Mei Haidaa, Hia fei Paꞌafii fei Gutanamu
4
Siꞌei ba Christ na to fiꞌia wagii fei hudi ununa, hamonei ofafaufau aꞌa fei maumau fei, uaa hini na tonaa fiꞌia wagii fei hudi ununa na muainaa ei maumau hafeloꞌa. 2 Siꞌei, fei gutananalao yeni malagufu, lomi ba i bigiꞌaa ei hafeloꞌa nunumiaa unu, maꞌuaa ba i bigiꞌaa ei nunumiaa mei Haidaa. 3 Uaa famaꞌa hamona fanimaꞌaa tamanu rona bigiꞌia ei roromaa—ei maumau loloaa naranara, laraa huwi, hunu poapoai, hamamani, labarainaa ei hafeloꞌa ma fei hafeloꞌa mau losuiaa ei sifisifi haidaa. 4 Lomi rona aida ba tani lomi hamona neneraa roꞌou aꞌa eꞌei hafeloꞌa eꞌei ma rona warefafeloꞌuaa hamuꞌou. 5 Maꞌuaa ropowe u i maꞌaa mei ba i dududuaa ei rona werawera mawe ei maꞌea. 6 Ma ei rona maꞌe, ana ronadii guai fei rawaniꞌa warea siꞌei ei hudi unuu roꞌou ana i to dududua, maꞌuaa wagii ei spiritii roꞌou, ronei neneraa ei nunumiaa mei Haidaa. 7 Fei iaꞌiai minaa ei manumanu na rafiꞌi. Siꞌei, inei arewa ei naranaraa hamuꞌou ma hamonei utofaꞌainaa ana hamuꞌou ba hamuꞌou lafulafupaꞌi. 8 Ma pafoo minaa ei manumanu, hamoneimina fihagui, uaa fei hagua i fuaꞌonaa watauda ei mau hafeloꞌa. 9 Taufagutanaa hefiꞌadiai ma apuna bababauꞌu wagina. 10 Hememea nei biginaa tamanu fana ina tonia ba i hadumaa hefiꞌa ma nei wewea fanaa ei maumau rawaniꞌaa mei Haidaa. 11 Hini ba i ware, inei ware aleꞌei banaꞌaa paꞌaa wareaa mei Haidaa. Hini ba i hadumaa ramaꞌa inei bigi fininaa fei faufau na fania mei Haidaa ba wagii minaa ei manumanu inei paꞌi udugia mei Haidaa uaa Jesus Christ. I aꞌana inei paꞌi hawera ma faufau ranimai ranimai. Amen.
Ei Fiꞌia wagii fei Neneramu Christ
12 Ena tafiu, apuna baꞌarofoa aꞌa fei fiꞌia na nofininamii fei manimania, fei hamoꞌei guta wagina eꞌeni. Abaa uꞌugai manumanu fei na nomai aꞌa hamuꞌou. 13 Maꞌuaa hamonei niꞌeniꞌe ba hamona tonaa fiꞌia uaa Christ ba hamoꞌamina unuwenuwe ena na faꞌarewamai fei hawerana. 14 Nabaa rona warefafeloaa hamuꞌou uaa fei haraa Christ, hamona paꞌi hawegia uaa fei Spiritii fei hawera ma mei Haidaa na oa pafoo hamuꞌou. 15 Nabaa hamoꞌaa to fiꞌia, fei paꞌafina, ineiꞌaa ba ona foꞌafamaꞌe, o topaꞌai, o bigiꞌaa hepalodiai manitoai hafeloꞌa, o fei maumau nigoaa ei pidawaiaa hefiꞌa. 16 Maꞌuaa, nabaa ona to fiꞌia uaa yoi Christian, apuna mamafa. Onei uduginaa mei Haidaa ba ona paꞌi fei hara fei. 17 Uaa fei dududua neidoꞌo asiꞌaa aꞌa ei maroaa mei Haidaa; ma nabaa oꞌou rawarawa, poꞌo batanaidiai aꞌa ei lomi rona neneraa fei rawaniꞌa wareaa mei Haidaa? 18 Ma,
“Nabaa na waiwai ba roꞌaa tela ei wanewanea,
poꞌo batanaidiai aꞌa ei lomi rona paꞌi
fei maumau mei Haidaa mawe ei hafeloꞌa?”
19 Siꞌei, ei rona to fiꞌia aꞌa fei nunumiaa mei Haidaa, ronei oafagugu aꞌa mei Famamaraia, mei na oafagugu ma ronei bigifarawaniꞌualao aleꞌei.