2 Feni, i dinaa aꞌamu, Timothy, mena rawaniꞌa naꞌuu.

I dinaa aꞌamu fei rawaniꞌa, fei faloloaꞌia ma fei gutafarawania, noramiaa roꞌou aꞌa mei Haidaa, mei hia Ama mawe Christ Jesus, mei Fasuu oꞌou.

3 Una ware ‘ta’ aꞌa mei Haidaa, mei yau ma ei upuu mina fi bigi aꞌana fininaa fei naranara ba lomi tatau. Poi ma arewaa unaꞌaida nonominio laloo ei lafulafuau. 4 Una nonominaa ei pasiaa ranuu pudamu ma una nunumai ba a maꞌa yoi ba fei niꞌeniꞌeau neimina pepesu. 5 Una nonominaa fei paꞌaa weꞌiaa naranaramu, fei nadoꞌo oa aꞌa mei upumu Lois ma mei inamu Eunice, fei una nara ba ana fi oa aꞌamu. 6 Uaa fei, a fanonominio ba onei faweguweguaa fei fanaa mei Haidaa, fei ona tonia wagii fei augau paniu pafomu. 7 Uaa mei Haidaa lomi na fanaa oꞌou fei spiritii mamafaa, maꞌuaa fei spiritii faufau, hagua ma fei wagiꞌia.

8 Siꞌei, apuna mamafa uꞌugaa mei Fasuu oꞌou, o yau, meni na boboꞌai uaa hia. Maꞌuaa, aꞌa fei fiꞌia wagii fei rawaniꞌa warea, agunei ufipui aꞌa fei faufau mei Haidaa, 9 mei na fatelaꞌanaa oꞌou ma rafeiꞌaunaa oꞌou aꞌa fei gutana na fafaꞌarai—aꞌa ba wagii ei bigiꞌaa oꞌou, maꞌuaa wagii fei nunumiana ma rawaniꞌana. I aꞌa Christ Jesus, ina fanaa oꞌou fei rawaniꞌa ei atawe nomai fei rawarawa arewaa, 10 maꞌuaa inawe arewa aꞌa fei noramiaa mei Fatelaꞌanaa oꞌou, Christ Jesus, mei na fapedugaa fei maꞌea ma wagii fei rawaniꞌa warea na faꞌarewaia ba na tonamii fei harenua ma fei hudi unu lomi i maꞌetoo. 11 Ma aꞌa fei rawaniꞌa warea ina rafeinau ba yau talaitonaa warea, apostle ma feroia. 12 Sifei fei paꞌafina ba una tonaa feni fiꞌia, feni ifimina faꞌawatainau eꞌeni. Maꞌuaa lomi una mamafa uaa una apaꞌaa mei una narafaweꞌi aꞌana ma napaꞌaa aida ba hia, na hawia ba i omaꞌaa ei una faninaa panina aꞌa fena arewaa i nomai.

13 Tamanu ona guainia aꞌau onei tonia aleꞌei hepalo famaꞌamaꞌaa fei feroia na wanewane fininaa fei narafaweꞌia ma fei hagua aꞌa Christ Jesus. 14 Omaꞌafarawaninaa fei rawaniꞌa faꞌuaia, fei na udenaa panimu; omaꞌaia aꞌa fei hadumaa fei Spiriti Apuna, fei fi oa i laloo iaa oꞌou.

15 Ona aida minaa ei ramaꞌa yei aꞌa fei baua gufu Asia, rona farapadiꞌininau ma Phygelus mawe Hermogenes anaa.

16 Na rawani ba mei Fasu na faloloaꞌinaa ei ramaꞌaa humuu Onesiphorus, uaa inaꞌaida farawaninaa naranaramu ma lomi ina mamafa ba yau na boboꞌai. 17 Agia, ei i guta yei Rome, inamina lalabaginau nopaꞌaloo fei ba inawe paꞌau. 18 Na rawani ba mei Fasu i fani faloloaꞌia aꞌana aꞌa fena arewaa i nomai! Ona aidafarawani ba yei Ephesus, ina hadumau aꞌa watauda tala.