau roꞌou aleꞌei memeꞌii unuu watauda hosi ma chariot rona adigupenaa fifoꞌaia. 10 Wawaa roꞌou na tadu aleꞌei taduaa difowai ma aꞌa ei wawaa roꞌou na paꞌi faufau ba roꞌaa haperaraiaa ei ramaꞌa laloo hapaini puda. 11 Mei haparaa roꞌou, mei aloꞌaloo fei walaloa lomi iaꞌiana, harana Abaddon aꞌa fei warea Aramea ma fei harana aꞌa fei warea Greece, Apollyon.a
12 Fei rawarawa fagianaa na nodigilao; guapalodiai i nomai.
13 Mei faꞌoloroaa aloꞌalo na hugufaa fei maniwana ma una guainaa hepalo lao noranamai aꞌa ei manumanu na suaraib wagii fei tawahafi na apunai, paꞌafina gold, fei yei i maꞌaa mei Haidaa. 14 Ina warenaa aꞌa mei faꞌoloroaa aloꞌalo, mei na paꞌi maniwa ba, “Alaraa gunaroei aloꞌalo, ei rona fau yei aꞌa fei baua ranu Euphrates.” 15 Ma gunaroei aloꞌalo, ei ronadoꞌo guta nopaꞌamii fei paꞌaa au fei, fei arewaa laloo fei puda ma igisimasi fei, ronawe ala ba ronei foꞌafamaꞌeaa hemea aꞌa oꞌodui aꞌa minaa ei ramaꞌa. 16 Puduu ei foꞌaa rona hugi pafoo ei hosi, aleꞌei enu puꞌu pufabaꞌa pufabaꞌa. Una guainaa fei puduu roꞌou.
17 Maumau ei hosi ma ei rapiꞌaa roꞌou laloo fei mefiu aleꞌei ba: Ei rapirapii niniwai roꞌou na ro aleꞌei hafi, paꞌaa marawi ma rewarautao aleꞌei babaiaa mugoo. Maumau tabaa ei hosi aleꞌei tabaa lion ma fei hafi, hagu ma babaiaa mugoo na leleꞌamai poaa roꞌou. 18 Ma hemea aꞌa oꞌodui aꞌa minaa ei ramaꞌa na maꞌe wagii odumanu manumanu: fei hafi, fei hagu ma fei babaiaa mugoo, ei na leleꞌamai poaa roꞌou. 19 Fei faufau ei hosi na ude i poa ma wawaa roꞌou; uaa ei wawaa roꞌou aleꞌei waꞌa ma na paꞌi tabaa roꞌou ba roꞌaa tadu.
20 Ei dufuu ramaꞌa, ei lomi rona maꞌe wagii eꞌei hafeloꞌa eꞌei, ana lomi rona filoginaa naranara o bigiꞌaa roꞌou; rona losuiꞌuaialao ei pigea ma ei manumanu aleꞌei gold, silver, bronze, mugoo—haidaa sifisifi, ei lomi rona fanunupaꞌi, guaipaꞌi o talaipaꞌi. 21 Ana lomi rona filoginaa naranara wagii ei foꞌafamaꞌea, bigiꞌaa ei puala, ei fitatafipaꞌaia ma ei fafanaoaa roꞌou.