1 JOHN
Fei Wareaa Harenua
1
Haiꞌouꞌaa uꞌugaa mei na oa farawarawa, mei haiꞌouna guaiꞌaraia, mei haiꞌouna maꞌaia ma ei panii haiꞌou na panarofia. Ma mei haiꞌouna uꞌugia, hia ana fei wareaa harenua. 2 Fei harenua fei, nawe arewa. Haiꞌouna fanunuia ma ufugia ma warefanaa hamuꞌou fei harenua lomi i pedutoo, fei na oafipui aꞌa mei Ama, fei nawe arewa aꞌa haiꞌou. 3 Haiꞌou warefanaa hamuꞌou tamanu haiꞌouna fanunuia ma guainia ba hamonei oafipui aꞌa haiꞌodu mawe mei Ama ma mei Naꞌuna, Jesus Christ. 4 Haiꞌouna neꞌifanaa hamuꞌou ba fei niꞌeniꞌeaa oꞌoua imina apoidiai.Tatalai wagii fei Weꞌai
5 Sifeni, feni warea haiꞌouna guainia aꞌana ma warefanaa hamuꞌou: mei Haidaa ana fei weꞌai ma i aꞌana paꞌaa lomi maꞌida roromaa. 6 Nabaa oꞌaa ware ba ona oafipui aꞌana, maꞌuaa ana oifi tatalai wagii fei roromaa, oi warefasifi ua ma lomi ona talai wagii fei faꞌuaia. 7 Maꞌuaa siꞌei ba hia na oa wagii fei weꞌai, nabaa oꞌaa tatalai wagii fei weꞌai ana aleꞌei hia, ona gutafirawanii ma fei namoo Jesus, mei Naꞌuna na fafafaꞌarainaa oꞌou aꞌa minaa eib hafeloꞌa.
8 Nabaa oꞌaa ware ba lomi hafeloꞌaa oꞌodu, oi sifiꞌaa ana oꞌou ma fei faꞌuaia lomi laloo iaa oꞌou. 9 Maꞌuaa nabaa oꞌaa warefania ei tataa oꞌou, siꞌei ba ina oafagugu ma na wanewane, iwe futoaa ei hafeloꞌaa oꞌou ma fafafaꞌarainaa oꞌou aꞌa minaa ei manumanu lomi na wanewane. 10 Nabaa oꞌaa ware ba lomi ona bigiꞌaa ei hafeloꞌa, hanuna ba hia fi sifi ba ona hafelo ma fei wareana, lomi udeana laloo iaa oꞌou.