2
Siꞌei, mena naꞌuu, ofafaufau fininaa fei rawaniꞌa, fei na ude aꞌa Christ Jesus. 2 Ma tamanu ei ona guainia aꞌau i pudaa watauda ramaꞌa, uꞌufarawaninia aꞌa ei rona oafagugu ba ronei feroinaa hefiꞌadiai. 3 Apitainaa ei awataa fiꞌia fipui aꞌa haiꞌou aleꞌei hemea rawaniꞌa foꞌaa Christ Jesus. 4 Lomi ba nemea foꞌaa i fawaduꞌai aꞌa ei manumanu ei ramaꞌa ua. Hia, ba i faniꞌeniꞌeaa mei bauaniana, mei bauaniaa ei foꞌaa. 5 Ana aleꞌei, nabaa nemea i poni aꞌa fei fiwaleia, lomi ba i muainaa fei ponoꞌa wagina nabaa lomi i neneraa ei warea ba batanai fei mau fiwaleia. 6 Ma mei weweaa diapodu, hia rawarawa tonaa duꞌua wagii fei peꞌihapena. 7 Naramaꞌaiaa tamanu una wareia, uaa mei Fasu, iwe faꞌarewaiaa minaa ei aꞌamu.8 Naraia ba Jesus Christ na asiꞌaa aꞌa fei maꞌea ma hia pai David. Sifei fei rawaniꞌa wareau, 9 fei una to fiꞌia wagina ba yau na boboꞌai aleꞌei hemea hafeloꞌa. Maꞌuaa fei wareaa mei Haidaa, lomi na boboꞌai. 10 Siꞌei, una apitainaa minaa ei manumanu uaa ei rafeiana ba roꞌou anaa, ronei tonaa fei telaꞌanaa aꞌa Christ Jesus fininaa fei hawera lomi i pedutoo.
11 Sifeni hepalo rawaniꞌa warea:
Nabaa ona maꞌefipui aꞌana,
ana oꞌaa gutafipui aꞌana;
12 Nabaa ona apitai ua,
ana owe gutafipui aꞌana wagii fei haparaiana.
Nabaa ona rawafalafeia
ana i rawafalafeaa oꞌou;
13 nabaa lomi na weꞌi naranaraa oꞌou,
hia na oafagugu ua,
hamatee lomi ba i falafeaa anaia.
Mei Bigibigiꞌa na Ugainia mei Haidaa
14 U fanonominaa roꞌou eni manumanu eni. Aweinaa roꞌou i maꞌaa mei Haidaa ba roneiꞌaa fiharei wagii ei paolaa warea; lomi hanuna ma i fapoapoaiꞌuaiaa ena rona guainia. 15 Onei fanimaꞌaꞌuaio ba ona rawani i pudaa mei Haidaa aleꞌei hemea paniaa panina, hemea lomi na mamafa aꞌana, hemea na bigifarawani ua aꞌa fei warea ina faꞌuai. 16 Onei faraua aꞌa ei warewarea, abaa wareaa mei Haidaa, uaa ena rona bigiꞌia, inamina apoiꞌualao fei maumau, fei abaa maumau mei Haidaa. 17 Ei feroiaa roꞌou aleꞌei hepalo funua na tale namoo roꞌou. Ana aleꞌei feroiaa Hymenaeus ma Philetus, 18 laguei laguna farapadiꞌininaa fei faꞌuaia. Lagunaꞌaida ware ba fei asiꞌanaa ei maꞌea na nodigimai ma wagii fei, laguna fafeloaa fei narafaweꞌiaa hefiꞌa. 19 Hefei paꞌaa faꞌua, maꞌuaa fei fasuꞌufufugoi mei Haidaa na udefaweꞌi uaa na tamaꞌainaa fei neꞌia ba, “Mei Fasu na apaꞌaa ena ramaꞌaa gufuna,” ma, “Hini i lalaꞌaa fei haraa mei Fasu nei farapadiꞌininaa fei maumau hafeloꞌa.”
20 Laloo hepalo baua humu na paꞌi manumanu abaa uniaa ei gold ma silver, maꞌuaa ana na paꞌi haihai ma waiwaiaa piye; hefiꞌa na paꞌi rawaniꞌa bigiꞌana ma hefiꞌa loꞌe. 21 Nabaa nemea i farapa aꞌa tamanu ei lomi na rawani bigiꞌana, hia aleꞌei talaa fei rawaniꞌa bigiꞌa, ina fafaꞌarai ma na hawia ba i biginaa hia mei Fasu ma ina oa ba i bigiꞌaa ei rawaniꞌa bigiꞌa.
22 Ponidiꞌininaa ei hafeloꞌa nunumiaa ei baubara ma nanao ma labarainaa fei wanewanea, fei narafaweꞌia, fei hagua ma fei gutafarawania fipui aꞌa ena rona lalaꞌaa fei haraa mei Fasu fininaa fei fafaꞌaraia naranara. 23 Apuna fawoꞌi aꞌa ei poapoa fihareia, ei loꞌe hanuna, uaa ona aida ba i faꞌasiꞌanaa fisisibaia. 24 Ma mei paniaa panii mei Fasu, ineiꞌaa fiharei; loꞌe, hamatee inei farawani aꞌa minaa ei ramaꞌa, nei feroipaꞌi ma ineiꞌaa narafasiba aꞌa nemea. 25 Ma ei rona fadugeia, inei nofagigilao ma fawanewaneaa roꞌou ba mei Haidaa, i fanaa roꞌou fei filogiaa naranara ma unifanaa roꞌou fei talaa fei faꞌuaia 26 ma ba ropowe narapaꞌia ma ro telaꞌapaꞌi aꞌa fei lepoo mei haniꞌu, mei i panarofaa roꞌou ba ronei bigiꞌaa ei nunumiana.