4 Hini i bigiꞌaa ei hafeloꞌa na barafeaa fei law; uaa ei hafeloꞌa lomi na neneraa fei law. 5 Hamona aida ba eni i nogio ba i futoaa ei hafeloꞌaa oꞌodu. Ma i laloo iana lomi hepalo hafeloꞌa. 6 Lomi hemea i oa aꞌana ma iꞌu bigiꞌuaiaa ei hafeloꞌa. Hini iꞌu bigiꞌuaiaa ei hafeloꞌa, lomi na fanunuia ma ana lomi na apaꞌia.

7 Ena rawaniꞌa baduu, lomi na rawani ba nemea i faꞌateteaa hamuꞌou ma dugifarauaninaa hamuꞌou. Mei i bigiꞌaa ei na wanewane, hia na wanewane ana aleꞌei hia na wanewane. 8 Hini i bigiꞌaa ei hafeloꞌa na oa aꞌa mei haniꞌu uaa rawarawa ma nopaꞌamii eꞌeni mei haniꞌu na bigiꞌaa ei hafeloꞌa. Fei paꞌafii fei noramii mei Naꞌuu mei Haidaa ba i fapedugaa ei bigiꞌaa mei haniꞌu. 9 Mei i waninidiai aꞌa mei Haidaa, lomi iꞌu bigiꞌuaiaa ei hafeloꞌa uaa fei maumau mei Haidaa na oa i laloo iana; lomi na hawia ba iꞌu bigiꞌaa ei hafeloꞌa uaa ina waninidiai aꞌa mei Haidaa. 10 Aleꞌei, oꞌou aida ba eꞌei, naꞌuu mei Haidaa ma eꞌei, naꞌuu mei haniꞌu: Hini lomi i bigiꞌaa ei na wanewane, hia abaa naꞌuu mei Haidaa; ma hini lomi i haguaa mei lofuna, hia ana abaa naꞌuu mei Haidaa.

11 Sifeni, feni warea hamona guainia famaꞌamaꞌa: Onei fihaguinaa hememea oꞌou. 12 Hamoneiꞌaa aleꞌei Cain, mei maroaa mei hafeloꞌa. Ina foꞌafamaꞌeaa mei lofuna. Ma tani i foꞌafamaꞌeia? Hamatee na hafelo ei bigiꞌana ma na wanewane ei bigiꞌaa mei lofuna. 13 Ena lofuu, hamoneiꞌaa baꞌarofo nabaa na bidibidi unuu feni ano aꞌa hamuꞌou. 14 Ona aida ba ona diꞌinidigaa fei maꞌea ma dinaa aꞌa fei harenua, uaa ona haguaa ei lofuu oꞌodu. Hini lomi na paꞌi fei hagua ana fi oa aꞌa fei maꞌea. 15 Mei i bidibidi ununa aꞌa lofuna, hia aleꞌei hemea i foꞌafamaꞌe ramaꞌa ma hamona aida ba mei ramaꞌa alemei, lomi i paꞌi fei harenua lomi i pedutoo.

16 Oꞌouna aida fei hagua aleꞌei: Jesus Christ na fanaa fei harenuana aꞌa oꞌodu. Ma oꞌodu, ana onei fanaa fei harenuaa oꞌou aꞌa ei lofuu oꞌou. 17 Ma nabaa nemea na paꞌi hefiꞌa manumanu ma na fanunuꞌapaꞌia ba mei lofuna na gutafafelo ma na ofadugia, fei haguaa mei Haidaa paꞌaa lomi i aꞌana. 18 Ena rawaniꞌa baduu, fei paꞌaa hagua abaa manumanuu warewarea ua. Onei haguaa ei lofu fininaa bigiꞌa wagii tamanu na faꞌuai. 19 Ma wagii fei, ona aida ba ona oafipui aꞌa fei faꞌuaia ma fapapaiaa fei naranaraa oꞌou inamoana 20 ena ona naranara ba ona hafelo. Uaa mei Haidaa na bauanadiai laraa ei naranaraa oꞌou ma na apaꞌidigaa minaa ei manumanu.

21 Ena rawaniꞌa tafiu, nabaa fei naranaraa oꞌou lomi na dududuaa oꞌou, te, na paꞌi oꞌugaa oꞌou aꞌa mei Haidaa 22 ma tonaa tamanu ona iꞌiginia aꞌana, uaa ona neneraa ei wareana ma bigiꞌaa ei nunumiana. 23 Ma sifeni, feni wareana: onei narafaweꞌi aꞌa fei haraa mei naꞌuna, Jesus Christ ma fihaguinaa hememea ana aleꞌei ei wareana aꞌa oꞌou. 24 Ena rona guainaa ei wareana, rona oafipui aꞌana ma ana na oafipui aꞌa roꞌou. Ma oꞌou apaꞌia ba ina oafipui aꞌa oꞌou aꞌa fei Spiriti uaa fei fanana oꞌou.