Fei Holobenaa ma fei Naꞌuu Sipsipi
5
Ma unawe fanunupaꞌia ba raudei maꞌau, panii mei fi guta pafoo fei gutanaa hapara na paꞌi aleꞌei holobenaa ma mina guapepei na paꞌi neꞌia ma na fapananaa olorompalo banabana. 2 Ma una fanunupaꞌaa hemea faufau aloꞌalo fi warefabauanai, “Hini na awata aleꞌei ba i gigiꞌaa ei banabanana ma ufugaa fei holobenaa?” 3 Maꞌuaa lomi hemea i pafea o i malagufu, o haroo malagufu ba i ufugaa fei holobenaa o fanunu lalona. 4 Unamina aiꞌaifaweꞌi, uaa lomi rona labagipaꞌaa hemea na awata aleꞌei ba i ufugaa fei holobenaa o fanunu lalona. 5 I dii, hemea ei forafora mina mina na warenamii aꞌau, “Apuna aiꞌai! Maꞌa, fei lion maroaa ei pai Judah, fei Waraa David, na mua. Hia na awata ba i ufugaa fei holobenaa ma ei olorompalo banabanana.”6 Ma unawe fanunupaꞌaa hepalo Naꞌuu Sipsipi, fanunuana aleꞌei ba rona moroꞌia, na ufalarai i memewaa fei gutanaa hapara, fei rona faweloinia ei gunaroa manumanu mawe ei forafora. Na paꞌi olorompalo waduu tabana ma olorompalo pudana, haduoo ei olorompalo spiritiia mei Haidaa, ei na alonaa roꞌou tadiweꞌaiaa fei malagufu. 7 Inamii tonaa fei holobenaa i raudei maꞌau panii mei fi guta pafoo fei gutanaa hapara. 8 Iꞌa todigia, ei gunaroa manumanu, ei rona fawewenai mawe ei enu paꞌania ma gunaroa forafora mina mina, rona fapasi i maꞌaa fei Naꞌuu Sipsipi. Hememea na paꞌi harp ma rona utabeaa ei lopi, paꞌafina gold ma na pepesu aꞌa ei dufaa hagu, haduoo ei lafulafuaa ei apunaiaa mei Haidaa. 9 Ma rona laugaa hepalo manufau lauga:
“Yoi, ona awata ba oꞌaa tonaa fei holobenaa
ma gigiꞌaa ei banabana,
uaa rona foꞌafamaꞌedigio,
ma wagii fei namomu ona ponohadiweꞌinaa ei ramaꞌa
noramiaa roꞌou aꞌa minaa ei pai ramaꞌa, minaa ei wareagufu, minaa ei mau ramaꞌa ma minaa ei baua gufu
ba naꞌuu mei Haidaa.
10 Ona nunuminia ba roꞌou aleꞌei ramaꞌaa fei haparaia
ma aleꞌei bauaniaa humuu mei Haidaa,
ba ronei bigi haroo mei Haidaniaa oꞌou
ma tonaa fei hapara yeni malagufu.”
11 Ma una fanunulao ma guainaa lao ei watauda aloꞌalo puduu roꞌou pufabaꞌa pufabaꞌa ma watauda pufabaꞌadiai. Rona faweloinaa fei gutanaa hapara ma ei gunaroa manumanu ma ei forafora. 12 Rona laugifabauanai ba,
“Na awata fei Naꞌuu Sipsipi, fei rona foꞌafamaꞌeia
ba i tonaa fei forafora ma ei rawaniꞌa manumanu
ma apaꞌa ma faufau
ma honua ma hawera ma udugia!”
13 Ma una guainaa minaa ei manumanu pafea ma i malagufu ma haroo malagufu ma pafoo fei agi ma ei i ude i laloo eꞌei, rona laugi ba:
“I aꞌa mei fi guta pafoo fei gutanaa hapara ma aꞌa fei Naꞌuu Sipsipi
i ude fei udugia ma honua ma hawera ma faufau
ranimai ranimai!”
14 Ei gunaroa manumanu, ei rona fawewenai, rona ware, “Amen,” ma ei forafora, rona fapasinaa pu ma uduginia.