REVELATION
Rawarawa Warea
1
Fei faꞌaꞌarewaa Jesus Christ, fei na fania mei Haidaa ba inei famaꞌaa ei nafina ba tamanu anaa i nomai. Ina faꞌarewaia ei i aloaa mei aloꞌalona dinaa aꞌa mei nafina John, 2 mei i uꞌugaa minaa ei na fanunuia—sifei, fei wareaa mei Haidaa ma fei uꞌugaa Jesus Christ. 3 Ina paꞌi hawegiana mei i igoaa ei paolaa warea aꞌa feni diwareꞌauga ma na paꞌi hawegiaa ei rona guainia ma fabaroronaa iaa roꞌou fei neꞌia wagina, uaa fei au na rafiꞌi.Warea aꞌa ei Olorompalo Losuu
4 Yau John.
A neꞌinaa aꞌa ei olorompalo losuu laloo fei baua gufu Asia:
Fei rawaniꞌa ma fei gutafarawania i dinaa aꞌa hamuꞌou noranamai aꞌa mei fi oa eni, mei na oa mina, mei ba i nomai mawe ei olorompalo spiritia inamoaa fei gutanana, gutaa hapara, 5 ma ana noranamai aꞌa Jesus Christ, mei na wewea uꞌugaa ei na fanunuia, mei umaꞌua waninia aꞌa ei maꞌea, mei famamoaa ei haparaa feni malagufu.
I aꞌa mei na haguaa oꞌou ma alaraa oꞌou aꞌa ei hafeloꞌa wagii fei namona 6 ba onei oa aꞌa fei haparaiana aleꞌei ei bauaniaa humuu mei Haidaa ba oꞌou paniaa panii mei Haidaniana, mei Amana—i aꞌana i ude fei hawera ma fei faufau ranimai ranimai! Amen.
7 Maꞌa, ifi nomai wagii ei papalei,
ma minaa ei puda roꞌaa fanunuia,
ma ei rona fatawaia anaa;
ma minaa ei ramaꞌaa feni malagufu rowe faloloaꞌi uaa hia.
Ipowe aleꞌei! Amen.
8 Mei Fasu, mei Haidaa, na ware ba, “Yau fei Alpha ma fei Omega, mei fi oa eni, mei na oa mina, mei ba iwe nomai, mei Faufaua.”
Hemea Aleꞌei Naꞌuu Ramaꞌa
9 Yau, John, meni lofu ma tafii hamuꞌou aꞌa fei fiꞌia, fei haparaia ma fei apitaia, eꞌei ona paꞌi aꞌa Jesus. Yau yei aꞌa fei gufu Patmos uaa fei wareaa mei Haidaa ma fei uꞌugaa Jesus. 10 Na pasiau fei Spiriti aꞌa fei Arewaa mei Fasu ma una guainaa hefaa baua lao aleꞌei hepalo aigaa maniwa neneu 11 ma ina ware: “Neꞌi pafoo hepalo holobenaa tamanu ona fanunuia ma aloia aꞌa ei olorompalo losuu yei Ephesus, Smyrna, Pergamum, Thyatira, Sardis, Philadelphia ma Laodicea.”
12 Una momoꞌai ba a maꞌa ba hini mei fi warewaremai aꞌau. A diarai, na fanunupaꞌaa olorompalo udeꞌudee weꞌai, paꞌafina gold 13 ma i watolaa ei udeꞌudee weꞌai hemea ramaꞌa “maumauna aleꞌei naꞌuu ramaꞌa,” hawaa uguna na malanaa pinena ma na paꞌi aleꞌei adii niniwaina, paꞌafina gold. 14 Fei tabana mawe ei loaa tabana aleꞌei hugoo sipsipi namina poꞌi malewa ma guei pudana aleꞌei nalenaleaa hafi. 15 Guei pinena aleꞌei bronze na ro laloo fei hafi ma fei laona aleꞌei memeꞌaiaa mamaua. 16 Aꞌa fei panina raudei maꞌau na panarofaa olorompalo piꞌu ma na leleꞌamai poana hepalo wadu guapapa umuna ma namina wararo. Fei pudaa mei, aleꞌei fei halo na weꞌanaꞌinaꞌi.
17 Uꞌa fanunuia, na pasi oꞌigoana aleꞌei hemea maꞌea. Ma ina augaa fei panina pepei maꞌau pafou ma ware: “Apuna maꞌau. Yau mei Rawarawa ma ana mei Mugi. 18 Yau mei na Oalao; una maꞌe famaꞌa. Fanunu, una oa ranimai ranimai! Ma uꞌei panarofaa ei gigigii fei maꞌea ma Hades.
19 “Siꞌei, onei neꞌinaa tamanu ona fanunuia, tamanu aꞌa feni wagieni ma tamanu i nomai nefarani. 20 Fei manumanu opaꞌaia wagii ei olorompalo piꞌu, ei ona fanunuia i aꞌa fei paniu pepeni maꞌau mawe ei olorompalo udeꞌudee weꞌai sifeni: Ei olorompalo piꞌu, oloromea aloꞌalob aꞌa ei olorompalo losuu ma ei olorompalo udeꞌudee weꞌai, ei olorompalo losuu.