3 Onapaꞌaa aida ba oꞌaa apaꞌia nabaa oꞌaa neneraa ei wareana. 4 Mei i ware ba, “Yau na apaꞌia,” maꞌuaa lomi na neneraa ei wareana, hia paꞌaa sifisifi ma fei faꞌuaia lomi laloo iana. 5 Maꞌuaa hini i neneraa fei wareana, fei haguaa mei Haidaa^b napaꞌaa gugu ei warana aꞌana. Aleꞌei, onawe aida ba oꞌou i aꞌana: 6 Hini i ware ba hia na oafipui aꞌana, inei tatalai ana aleꞌei tatalaiaa Jesus.

7 Ena rawaniꞌa tafiu, aꞌa ba uꞌei neꞌinaa hepalo manufau warea, maꞌuaa feni warea na udedii ma hamona guaidigia famaꞌa. 8 Maꞌuaa ana uꞌei neꞌifanaa hamuꞌou ana aleꞌei hepalo manufau warea. Fei faꞌuaia wagii fei na arewa aꞌana mawe hamuꞌou. Uaa fei roromaa ifi dii eꞌeni ma fei paꞌaa weꞌai ifi weꞌa eꞌeni.

9 Hini i ware ba hia laloo fei weꞌai, maꞌuaa na bidibidi ununa aꞌa mei lofuna, ana fi oa laloo fei roromaa eꞌeni. 10 Hini i haguaa mei lofuna, ina oa laloo fei weꞌai ma lomi hepalo manumanu aꞌa mei^c i faꞌalabeꞌia. 11 Maꞌuaa hini na bidibidi ununa aꞌa mei lofuna, ina oa ma tatalai laloo fei roromaa; lomi ina aida ba i dinaia, uaa fei roromaa na tapuꞌaa pudana.

15 Apuna haguaa feni ano, o hepalo manumanu wagina. Nabaa nemea na haguaa feni ano, fei haguaa mei Ama, lomi i laloo iana. 16 Uaa minaa ei manumanuu feni ano, aleꞌei fei nunumiaa unu, fei nanamaia puda ma fei mamaguguaa hemea wagii ei bigiꞌana ma ei hapena—abaa noranarai aꞌa mei Ama, maꞌuaa noranamai aꞌa feni ano. 17 Feni ano ma ei nunumiana, roꞌaa pedu, maꞌuaa mei i bigiꞌaa ei nunumiaa mei Haidaa, i minaa oa ranimai ranimai.

18 Ena rawaniꞌa baduu, wagieni, feni aꞌapoo au; ma hamona guaidigia ba ifi nomai mei Fadugeaa Christ. Ma nopaꞌamii wagieni na nodigimai watauda rona fadugeaa Christ. Siꞌei, o aida ba feni, aꞌapoo au. 19 Rona itaꞌadiꞌininaa oꞌou, uaa roꞌodu, abaa paꞌaa maroaa oꞌou. Nabaa roꞌou paꞌaa maroaa oꞌodu, roꞌaa oafipui aꞌa oꞌou; maꞌuaa fei aunuaa roꞌou na famaꞌaia ba lomi hemea roꞌou ba hia maroaa oꞌodu.

20 Maꞌuaa mei Apunaia na papaditainaa hamuꞌou ma siꞌei minaa hamuꞌou na aida fei faꞌuaia.^d 21 Eni a neꞌinaa aꞌa hamuꞌou, aꞌa ba lomi hamona aida fei faꞌuaia, maꞌuaa ba hamona aidadii fei faꞌuaia. Ma lomi hepalo sifisifi na leleꞌamai wagii fei faꞌuaia. 22 Hini mei sifisifi? Ana mei i ware ba Jesus abaa Christ. Mei ramaꞌa aleꞌei, hia na fadugeaa Christ—ina fadugeaa mei Ama ma mei Naꞌu. 23 Uaa hini na ofadugaa mei Naꞌu, ana na ofadugaa mei Ama ma hini i ugainaa mei Naꞌu ana na paꞌi mei Ama.

24 Hamoneimina omaꞌamaꞌaa tamanu guaiaa hamuꞌou famaꞌa ba nei oa i laloo iaa hamuꞌou. Nabaa fei warea na oa i aꞌa hamuꞌou, ana hamona oa aꞌa mei Naꞌu ma mei Ama. 25 Ma sifeni, feni faꞌunaiana aꞌa oꞌou ba owe paꞌi harenua lomi i pedutoo.

26 Uꞌei neꞌinaa eni manumanu eni aꞌa hamuꞌou uaa na paꞌi hefiꞌa ba roꞌaa faꞌateteaa hamuꞌou ma dugifarauaninaa hamuꞌou. 27 Fei papaditaia hamona tonia aꞌa Christ na oa i aꞌa hamuꞌou. Ma lomi hamona nunumidinaa nemea ba i feroinaa hamuꞌou. Maꞌuaa fei papaditaiana i feroinaa hamuꞌou minaa ei manumanu ma fei papaditaia fei, paꞌaa faꞌua, abaa sifisifi. Ma ana aleꞌei i feroinaa hamuꞌodu, hamonei oa i aꞌana.

28 Ma eni, ena rawaniꞌa baduu, hamonei oaꞌualao i aꞌana, uaa ena ina nomai, owe paꞌi oꞌugaa oꞌou ma lomi oꞌawe mamafa i maꞌana.

29 Hamona aida ba hia na wanewane ma siꞌei ana hamonei aida ba mei i bigiꞌaa ei na wanewane na waninidii aꞌana.