TITUS
1
Yau Paul, hemea nafii mei Haidaa ma ana apostle Jesus Christ ba a faweꞌiaa fei naranaraa ei rafeiaa mei Haidaa ma faꞌarewaiaa fei apaꞌaa fei faꞌuaia, fei i duginaa ramaꞌa aꞌa ei maumau mei Haidaa— 2 fei narafaweꞌia ma fei apaꞌa na ude pafoo fei oꞌonaia unuu fei harenua lomi i pedutoo, fei mei Haidaa, mei lomi i warefasifi nadii faꞌunainia ei ataa nomai fei rawarawa arewaa 3 ma aꞌa fei paꞌaa au ina faꞌarewaiaa fei wareana aꞌa fei uꞌuga, fei ina faninaa paniu wagii tamanu na wareia mei Haidaa, mei fatelaꞌanaa oꞌou.4 Feni neꞌiau i dinaa aꞌamu, Titus, yoi mena paꞌaa naꞌuu wagii fei narafaweꞌia, fei aguna paꞌi:
Fei rawaniꞌa ma gutafarawania, noramiaa lagua aꞌa mei Haidaa, mei hia Ama mawe Christ Jesus, mei Fatelaꞌanaa oꞌou.
Fei Bigiꞌaa Titus Yei Crete
5 Fei paꞌafina ba una diꞌininio yei Crete, sifei ba oneidoꞌo fawanewaneaa tamanu itawe pedu ma rafeifania bauaniaa ei losuu i laloo hepapalo gufu ana aleꞌei a warefanidigio. 6 Hemea bauaniaa losuu neiꞌaa paꞌi hepalo tata, nei paꞌi hemea ua harona, ei naꞌuna nei narafaweꞌi ma roneiꞌaa suauga aꞌa ei aꞌafoloi maumau ma barafe i pudaa ramaꞌa. 7 Siꞌei ba na udenaa panii mei famamoaa fei bigiꞌaa mei Haidaa,b ineiꞌaa paꞌi tata, o ofasua, o balafigi batafa, o hunu poapoai, o pani baꞌananarai, o bigifafelo ba i to manumanu. 8 Maꞌuaa inei taufagutanaa ei ramaꞌa, neipaꞌaa nunuminaa tamanu ina rawani, neiꞌaida utofaꞌainaa anaia, nei wanewane, nei fafaꞌarai ma omaꞌafarawaninaa anaia. 9 Inei panarofaweꞌinaa fei rawaniꞌa warea ana aleꞌei rona feroinia ba nei faꞌunuwenuweaa hefiꞌadiai aꞌa fei wanewanea feroia ma warefawanewaneinaa ei rona harea wagina.
10 Uaa na watauda ei barafea, ei baꞌabaꞌaa umu mawe ei sifisifiꞌa, watauda roꞌou, maroaa fei moroꞌaa hudii wawanei. 11 Onei fapauninaa umuu roꞌou, hamatee roi fafeloaa ei maroa wagii ei feroia, ei ba roneiꞌaa feroinia, ei feroia ba roꞌaa sifiꞌaa hefiꞌadiai ba ro to manumanu. 12 Hemea ana mamamaꞌaa roꞌou na ware ba, “Ranimai ei Crete, ronaꞌaida sifisifi, aleꞌei ei hafeloꞌa ponoto o tamafoo pugua.” 13 Fei warea fei, paꞌaa faꞌua. Siꞌei, warefaweꞌi aꞌa roꞌou ba nei wanewane fei narafaweꞌiaa roꞌou 14 ma fai lomi roꞌaa falanaa huoo roꞌou ei sifisifi uꞌugaa ei Jew o guainaa ei wareaa ei rona ofadugaa fei faꞌuaia. 15 Aꞌa ei rona fafaꞌarai, minaa ei manumanu na fafaꞌarai, maꞌuaa aꞌa ei rona loloa ma lomi rona narafaweꞌi, lomi hepalo manumanu na fafaꞌarai uaa na loloa naranaraa roꞌou ma fai lomi roꞌaa narapaꞌia ba rona tata. 16 Rona ware ba rona apaꞌaa mei Haidaa, maꞌuaa, fei bigiꞌaa roꞌou na famaꞌaia ba loꞌe. Rona fawawaꞌauaa unu, rona barafei ma lomi rowe bigipaꞌaa hefaa rawaniꞌa manumanu.