2 Ma una fanunupaꞌaa ei oloromea aloꞌalo, ei roꞌei u i maꞌaa mei Haidaa ma rona tonaa olorompalo maniwa.

3 Ina nomai hemeadiai aloꞌalo, mei na paꞌi hagii bafuu hafi na dufaa, paꞌafina gold ma namii u i maꞌaa fei tawahafi na apunai. Rona fania ei lafulafuaa ei apunaiaa mei Haidaa fininaa watauda dufaa hagu ba inei fani fana i pafoo fei tawa apunaia paꞌafina gold i maꞌaa fei gutanaa hapara. 4 Fei dufaa hagu fininaa ei lafulafuaa ei apunaiaa mei Haidaa na asiꞌaa aꞌa fei panii mei aloꞌalo dinaa pafea i maꞌaa mei Haidaa. 5 Ma mei aloꞌalo na tonaa fei hagi, nofinaa hafi aꞌa fei tawahafi na apunai ma bainafaꞌinaa pafoo fei malagufu; ma na paꞌi parara, hugugu, aꞌegimeꞌaiaa usida ma namina rerere fei malagufu.

6 Ma ei oloromea aloꞌalo, ei rona paꞌi olorompalo maniwa, ba roꞌaa hugufia.

7 Mei rawarawaa aloꞌalo na hugufaa fei maniwana ma na logunaree malagufu ei manumanu aleꞌei ei mugoo fininaa hafi fihafuinaa namo. Na guꞌa heai aꞌa oduai malalaa fei malagufu, heai aꞌa oduai haihai ma minaa ei guana mamarawii.

8 Mei fahelaguiaa aloꞌalo na hugufaa fei maniwana ma hepalo manumanu aleꞌei baua maugeni namina guꞌaguꞌa ma ina siminaa laloo agi. Ma heai aꞌa oduai fei agi na filoginaa namo. 9 Heai aꞌa oduai manumanu laloo agi na maꞌe ma hepalo aꞌa odumanu wagii minaa ei baua wa na fagiana.

10 Mei faꞌoꞌoduiaa aloꞌalo na hugufaa fei maniwana ma hepalo baua piꞌu namina weguwegu aleꞌei ramai na pasigio pafea, pasi pafoo heai aꞌa oduai ei ranu— 11 haraa fei piꞌu fei, Paraꞌaa.^a Heai aꞌa oduai ei baua ma pusuꞌo ranu na filoginaa paraꞌaa ma watauda ramaꞌa rona maꞌe wagii fei ranu na paraꞌa.

12 Mei fagunaroaa aloꞌalo na hugufaa fei maniwana ma na hafelo heai aꞌa oduai ei au fei halo, fei puda ma ei piꞌu ba aleꞌei heai aꞌa oduai na filoginaa roromaa. Heai aꞌa oduai ei arewaa na roro ma fei poi anaa.

13 Ei a fafanunulao, na guainaa hefaa manuaa fi fidulao ma na harofabauana ba, “Fagiana! Fagiana! Fagiana aꞌa ei rona oa i malagufu, uaa oꞌoduei aloꞌalo ba roꞌaa hugufaa ei maniwa!”