Siꞌeni eni wareaa mei i panarofaa ei olorompalo spiritii^b mei Haidaa ma ei olorompalo piꞌu. Una apaꞌidigaa ei bigiꞌaa hamuꞌou; ei ramaꞌa, rona nara ba hamona werawera, maꞌuaa hamona maꞌe. 2 Asiꞌaa! Faweꞌiaa tamanu ifi ude ma anaa i maꞌe, uaa fei bigiꞌaa hamuꞌou, atawe pedufarawani i pudaa mei Haidaa. 3 Siꞌei, nonominaa tamanu hamona tonia ma guainia; nenegia ma filoginaa naranaraa hamuꞌou. Maꞌuaa, nabaa lomi hamoꞌaa asiꞌaa, apowe nomai aleꞌei nemea fafanao ma lomi hamoꞌaa apaꞌia ba nahaiga a nomai aꞌa hamuꞌou.

4 Maꞌuaa hamona paꞌi hefiꞌa yena Sardis ena lomi rona faloloaa ei susuu roꞌou. Roꞌaa tatalaifipui aꞌau, susuu roꞌou poꞌiaa, uaa rona rawani. 5 Hini i mua, i aleꞌei roꞌou, susuna, poꞌiaa. Lomi awe futoaa fei harana aꞌa fei buꞌuu harenua, maꞌuaa a laꞌaa harana i pudaa mei Amau ma ei aloꞌalona. 6 Hini na paꞌi adiana nei guainaa tamanu na wareia fei Spiriti aꞌa ei losuu.

Siꞌeni eni wareaa mei na apunai ma faꞌuai, mei i panarofaa fei gigigii David. Tamanu hia na gigia, lomi nemea i fareꞌipaꞌia ma tamanu hia na fareꞌia, lomi nemea i gigipaꞌia. 8 Una apaꞌidigaa ei bigiꞌaa hamuꞌou. Fanunu, una augia i maꞌaa hamuꞌou hepalo gigei na gigi, fei lomi nemea i fareꞌipaꞌia. Una aida ba lomi hamonamina faufau, maꞌuaa hamona neneraa fei wareau ma lomi hamona diꞌininaa fei harau. 9 Ena maroaa fei synagogue Satan, ena rona ware ba roꞌou Jew, maꞌuaa loꞌe, roꞌou sifisifi—a fafaiaa roꞌou ba roneimii fapasi i pinee hamuꞌou ma ware ba una haguaa hamuꞌou. 10 Siꞌei ba hamona guainaa fei wareau ba hamonei oa fininaa apitaia, ana a wagiꞌinaa hamuꞌou aꞌa fei au hafelo, fei ba i nomai ma manimaꞌaa minaa eni yeni aꞌa feni ano.

11 Anaa a nomai. Panarofaa tamanu hamona paꞌi ba lomi nemea i topaꞌainaa fei tao hamuꞌou. 12 Hini i mua, yau a faꞌufalarainia aleꞌei hepalo u humuu mei Haidaniau. Lomidiai ba i diꞌininia. A neꞌinaa fei haraa mei Hadaniau i pafona ma fei haraa fei gufuu mei Haidaniau, fei manufau Jerusalem, fei fi nogio pafea i aꞌa mei Haidaniau; ma ana a neꞌinaa fei manufau harau i pafona. 13 Hini na paꞌi adiana nei guainaa tamanu na wareia fei Spiriti aꞌa ei losuu.

Siꞌeni eni wareaa mei Amen, mei na oafagugu ma na uꞌufafaꞌuai, mei famamoaa ei famamaraa mei Haidaa. 15 Una apaꞌidigaa ei bigiꞌaa hamuꞌou ba lomi hamona magigi ma lomi hamona babai. Nunumiau ba hamuꞌou hepalo guapaloei! 16 Siꞌei ba lomi hamonamina babai—abaa babaia o magigia—ana a huwisuminaa hamuꞌou poau. 17 Hamona ware ba, ‘Yau na paꞌi watauda manumanu; na paꞌi mugoo poꞌi ma lomi na nunuminaa neꞌa manumanudiai.’ Maꞌuaa lomi hamona aida ba hamona hafelo, oa aꞌa fei faloloaꞌia, lomi na paꞌi manumanu, pudawerai ma alawata. 18 A aweinaa hamuꞌou ba hamonei pono gold aꞌau, fei rona fafafaꞌarainaa hafi ba hamonei paꞌi manumanu ma rafe poꞌiaa susu ba hamoꞌaa hawaipaꞌainaa ei alawataa hamuꞌou, ei i famamafaa hamuꞌou; ma au pao pudaa hamuꞌou ba hamoꞌaa fanunupaꞌi.

19 Aꞌa ena una haguaa roꞌou, a warefaweꞌi ma sualaparaa roꞌou. Siꞌei, nofarawaninamai ma filoginaa naranaraa hamuꞌou. 20 Fanunu! Una u aꞌa fei gigei ma fabaꞌabaꞌa. Hini i guainaa fei laou nei gigia ma a waduꞌaimai ma haiguꞌaa hananafipui.

21 Aꞌa hini i mua, a ugainia ba i gutafipui aꞌau pafoo fei gutanau gutaa hapara ana aleꞌei una mua ma gutafipui aꞌa mei Amau pafoo fei gutanana gutaa hapara. 22 Hini na paꞌi adiana nei guainaa tamanu na wareia fei Spiriti aꞌa ei losuu.”