Fihawawagimaꞌaiaa ei Spiriti
4
Ena rawaniꞌa tafiu, apuna nara ba minaa ei spiriti, minaa faꞌua, maꞌuaa hamonei fihawawagimaꞌaiaa roꞌou ba afaia noranarai aꞌa mei Haidaa, uaa watauda mamamaꞌa sifisifi, rona tatalai yeni malagufu. 2 Hamoꞌaa apaꞌia ba fei Spiritii mei Haidaa, aleꞌeni: fei spiriti, fei na ware ba Jesus Christ na paꞌi pigiona, noranarai aꞌa mei Haidaa, 3 maꞌuaa fei spiriti lomi na ugainaa Jesus, abaa norai aꞌa mei Haidaa. Hefei, spiritii mei na fadugeaa Christ, hefei spiriti hamona guaidigia ba iwe nomai ma eꞌeni na oadii yeni malagufu. 4 Ena rawaniꞌa baduu, hamuꞌou norai aꞌa mei Haidaa ma hamona muaidigaa roꞌou aleꞌei, uaa mei i oa laloo iaa hamuꞌou na faufaudiai laraa mei na oa yeni ano. 5 Noramiaa roꞌou yeni ano ma siꞌei, roꞌaa wareaa ei naranaraa feni ano. Ma ei ramaꞌaa fei ano, rona guainaa roꞌodu. 6 Oꞌou norai aꞌa mei Haidaa ma mei na apaꞌaa mei Haidaa i guainaa oꞌodu, maꞌuaa mei lomi na apaꞌaa mei Haidaa, ana lomi i guainaa oꞌou. Aleꞌei, oꞌaa fanunuꞌapaꞌia ba fei, faꞌua Spiriti,a ma fei, sifisifi spiriti.
Fei Haguaa mei Haidaa ma fei Haguaa Oꞌou
7 Ena rawaniꞌa tafiu, onei fihaguinaa hememea oꞌou, uaa fei hagua noranarai aꞌa mei Haidaa. Mei i paꞌi hagua, na waninidiai aꞌa mei Haidaa ma na apaꞌaa mei Haidaa. 8 Mei lomi na paꞌi hagua, ana lomi na apaꞌaa mei Haidaa, uaa mei Haidaa ana fei hagua. 9 Mei Haidaa na famaꞌaiaa oꞌou fei haguana aleꞌei: Ina paꞌi hemea ua Naꞌunab ma na alonagii hia yeni malagufu ba oꞌaa to harenua aꞌana. 10 Sifeni feni paꞌaa hagua: aꞌa ba ona haguaa mei Haidaa, maꞌuaa mei Haidaa na haguaa oꞌou ma na aloagii mei Naꞌuna ba nei maꞌe ma ponoꞌaac ei hafeloꞌaa oꞌou ba i fawanewaneaa watolaa oꞌou ma mei Haidaa. 11 Ena rawaniꞌa tafiu, siꞌei ba mei Haidaa na haguaa oꞌou aleꞌei, ana onei fihaguinaa hememea oꞌou. 12 Lomi hemea na maꞌa mei Haidaa, maꞌuaa nabaa oꞌaa fihaguinaa hememea oꞌodu, mei Haidaa i oafipui aꞌa oꞌodu ma fei haguana i gugu warana aꞌa oꞌou.
13 Ona aida ba ina oa laloo iaa oꞌodu ma oꞌou i aꞌana, uaa ina fanaa oꞌou fei Spiritina. 14 Ma haiꞌouna fanunuia ma uꞌugia ba mei Ama na alodigaree mei Naꞌuna ba nei fatelaꞌanaa eni ramaꞌaa malagufu. 15 Hini na uga ba Jesus, hia Naꞌuu mei Haidaa, mei Haidaa na oa laloo iana ma hia aꞌa mei Haidaa. 16 Ma siꞌei, ona aida fei haguaa mei Haidaa ma fapapanai wagina.
Mei Haidaa, ana fei hagua. Hini na tatalai fininaa fei hagua na oafipui aꞌa mei Haidaa ma mei Haidaa ana na oafipui aꞌana. 17 Aꞌa fei, ona aida ba ei waraa fei hagua napaꞌaa gugu aꞌa oꞌou. Ma siꞌei, owe u faweꞌi laloo fei arewaa dududua, uaa yeni malagufu, ei maumau oꞌou, ana aleꞌei maumauna. 18 Wagii fei hagua, lomi maꞌaua, uaa fei paꞌaa hagua na siminaa fei maꞌaua, uaa fei maꞌaua na nofipuimai aꞌa fei fagianaa. Hini na mamaꞌau, atawe gugu ei waraa fei haguana.
19 Ona paꞌi fei hagua, uaa inadoꞌo haguaa oꞌou. 20 Mei i ware ba, “Yau, na haguaa mei Haidaa,” sifiꞌana nabaa na bidibidi ununa aꞌa mei lofuna. Uaa hini lomi na haguaa mei lofuna, mei hia na fanunuia, batanai ba i haguaa mei Haidaa, mei lomi na fanunupaꞌia? 21 Ma ina fanaa oꞌou feni wareana feni: Hini i haguaa mei Haidaa, neipaꞌaa haguaa mei lofuna anaa.