3 Uaa mina, ana ona poapoai, barafei, hanaiaa sifisifii hefiꞌa mawe humuwai aꞌa watauda ei mau nunumaia ma faniꞌeniꞌea. Ona oa ua aꞌa fei mau wiwitoia ma punepunea ma fibidibidii unuu oꞌou. 4 Maꞌuaa iꞌa arewamai fei rawaniꞌa ma haguaa mei Haidaa, mei Fatelaꞌanaa oꞌou, 5 ina fatelaꞌanaa oꞌou. Ma fei paꞌafina, abaa ei wanewanea bigiꞌaa oꞌou, maꞌuaa aꞌa fei faloloaꞌiana. Ina fatelaꞌanaa oꞌou aꞌa fei nunufaa fei waninidiaia ma fei famanufaudiana aꞌa fei Spiriti Apuna, 6 fei na igiꞌuaia pafoo oꞌou uaa Jesus Christ, mei Fatelaꞌanaa oꞌou, 7 siꞌei ba ona wanewanedii aꞌa fei rawaniꞌana, opowe oa aleꞌei naꞌuna fininaa fei oꞌonaia unu wagii fei harenua lomi i pedutoo. 8 Sifei hepalo rawaniꞌa warea. Ma nunumiau ba hamonei faꞌawatainaa ei manumanu ei ba ei rona narafaweꞌi aꞌa mei Haidaa, ana roꞌamina faꞌawataiaa ei bigiꞌaa roꞌou, ei na rawani. Ei manumanu ei na rawani ba i farawaninaa minaa ei ramaꞌa.

9 Maꞌuaa farapa wagii ei fahamamagua naranara na poapoai ma ei warea ba batanai ei pai mina ma ei fihareia ma ei fisibaia wagii fei law, uaa eꞌei, lomi hanuna ma ana lomi bigiꞌana. 10 Fani hepoa aweia aꞌa mei na faꞌasiꞌanaa fei fiꞌalagia watolaa ramaꞌa ma fanidinia fei faguapoaa aweia. Nenee fei, diꞌininia. 11 Mei mau ramaꞌa aleꞌei, ona aidadii ba napaꞌaa wawadi ma hafelo; na fafagianainaa anaia.

12 Ena na aloawii Artemas o Tychicus i aꞌamu, oneimina labarai talamu ba omii maꞌa yau yei Nicopolis, uaa unawe nara ba a guta yei aꞌa fei au waiwana. 13 Oneimina bigiꞌaa tamanu i hadupaꞌaa fei tatalaiaa Zenas, mei na paꞌi apaꞌana aꞌa fei bigiꞌaa fei dududua mawe Apollos ba lagunei paꞌi minaa ei manumanu ma aloaa lagua. 14 Ei maroaa agua, roneiꞌu bigiꞌaa ei na rawani ma fani pani ba haduhaduu ramaꞌa laloo hepapalo arewaa ma roneiꞌaa tamafoi.

15 Minaa eni i aꞌau, rona famafufuoinio. Famafufuoinaa ei rona haguaa agua aꞌa fei narafaweꞌia.

Fei rawaniꞌa nei ude i aꞌa minaa hamuꞌou.