Ei Bauaniaa Losuu mawe ei Baubara
5
Aꞌa ena bauaniaa fei losuu i dupuaa hamuꞌou, uꞌei iꞌigifaweꞌi aꞌa hamuꞌou hamatee yau ana hemea bauana, hemea na fanunupaꞌaa ei fiꞌiaa Christ ma ana ba a oa fininaa fei hawera fei iwe arewamai: 2 Hamonei aleꞌei omaꞌamaꞌaa ei sipsipi. Hamonei omaꞌaa fei maroaa mei Haidaa, fei na ude panii hamuꞌou ma paꞌafina aꞌa ba hamonei bigiꞌia maꞌuaa paꞌaa noranamai naranaraa hamuꞌou aleꞌei i nunuminia mei Haidaa; neiꞌaa wawaꞌai poaa hamuꞌou aꞌa ei mugoo poꞌi, maꞌuaa hamonei refuhadumaa ramaꞌa; 3 hamoneiꞌaa faꞌaguꞌagui aꞌa ena rona udenaa panii hamuꞌou, maꞌuaa hamonei aleꞌei famaꞌamaꞌa aꞌa fei maroa fei. 4 Ma ena na nofaꞌarewamai mei Bauaniaa Omaꞌaa ei Sipsipi, hamopowe tonaa fei tao fei hawera, fei lomi i paꞌaitoo.5 Hamuꞌou ena baubara, ana aleꞌei hamonei fafefefanaa ei bau. Minaa hamuꞌou, hamonei fifamamadumui, uaa
“Mei Haidaa na fadugeaa ei rona mamagugu,
maꞌuaa ina fani rawaniꞌa aꞌa ei rona famadumui.”
6 Siꞌei, famadumuinaa ana hamuꞌou haroo fei faufau fei panii mei Haidaa ba inei taufaꞌugaa hamuꞌou ena na nopaꞌaloo fei paꞌaa au. 7 Fifaninaa panina minaa ei awataa hamuꞌou, uaa inapaꞌaa naranaraiaa hamuꞌou.
8 Hamonei utofaꞌainaa hamuꞌou ma ofafaufau. Mei haniꞌu, mei na fabidinaa ununa hamuꞌou na tatapa aleꞌei hepalo lion ba i taduꞌonomaa hamuꞌou. 9 Fadugeia ma ufaweꞌi wagii fei narafaweꞌia, uaa hamona aida ba ei lofuu hamuꞌou tadiweꞌaiaa feni ano, ana roi tonaa fiꞌia ana aleꞌei hamuꞌou.
10 Ma mei Haidaniaa minaa ei rawaniꞌa fana, mei na lalaꞌaa hamuꞌou ba hamonei oalao fipui aꞌa Christ wagii fei hawerana lomi i pedutoo, nenee fei fiꞌiaa hamuꞌou, fei lomi i udefamadii, iwe farawanidinaa hamuꞌou ma faweꞌinaa hamuꞌou ba hamonei faufaudiai ma ufawegipaꞌi. 11 I aꞌana i ude fei faufau ranimai ranimai. Amen.
Ei Aꞌapoo Warea
12 Silas,a mei una nara ba hia rawaniꞌa lofuu, ina hadumau aꞌa maꞌideni neꞌiau ba a faꞌunuwenuweaa hamuꞌou ma warefaꞌuai ba feni neꞌia na faꞌarewaiaa fei rawaniꞌaa mei Haidaa ma hamonei ufaweꞌi wagina.
13 Ei narafaweꞌia yei Babylon, ei rona rafei fipui aꞌa hamuꞌou Mark, mei aleꞌei naꞌuu, rona aloawii fei famafufuoiaa roꞌou aꞌa hamuꞌou. 14 Fifamafufuoinii aꞌa fei hatofaa puda fininaa hagua.
Fei gutafarawania na ude aꞌa minaa hamuꞌou ena hamona oafipui aꞌa Christ.