Ei Aweia aꞌa ei Pifine Maꞌesuabea, ei Bauaniaa Losuu mawe ei Humuwa
5
Apuna laofababagianaa ma hotaꞌaa nemea bau, maꞌuaa onei fawanewaneia aleꞌei ba hia amamu. Aꞌa ei baubara, fafaiaa roꞌou aleꞌei lofumu, 2 ena hopi, aleꞌei inamu ma ei nanao aleꞌei agimu fininaa fei paꞌaa maumau fafaꞌaraia.3 Omaꞌafarawaninaa ei pifine maꞌesuabea ei ronapaꞌaa gutafafelo. 4 Maꞌuaa, nabaa nemea pifine maꞌesuabea na paꞌi naꞌuna o upuna, ei baduu ei, ronei bigiꞌaa ei feroitonaa roꞌou wagii fei losuu, fei rona paꞌi ma roifarawaninaa ei maroaa roꞌou aleꞌei ba rona fanihadiweꞌinaa fei rawaniꞌaa ei ama, ei ina mawe ei upuu roꞌou, uaa fei, na faniꞌeniꞌeaa mei Haidaa. 5 Mei pifine maꞌesuabea, mei napaꞌaa gutafafelo ma guta unaia, hia na oꞌugaa mei Haidaa. Poi ma arewaa inaꞌaida lafulafu ma iꞌiginaa mei Haidaa ba nei hadumia. 6 Maꞌuaa mei pifine maꞌesuabea, mei i labaginaa ei roꞌoa manumanu ba i faniꞌeniꞌeia, faꞌua ba ifi guta maꞌuaa hia aleꞌei maꞌea. 7 Ana feroifanaa ei ramaꞌa eni manumanu ba lomi nemea i paꞌi tatana. 8 Nabaa nemea, lomi i roinaa ei gufuna ma nabaa lomi na paꞌaa bigiꞌaa fei aꞌa ei paꞌaa maroana, hia na fadugeaa fei mau narafaweꞌia ma na hafelodiai laraa mei lomi na weꞌi naranarana.
9 Apuna fapanaꞌaa haraa nemea pifine maꞌesuabea aꞌa fei udeꞌudee haraa ei pifine maꞌesuabea hawina na paꞌi oloroa paꞌania igisimasi, na oafagugu aꞌa mei haronaa 10 ma ana na paꞌi rawaniꞌa harana aꞌa ei rawaniꞌa bigiꞌana aleꞌei omaꞌafarawanianaa ei naꞌuna, fagutafarawaninaa ramaꞌa, fesuaa pinee ei apunaiaa mei Haidaa, hadumaa ei rona gutafafelo ma bigifaweꞌi aꞌa minaa ei rawaniꞌa bigiꞌa.
11 Aꞌa ei nanao pifine maꞌesuabea, apuna fapanaꞌaa haraa roꞌou aꞌa fei udeꞌudee hara. Uaa, nabaa ei nunumiaa unuu roꞌou na muainaa fei neneraa roꞌou Christ, rona nunumai ba roꞌaa lalai. 12 Siꞌei, rona fabibiyeinaa naranaraa ana roꞌou, uaa rona barafeaa fei rawarawa faꞌunaiaa roꞌou. 13 Ma ana ronawe tamafoi ma dinaa hepapalo humu. Ma abaa siꞌei ua ba roꞌou tamafo, uaa ana rafee roꞌou bababauꞌua ma nigoꞌuaiaa pidawaiaa hefiꞌa, ei abaa manumanuu roꞌou. 14 Siꞌei a aweinaa ei nanao pifine maꞌesuabea ba na rawani ba ronei lalai, wawanini, sualaparaa manumanuu humuu roꞌou ba lomi i paꞌi talaa mei bidibidii unu ba i warefafeloia. 15 Faꞌua ba hefiꞌa, rona momoꞌaidii ba ro neneraa Satan.
16 Nabaa nemea pifine narafaweꞌia ma dupuaa ei maroana na paꞌi hefiꞌa pifine maꞌesuabea, inei hadumaa roꞌou ma abaa fani awataa fei losuu aꞌa roꞌou, uaa fei losuu nei hadumaa ei pifine maꞌesuabea, ei ronapaꞌaa gutafafelo.
17 Ei bauaniaa fei losuu, ei rona famamofarawaninaa fei bigiꞌaa fei losuu, oneipaꞌaa fani baua honua aꞌa roꞌou, paꞌaa aꞌa ei rona bigi ba roꞌou uꞌuga ma feroia. 18 Uaa fei Buꞌu Apuna na ware ba, “Apuna fabaoaa fei budumaꞌao, fei fi bigifani duꞌua,” ma “Mei bigibigiꞌa nei paꞌi ponoꞌana.” 19 Apuna guaitonaa uꞌuga ba hemea bauaniaa fei losuu na bigifatata hawina na paꞌi helagui o oꞌodui rona fanununaa pudaa roꞌou. 20 Ei rona bigifatata, onei fawanewaneaa roꞌou i pudaa ramaꞌa ba ei ramaꞌa, ronei to feroia wagina.
21 Uꞌei warefaweꞌi aꞌamu i pudaa mei Haidaa ma Christ Jesus mawe ei aloꞌalo rafeiana ba onei neneraa minaa eꞌei warea ma oneiꞌaa paꞌi papaꞌaa unu.
22 Abaa ratarata ua aꞌa fei augaa pani pafoo ramaꞌa ma apuna labe aꞌa ei hafeloꞌaa hefiꞌadiai. Ma onei fafaꞌarai.
23 Apuna hunu ranu ua. Hunu maꞌida wine uaa fei pahananamu ma fei ufunuꞌuamu.