144,000 Rona Tamaꞌaidii
7
Nenee fei, na fanunupaꞌaa gunaroei aloꞌalo rona ufalarai aꞌa obaoei walasusuu feni malagufu, rona utofaꞌainaa obaoei lalarenaa fei malagufu ba roꞌaa pauninaa fei lalarena ba neiꞌaa agifaa fei malagufu o fei agi o hepalo haihai. 2 I dii, una fanunupaꞌaa hemeadiai aloꞌalo fi norai raudei ana halo ma i aꞌana fei banabanaa mei Haidaa, mei fi oalao. Ina haropararainaa aꞌa gunaroei aloꞌalo, ei rona paꞌi fei faufau ba roꞌaa fagianainaa fei malagufu ma fei agi ma ware ba: 3 “Apuna fagianainaa fei malagufu o fei agi o ei haihai nopaꞌaloo fei ba haiꞌouna au tamatama pafoo rawaa ei nafii mei Haidaniaa haiꞌou.” 4 Ma una guainaa fei puduu ei rona tamaꞌaidii: 144,000 noramiaa roꞌou aꞌa minaa ei pai Israel.5 Aꞌa fei pai Judah 12,000 na tonaa fei lala,
aꞌa fei pai Reuben 12,000,
aꞌa fei pai Gad 12,000,
6 aꞌa fei pai Asher 12,000,
aꞌa fei pai Naphtali 12,000,
aꞌa fei pai Manasseh 12,000,
7 aꞌa fei pai Simeon 12,000,
aꞌa fei pai Levi 12,000,
aꞌa fei pai Issachar 12,000,
8 aꞌa fei pai Zebulun 12,000,
aꞌa fei pai Joseph 12,000,
aꞌa fei pai Benjamin 12,000.
Fei Baua Gupuu Ramaꞌa, Susuu Roꞌou Poꞌiaa
9 Nenee fei, una fanunu ma yei i pudau na pai hepalo baua gupuu ramaꞌa lomi hemea ba i wareipaꞌia. Noramiaa roꞌou aꞌa minaa ei baua gufu, pai, maumau ramaꞌa ma wareagufu ma rona u i maꞌaa fei Naꞌuu Sipsipi. Susuu roꞌou poꞌiaa ua ma rona panarofaa ei habaa haihai i panii roꞌou. 10 Ma rona harofabauanai ba:
“Fei telaꞌana, manumanuu fei Naꞌuu Sipsipi
mawe mei Haidaniaa oꞌou,
mei fi guta pafoo fei gutanaa hapara.”
11 Minaa ei aloꞌalo, rona ufaweloinaa fei gutanaa hapara ma ei forafora mawe ei gunaroa manumanu, ei rona fawewenai. Rona fapasiꞌoꞌoꞌuinaa pu i maꞌaa fei gutanaa hapara ma losuinaa mei Haidaa, 12 ma rona ware:
“Amen!
Udugia ma hawera
ma apaꞌa ma warea ‘ta’ ma honua
ma faufaua
i dinaa aꞌa mei Haidaniaa oꞌou
ranimai, ranimai. Amen!”
13 Ma hemea ei forafora na iꞌiginau, “Ei susuu roꞌou poꞌiaa—roꞌou hini ma noramiaa roꞌou hitani?”
14 Una ware, “Mena bauana, ona aidadii.”
Ma ina ware, “Eꞌena, ena ronadoꞌo tonaa fei baua haperaraia; rona fesufapoꞌinaa ei susuu roꞌou wagii fei namoo fei Naꞌuu Sipsipi. 15 Siꞌei,
“Roꞌaa u i maꞌaa fei gutanaa haparaa mei Haidaa
ba roꞌaa paniaa panina arewaa ma poi laloo fei humuna;
ma mei fi guta pafoo fei gutanaa hapara
i hawainaa roꞌou aꞌa fei palena.
16 Lomidiai ba roꞌaa bao ma sigigi.
Lomi ba i famaguhaguaa roꞌou fei halo,
o neꞌa manumanu na babai.
17 Uaa fei Naꞌuu Sipsipi i memewaa fei gutanaa hapara
i oanaa omaꞌamaꞌaa roꞌou;
i noduginaa roꞌou aꞌa fei ranuu harenua.
Ma mei Haidaa, i huguaa minaa ei ranuu pudaa roꞌou.”