Pifine ma Wawane Haroo Lalai
3
Ena pifine haroo lalai, ana aleꞌei, hamonei fafefefanaa ei haroo hamuꞌou uaa nabaa nemea roꞌou lomi na nara ba faꞌua fei warea, woro rowe filoginaa naranaraa roꞌou wagii ei maumau ei haroo roꞌou ma abaa wagii ei warewareaa roꞌou, 2 maꞌuaa wagii ei fanunuaa roꞌou ei fafaꞌarai ma fararabaa hamuꞌou ei gutanaa hamuꞌou. 3 Ei fananamaiaa hamuꞌou abaa manumanuu hawera aleꞌei fifigaa hugoo taba ma ei hawera gold o susuu hamuꞌou. 4 Agia, hamatee manumanu laloo iaa hamuꞌou, fei fananamaiaa famadumua spiriti, fei lomi i paꞌai, fei na paꞌi awatana i pudaa mei Haidaa. 5 Uaa sifei fei maumau fananamaiaa ei apunai pifine mina, ei na oꞌonai unuu roꞌou aꞌa mei Haidaa. Rona fafefefanaa ei haroo roꞌou, 6 aleꞌei Sarah, mei na guainaa Abraham ma ware ba hia fasuna. Hamuꞌou aleꞌei naꞌuna nabaa hamona bigiꞌaa tamanu na wanewane ma lomi hamona mamaꞌau. 7 Ena wawane haroo lalai, ana aleꞌei, hamonei farawanimaꞌaiaa ei haroo hamuꞌou ma fani honua aꞌa roꞌou uaa roꞌou, pududuu. Ma ana rowe tofipui aꞌa hamuꞌou fei rawaniꞌa harenua. Bigiꞌaa fei ba lomi hepalo manumanu i lawaraa ei lafulafuaa hamuꞌou.
Ei Fiꞌia wagii Tamanu na Rawani
8 Ma pafoo minaa eꞌei, minaa hamuꞌou nei hepaloi ua naranaraa hamuꞌou; finaranarainaa hememea, fihagui aleꞌei filofui, fifaloloaꞌii ma fifamadumuii. 9 Apuna fagianainaa ei rona fafeloaa hamuꞌou o warefafeloaa ei rona warefafeloaa hamuꞌou, maꞌuaa fani hawegia, uaa sifei fei paꞌafina i lalaꞌaa hamuꞌou ba hamonei to hawegia. 10 Uaa,
“Hini na nunuminia ba i gutaniꞌeniꞌe
ma gutafarawanilao
neiꞌaa warefafelo o warefasifi.
11 Inei farapadiꞌininaa ei hafeloꞌa ma bigiꞌaa ei rawaniꞌa;
inei ponilabaginaa fei gutafirawania ma panarofia.
12 Uaa mei Fasu na fanunupaꞌaa ei wanewanea
ma guainaa ei lafulafuaa roꞌou,
maꞌuaa ina ofadugaa ei rona bigiꞌaa ei hafeloꞌa.”
13 Haa, hini ba i fagianainaa hamuꞌou nabaa hamoꞌaa refubigiꞌaa ei rawaniꞌa? 14 Maꞌuaa nabaa hamoꞌaa to fiꞌia wagii tamanu na wanewane, hamona paꞌi hawegia. “Apuna maꞌau aꞌa tamanu na famaꞌauaaa roꞌou; apuna narafatemua.” 15 Maꞌuaa laloo naranaraa hamuꞌou, au uꞌugainaa Christ ba hia Fasu. Ranimai hamonei paꞌi nafanafaa ei iꞌigaiaa mei i iꞌigainaa paꞌafii fei oꞌonaia unu hamona paꞌi. Maꞌuaa warefagigii fininaa honua; 16 ma hamonei aida ba lomi hamona bigifatata, uaa ena rona warefafeloaa ei rawaniꞌa bigiꞌaa hamuꞌou aꞌa Christ, roꞌaa mamafa aꞌa ei wiwitoiaa roꞌou. 17 Fei ba o to fiꞌia aꞌa fei nunumiaa mei Haidaa na mua laraa fei ba o bigiꞌaa ei hafeloꞌa. 18 Uaa ei hafeloꞌa, Christ na maꞌe hepoa ua aꞌa minaa ei ramaꞌa, mei wanewanea aꞌa ei hafeloꞌa ba i duginaa hamuꞌou aꞌa mei Haidaa. Rona foꞌafamaꞌeaa fei hudi ununa, maꞌuaa ina to harenua aꞌa fei Spiriti 19 ma aꞌa fei Spiriti ina wareware aꞌa ei spiriti, ei rona boboꞌai, 20 ei rona barafe mina mina aꞌa fei au i faduaa fei baua wa Noah ma na fawiwiꞌainaa roꞌou mei Haidaa. Hefiꞌa ua ramaꞌa, puduu roꞌou fainaroa, rona tela aꞌa fei ranu, 21 ma fei ranu fei, haduoo fei pudugufaia, fei ifi fatelaꞌanaa hamuꞌou anaa—abaa fei fesufesuu loloo unu, maꞌuaa fei uniꞌuni ba na fafaꞌaraib ua fei naranara i pudaa mei Haidaa. Ina fatelaꞌanaa hamuꞌou uaa fei asiꞌanaa Jesus Christ, 22 mei i dinaa pafea ma fi guta raudei maꞌau mei Haidaa fipui aꞌa ei aloꞌalo, ei forafora mawe ei faufaua, ei roꞌei fafefe aꞌana.