Ina Neꞌiferoinaa Timothy
4
Fei Spiriti na warefaꞌarewaia ba laloo ei aꞌapoo arewaa, hefiꞌa, roꞌaa diꞌininaa fei weꞌiaa naranara ma neneraa ei sifisifi spiriti ma ei manumanuu feroiaa ei pigea. 2 Ei feroia ei, manumanuu ei ramaꞌaa sifisifi, ei wareꞌoni, ei fai loꞌe rona aida ba rona tata. 3 Rona apunainaa ei ramaꞌa ba roneiꞌaa lalai ma warefaweꞌi ba roneiꞌaa hana hefiꞌa duꞌua, hefiꞌa na bigiꞌia mei Haidaa ba ei rona narafaweꞌi ma apaꞌaa fei faꞌuaia nei tonia fininaa warea ‘ta’. 4 Uaa minaa ei famamaraa mei Haidaa na rawani ma lomi hepalo manumanu ba oꞌaa siminia nabaa o tonia aꞌa fei warea ‘ta’, 5 uaa ina papaditaia aꞌa fei wareaa mei Haidaa fininaa lafulafua.6 Nabaa eꞌei manumanu eꞌei, ona warefaꞌarewaia aꞌa ei lofu, yoi aleꞌei rawaniꞌa paniaa panii Christ Jesus, gipeamu laloo fei faꞌuaia wagii fei weꞌiaa naranara ma fei rawaniꞌa feroia ona nenegia. 7 Oneiꞌaa faꞌidoꞌido aꞌa ei uꞌuga abaa manumanuu mei Haidaa ma ei famefimefii baduu; agia, onei feroinaa ana yoi ba fei maumaumu nei aleꞌei mei Haidaa. 8 Uaa fei maumau faweꞌiweꞌii raraa unu na paꞌi maꞌida awatana, maꞌuaa fei maumau mei Haidaa na awatadiai aꞌa minaa ei manumanu wagii fei harenua eꞌeni ma fei harenua ata nomai.
9 Sifeni hepalo rawaniꞌa warea ba oneipaꞌaa nenegia. 10 Ma wagii fei oneipaꞌaa bigifaweꞌi, uaa ona audigaa ei oꞌonaia unuu oꞌou aꞌa mei Haidaa, mei i oalao, mei Fatelaꞌanaa minaa ei ramaꞌa, paꞌaa eꞌei rona narafaweꞌi.
11 Feroi ma warefaweꞌiaa eꞌei manumanu eꞌei. 12 Apuna guainaa wareaa nemea ba lomi ona awata hamatee yoi baduu ua, maꞌuaa, onei aleꞌei famaꞌamaꞌa aꞌa ei narafaweꞌia wagii fei mau gutana, ei paola warea, fei hagua, fei narafaweꞌia ma fei mau fafaꞌaraia. 13 Nopaꞌaloo fei noramiau oneiꞌu igoaa ei neꞌia laloo fei Buꞌu Apuna i pudaa ramaꞌa ma onei uꞌuꞌu ma feferoi. 14 Apuna auꞌuaiaa fei fana ona tonia wagii fei diwareꞌaugaa fei uꞌugaa ei mamamaꞌa, ei roꞌaa augaa panii roꞌou pafomu ei bauaniaa fei losuu.