3 Iꞌa gigiꞌaa fei faguapaloaa banabana fei Naꞌuu Sipsipi, una guainaa fei faguapaloaa manumanu, fei na fawewenai, ina ware ba, “Nomai!” 4 Ma hepalodiai hosi na nomai, maumauna aleꞌei fei hafi na ro. Ma mei pafona na tonaa fei faufau ba i fapedugaa fei gutafarawania ma fafifoꞌainaa ei ramaꞌa i malagufu. Ma na tonaa fei baua wadu.

5 Iꞌa gigiꞌaa fei faꞌodumanuaa banabana fei Naꞌuu Sipsipi, una guainaa fei faꞌoꞌoduiaa manumanu na ware ba “Nomai!” Una fanunu ma yei i pudau hepalo hararapaꞌo hosi! Mei pafona na panarofaa hepalo manumanu ba i wareinaa rarabaa ei manumanu. 6 Ma una guainaa fei aleꞌei lao na waremai i dupuaa ei gunaroa manumanu, ei rona fawewenai, “Hepalo choinix^a wheat wagii fei bigiꞌaa heai arewaa,^b oduai litre barley wagii fei bigiꞌaa heai arewaa^c ma apuna fafeloaa fei pao ma fei wine!”

7 Iꞌa gigiꞌaa fei faꞌobaoaa banabana fei Naꞌuu Sipsipi, una guainaa fei fagunaroaa manumanu na ware ba “Nomai!” 8 Una fanunu ma yei i pudau hepalo alaweraa hosi! Mei pafona, harana Maꞌea, ma Hades fi nofararafiꞌimai nenena. Mei Haidaa na fanaa lagua fei faufau aꞌa henono aꞌa obao feni malagufu ba lagunei foꞌafamaꞌenaa roꞌou wadu, mouabiabia, funua ma ei manulelelee podu feni malagufu.

9 Iꞌa gigiꞌaa fei fahaipaniaa banabana, una fanunupaꞌia ba i haroo fei tawahafi na apunai na ude ei fawewenii ei rona foꞌafamaꞌeaa roꞌou hefiꞌa hamatee fei wareaa mei Haidaa ma fei uꞌugaa roꞌou wagina. 10 Rona haropararaimai ba, “Mena Hapara Fasu, mena ona fafaꞌarai ma faꞌuai nahaiga ba oꞌaa dududuaa ei ramaꞌaa fei malagufu ma fawanewaneaa fei namoo haiꞌou?” 11 I dii, hememea roꞌou na tonaa hepapalo poꞌiaa susu ma hemea na warefanaa roꞌou ba ronei fawiwiꞌa maꞌida nopaꞌaloo fei ba na poponai fei puduu ei rarafii roꞌou nafi ma lofu, ei ba roꞌaa foꞌafamaꞌeaa roꞌou hefiꞌa.

12 Una fanunulao ma ina ufugaa fei faꞌoloroaa banabana. Ma namina rerere fei malagufu. Fei halo na filoginaa hararapaꞌo aleꞌei susuu faloloaꞌia, bigiꞌaa roꞌou hugoo memee ma minaa fei puda na filoginaa roa, aleꞌei namo 13 ma ei piꞌu haroo pafea na pasinaa malagufu, aleꞌei fei fua na marapasi nabaa na paꞌi baua lalarena. 14 Fei pumanugawe na folarai aleꞌei holobenaa neꞌia ma minaa ei maugeni ma gufu na afuediꞌininaa ei paꞌaa udeaa roꞌou.

15 Ma ei haparaa fei malagufu, ei naꞌuu hapara, ei bauaniaa foꞌaa, ei na paꞌi watauda manumanu, ei faufaua, minaa ei humuwa ma minaa ei abaa humuwa, rona opaꞌai i laloo ei walefoaa ei naꞌa ma dupuaa ei naꞌanaꞌa. 16 Rona warefaweꞌi aꞌa ei maugeni ma ei naꞌanaꞌa ba, “Pasi pafoo haiꞌou ma opaꞌainaa haiꞌou aꞌa fei pudaa mei fi guta pafoo fei gutanaa hapara mawe fei sibaa fei Naꞌuu Sipsipi! 17 Uaa fei baua arewaa sibaa lagua nawe nomai ma hini i ufalaraipaꞌi?”