Ei Feroia wagii fei Losuu
2
Siꞌei, doꞌo rawarawa uꞌei iꞌigifaweꞌi aꞌamu ba onei bigiꞌaa eꞌeni: ei iꞌigaia, ei lafulafua, ei warewarea aꞌa mei Haidaa uaa hefiꞌadiai ma warea ‘ta’ ma onei bigiꞌia ba i hadumaa minaa ei ramaꞌa— 2 onei lafulafunaa ei hapara mawe minaa ei bauaniaa ramaꞌa ba fei gutanaa oꞌou nei rawani ua fininaa fei gutafarawania aꞌa minaa ei maumau mei Haidaa ma maumau apunaia. 3 Eꞌei manumanu eꞌei na rawani ma na faniꞌeniꞌeaa mei Haidaa, mei Fatelaꞌanaa oꞌou, 4 mei na nunuminaa minaa ei ramaꞌa ba ronei tela ma apaꞌaa fei faꞌuaia. 5 Uaa na paꞌi hemea ua Haidaa ma hemea ua ramaꞌa i fawanewaneaa watolaa mei Haidaa ma ei ramaꞌa, Christ Jesus, 6 mei na fanaa anaia aleꞌei ponoponoo minaa ei ramaꞌa—aleꞌei hepalo uꞌuga na nomai aꞌa fei rawaniꞌa au. 7 Ma aꞌa fei, ina rafeinau ba yau talaitonaa warea ma ana yau apostle. A warefaꞌuai; abaa fi sifisifi maꞌuaa, aleꞌei hemea feroiaa ei Gentile wagii fei narafaweꞌia, fei na faꞌuai. 8 Una nunuminia ba ei ramaꞌa hitani gufu, ronei uduginaa ei panii roꞌou, ei na apunai aꞌa fei lafulafua ma neiꞌaa paꞌi fisibaia o fihareia.
9 Ana una nunuminia ba ei pifine, ronei rafefarawani susuu roꞌou, i neiꞌaa lelefo hudi unuu roꞌou ma roneiꞌaa au watauda haweraa hugoo tabaa roꞌou o au gold o pearl o ei susu na rata ponoꞌana 10 maꞌuaa, aꞌa ei rawaniꞌa bigiꞌa aleꞌei tamanu na rawani aꞌa ei pifine, ei rona ware ba rona neneraa mei Haidaa.
11 Ei pifine ronei tonaa fei mau famadumua ma fafefefanaa. 12 Lomi na rawani aꞌau ba nemea pifine nei feroi o famamoaa nemea wawane; inei gutafamadumu ua. 13 Uaa doꞌorawarawa mamaraa, Adam; nenena, Eve. 14 Ma Adam, abaa hia na pasi aꞌa fei sifisifiꞌa, uaa mei pifine na pasi wagina ba ina oanaa hafeloꞌa. 15 Maꞌuaa wagii fei waninia, ei pifine, roꞌaa telaa nabaa rona panarofalao fei narafaweꞌia, fei hagua ma fei mau fafaꞌaraia fininaa fei mau fanimaꞌaa ei manumanu.