Ei Bauaniaa Losuu ma ei Paniaa Pani
3
Sifeni hepalo rawaniꞌa warea: nabaa nemea na paꞌi naranarana ba hia bauaniaa fei losuu,a i nunuminaa hepalo rawaniꞌa bigiꞌa. 2 Ma mei bauaniaa fei losuu, roneiꞌaa labagipaꞌaa hepalo tatana, i nei paꞌi hemea ua harona, nei walalo sibana, neiꞌaida apitaia, nei fahonua, neiꞌaida fagutafarawaniaa ramaꞌa, na hawia ba i feroi, 3 lomi naꞌo hunu poapoai, abaa panii baꞌananarai, maꞌuaa nei madumui, lomi na harea ma lomi na haguaa mugoo poꞌi. 4 Inei sualaparaa ei ramaꞌaa humuna ma fanunuia ba ei naꞌuna, rona guainia fininaa maꞌaua. 5 Nabaa nemea lomi na omaꞌapaꞌaa ei ramaꞌaa humuna, batanai ba i omaꞌapaꞌaa fei losuu mei Haidaa? 6 Lomi na rawani ba we waduꞌaiana ma i ponitoo bigiꞌa hamatee i famamagugui ma i tonaa fei dududua, ana fei na tonia mei haniꞌu. 7 Inei paꞌi rawaniꞌa harana aꞌa ei ramaꞌa ano ba lomi i pasi aꞌa ei i famamafaia ma wagii fei lepoo mei haniꞌu.8 Ana aleꞌei, ei paniaa pani. Ana ronei fahonua, ronei faꞌuai, roneiꞌaa hunu watauda wine ma roneiꞌaa bigifasifi ba ro to manumanu. 9 Ronei panarofaa ei waiwai warea na faꞌuai wagii fei narafaweꞌia fininaa fei naranara ba lomi rona tata. 10 Oneidoꞌo manimaꞌaa roꞌou ma nabaa lomi manumanu aꞌa roꞌou, na rawani ba roꞌou paniaa pani.
11 Ana aleꞌei ei haroo roꞌou,b ronei fahonua, roneiꞌaa wiwitoi, maꞌuaa ronei famadumui ma onei aida ba lomi roꞌawe bigifata.
12 Hemea paniaa pani nei paꞌi hemea ua harona ma nei sualaparaa ei naꞌuna ma ei ramaꞌaa humuna. 13 Ei rona bigifarawani, i paꞌi rawaniꞌa haraa roꞌou ma baua oꞌuga aꞌa fei weꞌiaa naranaraa roꞌou aꞌa Christ Jesus.
14 Nunumiau ba amii maꞌabatafainio maꞌuaa uꞌei neꞌifanio feni ba 15 nabaa ina lawagi talau ona aidadii ba batanai fei maumau ronei bigiꞌia ena ramaꞌa wagii fei humuu mei Haidaa, fei losuu mei Haidaa, mei i oalao, fei duge ma fasuꞌufufugoi fei faꞌuaia. 16 Naminapaꞌaa faꞌua ba fei manumanuu mei Haidaa, fei na ude opaꞌai, na waiwai—fei ba:
Hiac na faꞌarewa fininaa hudi ununa,d
fei Spiriti na famaꞌaia ba hia na wanewane
ma rona fanunuia ei aloꞌalo,
ma ei ramaꞌa na uꞌugia aꞌa minaa ei baua gufu.
Ei ramaꞌaa feni ano, rona narafaweꞌi aꞌana,
ma ina dinaa pafea fininaa hawerana.