Ba a aloaa feni neꞌiau aꞌa ei rafeiaa mei Haidaa, ei abaa paꞌaa gufuu roꞌou feni ano, ei roꞌei tatalai yena Pontus, Galatia, Cappadocia, Asia ma Bithynia. 2 Ina rafeinaa roꞌou alefei dinaraa mei Haidaa, mei Ama wagii fei bigiꞌaa fei Spiriti Apuna, fei na apunainaa roꞌou fininaa fei namoo Jesus Christ ba ronei nenegia:

Nunumiau ba fei rawaniꞌa ma fei gutafarawania neimina gipe aꞌa hamuꞌou.

3 Fani udugia aꞌa mei Haidaa, mei hia Amaa mei Fasuu oꞌou Jesus Christ! I aꞌa fei baua faloloaꞌiana, ina fanaa oꞌou fei manufau waninia aꞌa fei oꞌonaia unu, fei i udelao wagii fei asiꞌanaa Jesus Christ aꞌa fei maꞌea 4 ba onei to tamanu fai lomi i wanu, raia, o paꞌai, fei i ude omaꞌaa hamuꞌou i pafea, 5 hamuꞌou ena narafaweꞌia, ena na rapiꞌaa hamuꞌou fei faufau mei Haidaa nopaꞌaloo fei noramiaa fei telaꞌana, fei anaa i ufugimai aꞌa ei aꞌapoo arewaa. 6 Aꞌa fei, hamonamina niꞌeniꞌe, maꞌuaa eꞌeni hamona tonaa maꞌida fiꞌia aꞌa watauda ei mau mania. 7 Ina nomai eꞌei fiꞌia ba fei narafaweꞌiaa hamuꞌou, fei na awatadiai laraa fei gold, fei rona fafafaꞌarainia aꞌa fei hafi maꞌuaa i paꞌai ua—ba fei narafaweꞌiaa hamuꞌou nei paꞌaa faꞌuai ma iaꞌiaina i paꞌi udugia, hawera ma honua ena na faꞌarewamai Jesus Christ. 8 Hamotawe fanunupaꞌia, maꞌuaa hamona haguia; ma ana lomi hamona fanunuia eni, maꞌuaa hamona narafaweꞌi aꞌana ma fei niꞌeniꞌeaa hamuꞌou na pai hawerana aleꞌei ba ei warewarea na noguꞌualao, 9 uaa hamoꞌei tonaa fei fuaa fei narafaweꞌia, fei na fatelaꞌanaa hamuꞌou.

10 Wagii fei telaꞌana, ei mamamaꞌa, ei rona diwareꞌaugia ba hefei rawaniꞌa iwe nomai aꞌa hamuꞌou, ronamina lalabaginaa fei rawaniꞌa fei 11 ba roꞌaa apaꞌimaꞌaa ei hilalaa fei au, ei na faꞌarewaiaa laloo naranaraa roꞌou fei Spiritii Christ, ei idii wareaa ei fiꞌiaa Christ ma batanai ei hawera ba i nomai nefarani. 12 Ina arewa aꞌa ei mamamaꞌa ba abaa roi bigihadumaa ana roꞌou, maꞌuaa hamuꞌou ei roꞌaa wareaa eꞌei manumanu, eꞌei hamonawe guainia aꞌa hefiꞌadiai rona uꞌugaa fei rawaniꞌa warea wagii fei faufau fei Spiriti Apuna, fei noramiana pafea. Ei aloꞌalo ba ana roꞌaa apaꞌaa ei manumanu ei.

13 Siꞌei, hamonei ofafaufau i laloo naranaraa hamuꞌou; hamonei utofaꞌainaa ana hamuꞌou; hamoneimina augaa fei oꞌonaia unuu hamuꞌou aꞌa fei rawaniꞌa, fei ba hamoꞌaa tonia ena na faꞌarewamai Jesus Christ. 14 Siꞌei ba hamuꞌou aleꞌei ei naꞌuu guaiawarea, hamoneiꞌaa neneraa ei hafeloꞌa nunumia, ei hamonadoꞌo paꞌi ei hamotawe paꞌi apaꞌaa hamuꞌou. 15 Maꞌuaa siꞌei ba mei na rafeinaa hamuꞌou, hia na fafafaꞌarai, ana hamonei fafafaꞌarai aꞌa minaa ei bigiꞌaa hamuꞌou; 16 uaa na udedii fei neꞌia ba: “Hamonei fafaꞌarai uaa yau na fafaꞌarai.”

17 Siꞌei ba hamona lalaꞌaa mei Ama, mei i dududuaa ei bigiꞌaa hememea ramaꞌa, mei lomi papaꞌaa ununa, hamonei tatalai yeni fininaa maꞌaua aleꞌei ba abaa paꞌaa gufuu hamuꞌou yeni. 18 Lomi hanuna fei gutanaa hamuꞌou mina, fei noranamai aꞌa ei upuu hamuꞌou. Ma hamona aida ba fei ponohadiweꞌia wagii fei gutana fei, aꞌa ba manumanu paꞌaia aleꞌei silver o gold, 19 maꞌuaa aꞌa fei rawaniꞌa namoo Christ, fei naꞌuu sipsipi lomi hepalo idaꞌidaa ununa o hafeloꞌana. 20 Atawe mamaramai feni malagufu, mei Haidaa na rafeinia, maꞌuaa laloo eni aꞌapoo arewaa nawe arewaimai uaa ba nei hadumaa hamuꞌou. 21 Uaa hia, hamona narafaweꞌi aꞌa mei Haidaa, mei na faꞌasiꞌania aꞌa fei maꞌea ma fani hawerana ba fei narafaweꞌia ma oꞌonaia unuu hamuꞌou nei oa i aꞌa mei Haidaa.

22 Hamona fafafaꞌaraidigaa ana hamuꞌou uaa hamona guaineneraa fei na faꞌuai ba wagii fei, hamoꞌapaꞌaa haguaa ei lofuu hamuꞌou. Siꞌei, hamonei fihaguinaa ana hamuꞌou i laloo minaa fei naranaraa hamuꞌou.^a 23 Uaa hamona waninidiai ma aꞌa ba manumanu wanuaa, maꞌuaa manumanu i oalao wagii fei wareaa mei Haidaa, fei na paꞌi harenuana, fei lomi i pedutoo. 24 Uaa