3 Ana aleꞌei, feroinaa ei hopi ba ronei paꞌi fei mau maꞌaua wagii fei gutanaa roꞌou, roneiꞌaa wiwitoi o hunu poapoai, maꞌuaa ronei feroinaa tamanu ina rawani. 4 Nabaa aleꞌei, na hawia ba roꞌaa feroinaa ei rona pifinei ba ronei haguaa ei haroo roꞌou mawe ei naꞌuu roꞌou 5 ba ronei utofaꞌainaa ana roꞌou ma fafaꞌarai ma panitawei yei humuu roꞌou ma ronei farawani aꞌa ei ramaꞌa. Ronei guainaa ei haroo roꞌou ba lomi hemea i warefafeloaa fei wareaa mei Haidaa.

6 Ana aleꞌei, faꞌunuwenuweaa naranaraa ei rona wawanei ba ronei utofaꞌainaa ana roꞌou. 7 Aꞌa minaa ei bigiꞌamu famaꞌaa roꞌou tamanu na rawani. Ma wagii ei feroia, onei paꞌaa fafaꞌuainia ma faꞌawataia 8 ma ei paolaa wareamu nei wanewane ua ba lomi nemea i ware ba na tata ma ena rona fadugeamu, rowe mamafa, uaa lomi paꞌafina ba roꞌaa warefafeloaa oꞌou.

9 Feroinaa ei humuwa ba ronei guainaa ei fasuu roꞌou wagii minaa ei manumanu ba ronei faniꞌeniꞌeaa roꞌou ma roneiꞌaa warefani aꞌa roꞌou 10 ma topaꞌainaa manumanuu roꞌou ba fei maumau roꞌou i famaꞌaia ba namina rawani ua ma wagii minaa ei manumanu i pudaa ramaꞌa, roꞌaa faroꞌoaa fei feroiaa mei Haidaa, mei fatelaꞌanaa oꞌou.

11 Uaa fei rawaniꞌaa mei Haidaa, fei na fanoramiaa fei telaꞌana na arewadii aꞌa minaa ei ramaꞌa. 12 Fei rawaniꞌa na feroinaa oꞌou ba onei ware ba, “Paꞌaa lomi” aꞌa fei abaa maumau mei Haidaa ma aꞌa eni nunumiaa unuu feni ano ma ba onei utofaꞌainaa ana oꞌou ma nei wanewane ma nei paꞌi fei maumau mei Haidaa laloo iaa oꞌou wagii feni au feni, 13 eni oi gutaꞌomaꞌaa fei baua faꞌoꞌonaia unu, fei noramiaa mei paꞌaa Haidaniaa oꞌou fininaa fei hawerana, mei ana Fatelaꞌana, Jesus Christ, 14 mei na rawaꞌaꞌafainaa anaia uaa oꞌou ba i ponohadiweꞌinaa oꞌou aꞌa minaa ei hafeloꞌa ma fafafaꞌarainaa ei ramaꞌa ba paꞌaa ramaꞌaa gufuna, ei rona refurefu ba roꞌaa bigiꞌaa ei rawaniꞌa.

15 Siꞌei, ei ba hamonei feroinia. Faꞌunuwenuwe ma warefaweꞌi fininaa minaa ei faufau. Nemeadiai neiꞌaa narafafelo aꞌa hamuꞌou.