2
Siꞌei, hamonei siminaa minaa ei mau bidibidii unu, sifisifiꞌa, wareꞌonia, punepunea ma minaa ei mau bababauꞌua. 2 Ana aleꞌei ei baduu manufau waninia, hamonei susu aꞌa fei paꞌaa pao susuu fei spiriti ba hamonei gipefarawani wagii fei telaꞌanaa hamuꞌou, 3 uaa hamonawe fanunuꞌapaꞌidigia ba mei Fasu, ina rawani. Fei Naꞌa na Paꞌi Harenua ma ei Rafeiana
4 Hia aleꞌei fei Naꞌa, fei na oalao—mei rona ofadugia ei ramaꞌa, mei na rafeinia mei Haidaa ma napaꞌaa haguia. Ei hamoꞌei nomai aꞌana, 5 hamuꞌou ana aleꞌei ei naꞌa rona oalao. Ma aꞌa eꞌei, ina biginaa hamuꞌou hepalo humuu fei spiriti ba hamoꞌaa apunai ma bigi aleꞌei ei bauaniaa humuu mei Haidaa ma fani ei mau fanaa fei Spiriti, ei na rawani i pudaa mei Haidaa uaa Jesus Christ. 6 Uaa i laloo fei Buꞌu Apuna na ware:
“Maꞌa, una augaa hepalo naꞌa yei Zion,
hepalo rafeia, hepalo rawaniꞌa fasuꞌufufugoi
ma mei i narafaweꞌi aꞌana
fai lomi ba i tonaa mamafaa.”
7 Ma aꞌa hamuꞌou ena narafaweꞌia, fei naꞌa fei, hepalo baua manumanu. Maꞌuaa aꞌa ei abaa narafaweꞌia,
“Fei naꞌa rona suminia ei fadufadua,
nawe udenaa fasuꞌufufugoi,”a
8 ma,
“Hepalo naꞌa i faꞌalabeꞌaa ei ramaꞌa,
hepalo mugoo i fapasiaa roꞌou.”
Hamatee rona barafeaa fei uꞌuga, rona alabe; ana fei ba roꞌaa dinaa wagina.
9 Maꞌuaa ina rafeinaa hamuꞌou ma hamuꞌou aleꞌei ei bauaniaa humuu mei Haidaa aꞌa fei haparaiana, ei ramaꞌa wagii hefaa gufu na apunai, aleꞌei ei ramaꞌa gufuu mei Haidaa, ba hamonei wareꞌuduginaa mei i lalaꞌaa hamuꞌou aꞌa fei roromaa ba hamonei dinaa aꞌa fei rawaniꞌa weꞌaina. 10 Mina, lomi hamona paꞌi haraa hamuꞌou, maꞌuaa eꞌeni hamonawe oa aleꞌei ramaꞌaa gufuu mei Haidaa; mina, lomi hamona tonaa fei faloloaꞌia, maꞌuaa eꞌeni hamonawe tonia.
11 Ena tafiu, wagii feni ano, hamonei aleꞌei ena gufu raua ma ei abaa paꞌaa gufuu hamuꞌou yeni. Ma a iꞌigifaweꞌi aꞌa hamuꞌou ba hamonei faraua aꞌa ei hafeloꞌa nunumiaa hamuꞌou, ei na fiforai laloo iaa hamuꞌou. 12 Fei mau gutanaa hamuꞌou neimina rawani ua i pudaa ei roromaa. Faꞌua ba roꞌawe ware ba hamona bigifatata, maꞌuaa roꞌaa fanunupaꞌaa ei rawaniꞌa bigiꞌaa hamuꞌou ma rowe uduginaa mei Haidaa aꞌa fena arewaa ena inamii maꞌa oꞌodu.
Fafefefanaa ei Bauana ma ei Fasu
13 Uaa mei Fasu, hamonei fafefefanaa minaa ei bauana—aleꞌei mei paꞌaa hapara hamatee hia bauaniaa minaa ei, 14 ma aꞌa ei gavanaa anaa, hamatee mei Fasu na augaa roꞌou ba nei fanimaꞌaa ei rona bigifatata ma warefarawaninaa ei rona bigifarawani. 15 Uaa na nunuminia mei Haidaa ba wagii ei rawaniꞌa bigiꞌaa hamuꞌou, hamoꞌaa pauninaa ei poapoa wareaa ei lomi apaꞌaa roꞌou. 16 Hamona ala, maꞌuaa, abaa tonaa fei aleꞌei oꞌopaꞌai ei hafeloꞌa; hamonei guta aleꞌei nafii mei Haidaa. 17 Fani maꞌaua aꞌa minaa ei ramaꞌa: Haguaa ei lofu rona narafaweꞌi; maꞌauaa mei Haidaa, fani honua aꞌa mei hapara.
18 Ena humuwa, hamonei fafefefanaa ei fasuu hamuꞌou ma fani maꞌaua aꞌa roꞌou; aꞌa ba uniaa ei rawaniꞌa ma ei rona farawaninaa hamuꞌou, maꞌuaa aꞌa ei sibasibaa anaa. 19 Uaa na rawani ba nemea i apitainaa fiꞌiana aꞌa ei haperaraia lomi paꞌafina uaa ina naranaraiaa mei Haidaa. 20 Tamanu rawaniꞌana nabaa hamona apitainaa fiꞌiaa hamuꞌou aꞌa ei bigifatataa hamuꞌou? Maꞌuaa nabaa hamona apitainaa fiꞌia wagii ei rawaniꞌa bigiꞌaa hamuꞌou, ina rawani i pudaa mei Haidaa. 21 Aꞌa fei, ina lalaꞌaa hamuꞌou, uaa Christ na to fiꞌina uaa hamuꞌou ma ina augaa hamuꞌou aleꞌei famaꞌamaꞌa ba hamonei neneraa ei hunaa pinena.
22 “Lomi ina bigiꞌaa hepalo tata,
ana lomi na wareaa hepalo sifisifiꞌa.”
23 Ei roꞌaa warefafeloia, lomi na warefani aꞌa roꞌou; roꞌaa fani fiꞌina, lomi na ware ba fagianainaa roꞌou. Agia, inadoꞌo aunaa hia panii mei na wanewane dududuana. 24 Anaia na tonaa ei hafeloꞌaa oꞌou aꞌa fei hudi ununa pafoo fei haihai ba onei maꞌe wagii ei hafeloꞌa ma tatalai wagii tamanu na wanewane; aꞌa ei loralorana, hamona rawani. 25 Uaa famaꞌa hamuꞌou aleꞌei madidiaa sipsipi, maꞌuaa eꞌeni hamona hadiweꞌainaa aꞌa mei Omaꞌamaꞌaa ei Sipsipi, mei Wagiꞌiaa ei harenuaa hamuꞌou.