2 I dinaa aꞌa Timothy mena paꞌaa naꞌuu wagii fei narafaweꞌia:

Fei rawaniꞌa, faloloaꞌia ma gutafarawania noramiaa roꞌou aꞌa mei Haidaa, mei Ama mawe Christ Jesus, mei Fasuu oꞌou.

3 Ana aleꞌei fei iꞌigifaweꞌiau aꞌamu ei uꞌa dinaa Macedonia ba onei guta yei Ephesus ba onei warefaweꞌi aꞌa hefiꞌa ramaꞌa ba roneiꞌaa feroidinaa ei sifisifi feroia 4 ma roneiꞌaa neneraa fei mau uꞌuga abaa faꞌua ma ei manumanu ba batanai ei maumau ei upuu roꞌou. Eꞌei manumanu eꞌei na faꞌasiꞌanaa fihareia; aꞌa ba na faꞌasiꞌanaa fei bigiꞌaa mei Haidaa, fei i nomai uaa fei narafaweꞌia. 5 Fei pelee naranaraa fei warea fei, fei hagua, fei i nomai aꞌa fei mau fafaꞌaraia fininaa fei naranara ba lomi ona tata ma fei narafaweꞌia, fei ina faꞌuai. 6 Hefiꞌa, rona talaifarapa aꞌa fei ma momoꞌainaa aꞌa ei warea lomi hanuna. 7 Rona nunumai ba roꞌou feroiaa fei law maꞌuaa lomi rona apaꞌaa tamanu rona wareia ma tamanu ronapaꞌaa warefaweꞌi wagina.

8 Ona aida ba fei law na rawani nabaa nemea na apaꞌia ba batanai fei bigiꞌana. 9 Ana ona aida ba fei law, abaa manumanuu ei wanewanea maꞌuaa ei barafea ma ei fadugea, ei lomi rona apaꞌaa mei Haidaa, ei hafeloꞌa, ei lomi rona fafaꞌarai ma ei lomi losuu roꞌou, ei rona foꞌafamaꞌeaa ei ama ma inaa roꞌou, ei rona foꞌafamaꞌe, 10 ei fiharoharoipaꞌaia, ei narafafeloa, ei rona alo ma pono humuwa, ei sifisifi ma ei ro sifiꞌaa ei fadududua ma aꞌa tamanudiai lomi na neneraa tamanu na wanewane wagii ei feroiaa mei Haidaa, 11 ei na neneraa fei haweraa fei rawaniꞌa wareaa mei Haidaa, mei na paꞌi hawegiana, fei na fifaninaa paniu.

12 Una ware ‘ta’ aꞌa Christ Jesus, mei Fasuu oꞌou, mei na fani faufau aꞌau uaa na nara ba una oafagugu ma ina rafeinau aꞌa fei bigiꞌana. 13 Faꞌua ba mina, una warefafeloaa mei Haidaa ma yau hemea haperara ma hemea panii baꞌananarai, maꞌuaa, ina faloloaꞌinau uaa lomi una aida ba na bigiꞌaa tamanu ma ana lomi na weꞌi fei naranarau. 14 Fei rawaniꞌaa mei Fasuu oꞌou ina ipinaa pafou fininaa fei weꞌiaa naranara ma fei hagua, guapaloeni, manumanuu Christ Jesus.

15 Sifeni hepalo rawaniꞌa warea ba oneipaꞌaa nenegia: Christ Jesus na nomai yeni malagufu ba i fatelaꞌanaa ei hafeloꞌa ma napaꞌaa ratanaa yau haiꞌou. 16 Maꞌuaa sifei fei paꞌafina ba ina faloloaꞌinau, uaa ba i aꞌau, yau mei paꞌaa ramaꞌa hafelo, Christ Jesus i famaꞌaa fei ofasisiana lomi i pedutoo aleꞌei famaꞌamaꞌaa ei ba roꞌaa narafaweꞌi aꞌana ma tonaa fei harenua lomi i pedutoo. 17 Siꞌei aꞌa mei Hapara, mei i oalao, mei lomi ba i maꞌe, mei lomi ona fanunupaꞌia, mei ana unaia Haidaa, i ude i aꞌana fei honua ma fei hawera ranimai ranimai. Amen.

18 Mena naꞌuu Timothy, uꞌei fanio eni feroia, eni na fiboꞌii aꞌa ei diwareꞌauga, ei i uꞌugio ma fei neneramu eꞌei, oꞌaa foꞌa wagii fei rawaniꞌa foꞌaa 19 ma panarofaa fei narafaweꞌia fininaa fei naranara, fei lomi na marapu. Hefiꞌa, rona fadugeaa eꞌei manumanu eꞌei ma fei narafaweꞌiaa roꞌou aleꞌei hepalo wa na tafe. 20 Dupuaa roꞌou, Hymenaeus ma Alexander. Una fifaninaa lagua i panii Satan ba lagunei to feroia wagina ba laguneiꞌaa warefafeloaa mei Haidaa.