Siꞌeni eni wareaa mei i panarofaa ei olorompalo piꞌu raudei maꞌauna, mei i tatalai watolaa ei olorompalo udeꞌudee weꞌai, paꞌafina gold: 2 Una apaꞌidigaa ei bigiꞌaa hamuꞌou, fei wewea bigiꞌa ma fei apitaiaa hamuꞌou. Una aida ba lomi hamona nunuminaa ei hafeloꞌa ramaꞌa, ba hamona manimaꞌaiaa ei ba roꞌou apostle maꞌuaa lomi ma hamona apaꞌia ba roꞌou sifisifi. 3 Hamona apitainaa ei rarabaa uaa fei harau ma lomi hamona rafilele.

4 Maꞌuaa na paꞌi hepalo tataa hamuꞌou i pudau: Hamona diꞌininaa fei rawarawa haguaa hamuꞌou. 5 Naraiaa fei imina tare, fei hamona pasirai wagina! Filoginaa naranaraa hamuꞌou ma bigiꞌaa ei hamonadoꞌo bigiꞌia famaꞌa. Nabaa lomi hamoꞌaa filoginaa naranaraa hamuꞌou, apowemii tonaa fei udeꞌudee weꞌai hamuꞌou aꞌa fei udeana. 6 Maꞌuaa na paꞌi hepalo rawaniꞌaa hamuꞌou i pudau: Hamona fabidinaa unuu hamuꞌou ei bigiꞌaa ei Nicolatia, ei ana una paꞌi bidiꞌaa unuu wagina.

7 Hini na paꞌi adiana nei guainaa tamanu na wareia fei Spiriti aꞌa ei losuu. Aꞌa hini i mua awe ugainia ba i hanana aꞌa fei haihai fei harenua, fei i ude laloo fei fananamaiaa gufuu mei Haidaa.

Siꞌeni eni wareaa mei Rawarawa, mei ana hia Mugi, mei na maꞌe famaꞌa ma mamaꞌadiai. 9 Una apaꞌidigaa ei rarabaa ma gutafafeloaa hamuꞌou—maꞌuaa hamona paꞌi watauda manumanu! Una guaidigaa ei wiwitoiaa ei rona ware ba roꞌou Jew maꞌuaa loꞌe, hamatee roꞌou aꞌa fei synagogue Satan. 10 Apuna maꞌau aꞌa fei fiꞌia, fei anaa hamoꞌaa tonia. Uꞌei warefanaa hamuꞌou ba mei haniꞌu iwe aunaa hefiꞌa hamuꞌou humuu boboꞌaia ba i manimaniaa hamuꞌou ma laloo hefua arewaa hamoꞌaa oa i pudaa fei haperararaia ba hamopoꞌo bimaꞌe ua. Oafagugu ua ma a fanaa hamuꞌou fei tao harenua.

11 Hini na paꞌi adiana nei guainaa tamanu na wareia fei Spiriti aꞌa ei losuu. Aꞌa hini i mua, lomi ba i fagiana aꞌa fei faguapoaa maꞌea.

Siꞌeni eni wareaa mei na paꞌi fei wararoa wadu, fei guapapa umuna. 13 Una apaꞌia ba hamona guta hitani—fawelei na ude wagina fei gutanaa Satan, gutaa hapara. Maꞌuaa hamona oafagugu aꞌa fei harau. Lomi hamona farapa aꞌa fei narafaweꞌiaa hamuꞌou aꞌau ma i aꞌa fei au Antipas anaa, mei na oafagugu uaa yau, mei rona foꞌafamaꞌeia aꞌa fei baua gufuu hamuꞌou—fawelei na guta wagina Satan.

14 Maꞌuaa na paꞌi hefiꞌa tataa hamuꞌou i pudau: Hamona paꞌi hefiꞌa ramaꞌa yena rona neneraa fei feroiaa Balaam, mei na feroinaa Balak ba nei susuaninaa ei Israel hafeloꞌa wagii ei hanaiaa roꞌou ei duꞌua rona fanaa ei haidaa sifisifi ma ana roi fitatafipaꞌai ua anaa. 15 Hepalodiai, hamona paꞌi hefiꞌa rona neneraa ei feroiaa ei Nicolatia. 16 Siꞌei, hamonei filoginaa naranaraa hamuꞌou! Nabaa lomi, awe nobatafamai aꞌa hamuꞌou ma foꞌa aꞌa roꞌou wagii fei waduu fei poau.

17 Hini na paꞌi adiana nei guainaa tamanu na wareia fei Spiriti aꞌa ei losuu. Aꞌa hini i mua, a fania hefiꞌa manna na udeꞌopaꞌai. Ana a fania fei mugoo na poꞌi, fei ina paꞌi hepalo manufau hara na neꞌi pafona, fei uniaa mei na tonia na aida.

Siꞌeni eni wareaa mei naꞌuu mei Haidaa, mei guei pudana na aleꞌei nalenaleaa hafi, mei guei pinena na mareꞌa aleꞌei bronze. 19 Una apaꞌidigaa ei bigiꞌaa hamuꞌou, fei hagua, fei narafaweꞌia, fei roaiaa pani, fei apitaia ma ei bigiꞌaa hamuꞌou eni, ei na mua laraa famaꞌa.

20 Maꞌuaa hamona paꞌi hepalo tata i pudau: Hamona fafanefaneaa mei pifine Jezebel, mei na ware ba hia mamamaꞌa. Aꞌa ei feroiana ina susuaninaa ei nafiu wagii fei fitatafipaꞌaia ma hanaiaa ei duꞌua, ei rona fanaa ei haidaa sifisifi. 21 Una fanidii auna ba nei filoginaa naranarana wagii ei mau hafeloꞌana, maꞌuaa, lomi na nunumiai. 22 Siꞌei, a suminia pafoo fei tawaa fiꞌia ma ei rona fiharoharoipaꞌai aꞌana roꞌapaꞌamina nanamuinia hawina rona filoginaa naranaraa roꞌou wagii ei maumau mei pifine mei. 23 Awe foꞌafamaꞌeaa ei naꞌuna. Ma aꞌa fei, minaa ei losuu roꞌaa apaꞌau ba yau mei a fanunuꞌapaꞌaa laloo ia ma naranaraa ei ramaꞌa ma a fani ponoꞌaa hememea hamuꞌou aleꞌei ei bigiꞌaa hamuꞌou. 24 Ma a warenaa aꞌa hamuꞌou ena dufu yena Thyatira, ena lomi hamona panarofaa ei feroiana ma lomi na to apaꞌa aꞌa ei feroiaa Satan, ei rona ware ba namina walalo (lomi a faꞌawatainaa hamuꞌou aꞌa hepalodiai manumanu): 25 Maꞌuaa hamonei panarofaweꞌi aꞌa tamanu hamona paꞌi nopaꞌaloo fei noramiau.

26 Hini i mua ma bigiꞌaa fei nunumiau nopaꞌaloo fei pedupeduna, a fania fei forafora aꞌa ei baua gufu—