6
Minaa ei rona humuwai, roneimina maꞌauaa ei fasuu roꞌou ba fei haraa mei Haidaa ma fei feroiaa oꞌou, lomi roꞌaa warefafeloia hefiꞌa. 2 Ei fasu, ei rona narafaweꞌi, ei humuwaa roꞌou, roneiꞌaa nara ba lomi roꞌaa maꞌauaa roꞌou uaa lofuu roꞌou. Agia, roneimina bigifaweꞌidiai aꞌa roꞌou, hamatee rona bigihadumaa ei narafaweꞌia, uaa ei, tafii roꞌou. Ma siꞌei ei feroia onei feroinia aꞌa roꞌou ba ronei nenegia. Fei Haguaa Mugoo Poꞌi
3 Hini nemea i feroifasifi wagii ei manumanuu losuu ma barafeaa fei wanewaneaa feroiaa mei Fasuu oꞌou Jesus Christ ma ei maumau feroiaa mei Haidaa, 4 hia na mamagugu ma lomi na apaꞌaa hepalo manumanu. Ina paꞌi hafeloꞌa naranara wagii watauda awataa ma fiharei wagii ei paolaa warea na faꞌasiꞌanaa punepunea, fifiꞌii unu, wiwitoi, hafeloꞌa naranara 5 ma ranimai na paꞌi fisibaia watolaa ei rona narafafelo, ei rona fapaꞌainaa fei warea na faꞌuai ma rona nara ba fei maumau mei Haidaa, hepalo tala ba ro to mugoo poꞌi wagina.
6 Maꞌuaa hini na tonaa fei maumau mei Haidaa ma na hoꞌo ua, na tonaa hepalo baua manumanu. 7 Uaa ona waninimai pani ua ma ana loꞌe o notonaa hepalo manumanuu feni ano. 8 Maꞌuaa nabaa ona paꞌi duꞌua ma susu, onei fahoꞌo ua wagina. 9 Ei ba roꞌaa paꞌi watauda manumanu, rona pasinaa fei manimania ma fei alabeꞌa ma wagii watauda ei mau poapoaia ma ei hafeloꞌa nunumaia, ei i fafeloaa ramaꞌa ma famaꞌeaa ei roꞌou. 10 Uaa fei haguaa mugoo poꞌi paꞌaa fafasuii watauda ei maumau hafeloꞌa. Hefiꞌa, ba roꞌaa paꞌi mugoo poꞌi, rona farapadiꞌininaa fei narafaweꞌia ma tonaa watauda fiꞌia wagina.
Paul na Warefaweꞌi aꞌa Timothy
11 Maꞌuaa yoi, mena ramaꞌaa gufuu mei Haidaa, onei faraua aꞌa minaa eꞌei ma labaginaa fei wanewanea, ei maumau mei Haidaa, fei narafaweꞌia, fei hagua, fei apitaia ma fei famadumuia. 12 Foꞌa wagii fei rawaniꞌa foꞌaa fei narafaweꞌia. Panarofaa fei harenua lomi i pedutoo wagii tamanu i rafeinio ma ona ugainia i pudaa watauda. 13 I pudaa mei Haidaa, mei i fani fawewenii minaa ei manumanu ma i pudaa Christ Jesus anaa, mei na u maꞌaa Pontius Pilate ma warefarawani aꞌana, uꞌei warefaweꞌi aꞌamu ba 14 onei nenegifarawaniꞌuaiaa fei warea, lomi maꞌida barafea wagina nopaꞌaloo fei noramiaa mei Fasuu oꞌou Jesus Christ, 15 mei i fanoraiamai mei Haidaa aꞌa fei paꞌaa auna—mei ana uniana Bauana na paꞌi hawegiana, mei Haparaa ei hapara, mei Fasuu ei fasu, 16 mei uniana lomi i maꞌetoo, mei i guta aꞌa fei weꞌai lomi o farafiꞌipaꞌi wagina, mei lomi hemea na fanunupaꞌia ma ana lomi roꞌaa fanunuia. Ranimai i aꞌana nei ude fei honua ma faufau. Amen.
17 Warefaweꞌi aꞌa ei rona paꞌi watauda manumanu i aꞌa feni ano eꞌeni ba roneiꞌaa mamagugu o augaa ei oꞌonaia unuu roꞌou wagii ei manumanuu roꞌou, ei ba i fahamamaguaa roꞌou, maꞌuaa augaa ei oꞌonaia unuu roꞌou aꞌa mei Haidaa, mei imina fanaa oꞌou minaa ei manumanu ba i faniꞌeniꞌeaa oꞌou. 18 Warefaweꞌi aꞌa roꞌou ba ronei bigiꞌaa ei rawaniꞌa bigiꞌa ba nei watauda ei rawaniꞌa bigiꞌaa roꞌou ma ba ronei panii arerei ma fifaninaa ei manumanu rona paꞌi. 19 Aꞌa fei tala fei, ro au rawaniꞌa manumanuu roꞌou i pafea aleꞌei fasuꞌufufugoi fei au i nomai ba roꞌapowe panarofaa fei harenua, fei paꞌaa harenua.
20 Timothy, omaꞌafarawaninaa tamanu na udenaa panimu. Faraua aꞌa ena warewarea abaa wareaa mei Haidaa ma ei fadugedugea wagii ei apaꞌa, ei rona warefasifi ba ei paꞌaa apaꞌa, 21 ei apaꞌaa hefiꞌa rona wareia ma wagii eꞌei, rona farapadiꞌininaa fei narafaweꞌia.
Fei rawaniꞌa i ude aꞌamu.