Fei Gutanaa Hapara i Gufu Pafea
4
Nenee fei, una fanunu ma i maꞌau na gigi hepalo gigei i gufu pafea. Fei lao, fei nadoꞌo guainia famaꞌa ei i ware aꞌau aleꞌei maniwa na ware ba, “Nomai yeni pafea ma a famaꞌaio tamanu ba i nomai nenee fei.” 2 Ana ei na pasiau fei Spiriti ma i maꞌau na guta hemea pafoo fei gutanaa hapara i gufu pafea. 3 Ma mei i guta yei, fei mau fanunuana aleꞌei jasper ma carnelian. Hepalo puaꞌoo, maumauna aleꞌei emerald, na faweloinaa fei gutanaa hapara. 4 Enu paꞌania ma obaodiai gutanaa hapara na faweloinaa fei gutanaa hapara fei ma enu paꞌania ma gunaroa forafora mina mina, rona guta wagii roꞌou. Na poꞌi susuu roꞌou ma pafoo tabaa roꞌou na paꞌi tao, paꞌafina gold. 5 Aꞌa fei gutanaa hapara na aꞌegimeꞌaimai fei usida, hugugu ma parara. I maꞌaa fei gutanaa hapara olorompalo weꞌai na weguwegu. Eꞌei, ei olorompalo spiritiia mei Haidaa. 6 Ana i maꞌaa fei gutanaa hapara na fafanunu aleꞌei fei maꞌeaa fei agi na pao ua, namina poꞌi malewa.I memewana, papaa fei gutanaa hapara na paꞌi gunaroa manumanu rona fawewenai ma namina watauda ei pudaa roꞌou, maꞌa ma mugi. 7 Fei rawarawa manumanu, fanunuana aleꞌei lion, fei fahelaguiana aleꞌei budumaꞌao, fei faꞌoꞌoduiana, pudana aleꞌei ramaꞌa ma fei fagunaroana aleꞌei hepalo manuaa na fidufidu. 8 Hepapalo aꞌa obaoei, na paꞌi oloroa pau ma namina pepesu ei puda i hudi ununa, haroo pauna anaa. Arewaa ma poi lomi rona fafaa warea ba:
“Apunai, apunai, apunai mei Fasu, mei Faufau Haidaa, mei na oa mina, mei fi oa eni, mei ba i nomai.”
9 Ei gunaroa manumanu ei, rona fawewenai. Ma rona fani hawera, honua ma warea ‘ta’ aꞌa mei fi guta pafoo fei gutanaa hapara, mei i oalao ranimai, ranimai. 10 Ei roꞌaa bigiꞌaa fei, ei enu paꞌania ma gunaroa forafora mina mina, rona fapasi i maꞌaa mei na guta aꞌa fei gutanaa hapara ma losuinaa mei fi oalao ranimai ranimai. Rona augaa ei tao roꞌou i maꞌana ma ware:
11 “Yoi, onamina awata, mena Fasuu haiꞌou, mena Haidaniaa haiꞌou,
ba o tonaa hawera ma honua ma faufau,
uaa ona famamaraiaa minaa ei manumanu,
ma aꞌa ei nunumiamu rona mamara
ma ude.”