Ei Maumau Hafeloꞌa aꞌa ei Aꞌapoo Arewaa
3
Maꞌuaa guainaa feni: Ipowe paꞌi paꞌaa hafeloꞌa au wagii ena aꞌapoo arewaa. 2 Ei ramaꞌa, roꞌaa haguaa ana roꞌou, haguaa mugoo poꞌi, wareꞌaguꞌagui, mamagugui, baꞌananarai, barafeaa ei ama ma ina, lomi roꞌaa niꞌeniꞌe aꞌa tamanu rona paꞌidii, lomi fafaꞌaraia, 3 lomi hagua, lomi roꞌaa futoaa hafeloꞌaa hefiꞌadiai, wiwitoia, lomi roꞌaa apitaipaꞌi, lomi roꞌaa haguaa ei rawaniꞌa, 4 rona fahafeloaa hefiꞌa, baꞌasuarai batafa, naranaraꞌuaiaa ana roꞌou, haguaa ei i faniꞌeniꞌeaa roꞌou ma lomi roꞌaa haguaa mei Haidaa— 5 fafanunuaa roꞌou aleꞌei maumau mei Haidaa, maꞌuaa lomi rona ugainaa fei faufau wagina. Faraua aꞌa roꞌou.6 Fei maumau roꞌou aleꞌei ba ro waduꞌaiꞌuanaa ei humu ma fapafeai aꞌa ei pifine na pududui naranaraa roꞌou. Ena ramaꞌa ena, namina fuaꞌonaa roꞌou ei watauda mau hafeloꞌa mawe ei hafeloꞌa nunumaia, 7 ronaꞌaida feferoi, maꞌuaa paꞌaa lomi ba rona ugainaa fei faꞌuaia. 8 Ana aleꞌei ba Jannes ma Jambres, laguna fadugeaa Moses, ei ramaꞌa ei, ana roꞌaa fadugeaa fei faꞌuaia. Na wawadi naranaraa roꞌou ma wagii fei narafaweꞌia, rona fagianadii. 9 Maꞌuaa lomi rowe opaꞌaipaꞌi, uaa ei mau ramaꞌa aleꞌei, ei bigiꞌaa roꞌou imina arewa aꞌa minaa ei ramaꞌa.
Paul na Warefaweꞌi aꞌa Timothy
10 Maꞌuaa yoi, ona apaꞌidigaa fei feroiau, fei mau gutanau, naranarau, narafaweꞌiau, ofasisiau, haguau, apitaiau, 11 ei haperararaia una tonia, ei fiꞌiau—tamanu ei na bapaꞌau yei Antioch, Iconium ma Lystra, ei haperararaia una apitainia. Maꞌuaa mei Fasu na fatelaꞌanau aꞌa minaa eꞌei. 12 Ma hini ba i guta aꞌa fei maumau mei Haidaa aꞌa Christ Jesus i tonaa haperararaia 13 ma ei hafeloꞌa ma ramaꞌaa sifisifi, ropowemina hafeloꞌapoi ma fisifisifiꞌii ana roꞌou. 14 Maꞌuaa yoi, onei oafagugu aꞌa fei feroia ona guaitonia, fei ona aida ba na faꞌua, uaa ona apaꞌaa ei rona feroinio 15 ma ei oifi badui ua nopaꞌamii eꞌeni ona apaꞌidigaa ei neꞌiaa fei Buꞌu Apuna, ei i fani apaꞌamu aꞌa fei telaꞌana wagii fei narafaweꞌia aꞌa Christ Jesus. 16 Minaa ei neꞌiaa fei Buꞌu Apuna noranamai aꞌa fei naranaraa mei Haidaa ma na paꞌi bigiꞌana aꞌa fei feroia, aweia, fawanewanea ma feroia wagii ei wanewanea 17 ba mei ramaꞌaa gufuu mei Haidaa neimina paꞌipedu waduna wagii minaa ei rawaniꞌa bigiꞌa.