4
I inamoaa mei Haidaa mawe Christ Jesus, mei i dududuaa ei roꞌei guta mawe ei rona maꞌe, hamatee una naraiaa fei noramiana ma fei haparaiana, siꞌei a warefanio feni: 2 Uꞌugaa fei Warea; ranimai oneimina ofafaufau; oneifawanewaneaa hefiꞌa, aweinaa hefiꞌa ma faꞌunuwenuweaa hefiꞌa fininaa fei baua ofasisia ma fanimaꞌaa ei feroiamu. 3 Uaa ipowe nomai fei arewaa ba ei ramaꞌa, paꞌaa loꞌe ba roꞌaa guainaa fei feroia na wanewane. Agia, ba nei fiboꞌii aꞌa ei nunumiaa roꞌou, roꞌawe fafigupuinaa watauda feroia aꞌa roꞌou ba ronei wareaa tamanu na fasisiaa adiaa roꞌou. 4 Roꞌaa momoꞌai aꞌa fei faꞌuaia ma diarainaa aꞌa fei sifisifiꞌa. 5 Maꞌuaa yoi, onei naramaꞌa aꞌa minaa ei manumanu. Apitai aꞌa ei awataa, uꞌugaa fei rawaniꞌa warea ba ei ramaꞌa ronei filoginaa naranaraa roꞌou ba roꞌaa tela, onei bigifaweꞌi aꞌa ei bigiꞌaa mei Haidaa.6 Uaa ana eni ua fei faweweniu aleꞌei hefaa numa roꞌei ipia pafoo fei tawahafi na apunai aleꞌei fana ma na nodigimai fei auu ba apowe paꞌai. 7 Una foꞌadii aꞌa fei rawaniꞌa foꞌaa, una fapedugaa feni ponau aꞌa fei fiwaleia ma unaꞌu panarofaa fei narafaweꞌia. 8 Eꞌeni na udedii fei ponoꞌau, fei tao fei wanewanea, fei ba i fanau aꞌa fena arewaa i nomai mei Fasu, mei wanewanea Fadududua—ma abaa unaa yau, maꞌuaa minaa ei rona omaꞌaa fei noramiana anaa.
Ei Warea aꞌa ei Ramaꞌa
9 Oneipaꞌaa labarai talamu ba o batafamai, 10 uaa Demas, hamatee ina haguaa feni ano, ina diꞌininau ma dinaa Thessalonica. Crescens na dinaa Galatia ma Titus na dinaa Dalmatia. 11 Luke ua i aꞌau. Dugamii Mark, uaa hia rawaniꞌa paniaa paniu aꞌa fei bigiꞌaa mei Haidaa. 12 Una alonaa Tychicus yei Ephesus. 13 Ena ona nomai, tonamai ena hawaa uguu, ena una augia aꞌa Carpus yei Troas ma tonamai ei holobenaa una neꞌi wagina ma paꞌaa nunuminau ei hudii manulelele, ei unaꞌaida neꞌi wagina.
14 Alexander mei i bigiꞌaa ei metal namina fagianainau. Mei Fasu iwe fani lagina aꞌa ei bigiꞌana. 15 Yoi anaa, onei omaꞌaio aꞌana, uaa inamina fadugeaa fei uꞌugaa oꞌou.
16 Doꞌo famaꞌa, lomi hemea na nomai ba i hadumau aꞌa fei dududuau, uaa minaa ei, rona diꞌininau. Lomi na nunuminia ba i fagianainaa roꞌou fei. 17 Maꞌuaa mei Fasu na upapau ma na faweꞌiau ba i aꞌau, fei uꞌuga neimina baꞌa ma minaa ei Gentile ronei guainia. Ma una tela aꞌa fei poaa fei lion. 18 Mei Fasu, iwe fatelaiau aꞌa minaa ei hafeloꞌa i nomai aꞌau ma noduginaa yau aꞌa fei haparaiana i pafea. I aꞌana i ude fei hawera ranimai ranimai. Amen.
Ei Famafufuoia
19 Famafufuoinaa Priscillaa ma Aquila mawe ei ramaꞌaa humuu Onesiphorus. 20 Erastus na guta yei Corinth ma Trophimus na funu ma una diꞌininia yei Miletus. 21 Oneimina labarai talamu ba o nomai yeni eni ana atawe nomai fei au hafaa. Rona famafufuoinio Eubulus, Pudens, Linus, Claudia mawe minaa ei lofu.
22 Mei Fasu i oa i aꞌa fei spiritimu. Fei rawaniꞌa na ude i aꞌamu.