Fei Narafaweꞌia aꞌa mei Naꞌuu mei Haidaa
5
Hini i uga ba Jesus hia mei Christ, waninianamai aꞌa mei Haidaa. Ma hini i haguaa mei Ama ana nei haguaa hini ramaꞌa na waninidiai aꞌana. 2 Ona aida ba ona haguaa ei naꞌuu mei Haidaa uaa ona haguaa mei Haidaa ma bigiꞌaa ei wareana. 3 Hefei ba ona haguaa mei Haidaa: sifei ba oꞌaa guainaa ei wareana. Ma ei wareana, lomi na rata.Faꞌuaia ma Hagua
4 Uaa hini i waninimai aꞌa mei Haidaa na muainaa feni ano. Fei faufau, fei na muainaa feni ano, sifeni ba onei narafaweꞌi. 5 Hini na muainaa feni ano? Unaa mei i narafaweꞌi ba Jesus, hia Naꞌuu mei Haidaa.
6 Simeni, meni i nomai aꞌa fei ranu ma fei namo, meni Jesus Christ. Lomi ina nomai aꞌa fei ranu ua, maꞌuaa na nomai aꞌa fei ranu ma fei namo. Ma fei Spiriti na uꞌu, uaa fei Spiriti ana fei faꞌuaia. 7 Uaa, odumanuei, rona uꞌu: 8 fei Spiriti,a fei ranu ma fei namo; ma odumanuei, uꞌugaa roꞌou, minaa heai. 9 Oꞌaa tonaa uꞌugaa ramaꞌa, maꞌuaa fei uꞌugaa mei Haidaa, na mua, uaa fei uꞌuga fei, noranarai aꞌa mei Haidaa ma na uꞌugaa mei Naꞌuna. 10 Hini i narafaweꞌi aꞌa mei Naꞌuu mei Haidaa, ina paꞌi feni uꞌuga laloo iana. Hini lomi na nara ba faꞌua fei wareaa mei Haidaa, hanuna aleꞌei ba mei Haidaa, sifisifi. Uaa lomi na nara ba paꞌaa faꞌua fei uꞌugaa mei Haidaa mei Naꞌuna. 11 Ma sifeni, feni uꞌuga: mei Haidaa na fanaa oꞌou fei harenua lomi i pedutoo. Ma fei harenua fei na nofipuimai aꞌa mei Naꞌuna. 12 Hini na paꞌi mei Naꞌu, ana na paꞌi fei harenua; hini lomi na paꞌi mei Naꞌuu mei Haidaa, ana lomi na paꞌi fei harenua.
Harenua Lomi i Pedutoo
13 Uꞌei neꞌinaa eni manumanu eni aꞌa hamuꞌou, ena hamona narafaweꞌi aꞌa fei haraa mei Naꞌuu mei Haidaa ba hamonei aida ba hamona paꞌi fei harenua lomi i pedutoo. 14 Fei oꞌuga ona paꞌi ei o nofarafiꞌinaloo mei Haidaa, sifei ba: nabaa oꞌaa iꞌiginaa hepalo manumanu na neneraa fei nunumiana, i guainaa oꞌou. 15 Ma nabaa ona aida ba ina guainaa tamanu iꞌigaiaa oꞌou, te, ona aida ba oꞌaa tonia aꞌana.
16 Nabaa nemea, i fanunuaa mei lofuna na bigifatata, hepalo tata lomi i notonaa hia maꞌea, inei lafulafu ma mei Haidaa i fani harenuaa mei lofu mei. Uꞌei wareaa ei rona bigifatata, maꞌuaa ei tataa roꞌou, lomi na notonaa roꞌou maꞌea. Ina paꞌi hepalo tata ba na paꞌi maꞌea wagina. Aꞌa ba uꞌei ware ba inei lafulafu wagii fei. 17 Minaa ei tata na hafelo, maꞌuaa hefiꞌa tata, lomi na paꞌi maꞌea wagina.
18 Ona aida ba mei waninidianamai aꞌa mei Haidaa, lomi iꞌu bigiꞌuaiaa ei hafeloꞌa. Mei umaꞌua waniniamii mei Haidaa iwe omaꞌaia ma mei hafeloꞌa, lomi i fafelopaꞌia. 19 Ona aida ba oꞌou, naꞌuu mei Haidaa ma minaa feni ano na oa haroo mei hafeloꞌa. 20 Ana ona aida ba mei Naꞌuu mei Haidaa na nodimai ma fani apaꞌaa oꞌodu ba onei apaꞌaa mei na faꞌuai. Ma ona oa aꞌa mei faꞌuaia ma mei naꞌuna Jesus Christ, mei paꞌaa Haidaa, ana fei harenua lomi i pedutoo.
21 Ena rawaniꞌa baduu, hamoneiꞌaa oa aꞌa ena haidaa sifisifi ma wagiꞌinaa hamuꞌou.