Fei Mau Gutanaa Oꞌou nei Faniꞌeniꞌeaa mei Haidaa
4
Siꞌeni eni fapopoꞌii wareaa haiꞌou aꞌa hamuꞌou, ena lofu. Haiꞌouna feroidigaa hamuꞌou ba batanai hamonei guta ba i niꞌeniꞌe mei Haidaa, ana aleꞌei hamoꞌei guta eꞌeni. Eꞌeni haiꞌouꞌei iꞌigai ma warefaweꞌi aꞌa hamuꞌou aꞌa mei Fasu Jesus ba hamonei faꞌapoinia. 2 Uaa hamona aidadii tamanu haiꞌouna feroinia wagii fei foraforaa mei Fasu Jesus ba hamonei bigiꞌia.3 Fei nunumiaa mei Haidaa ba hamonei fafafaꞌarai ma farapa aꞌa ei fitatafipaꞌaia; 4 ba hememea hamuꞌou nei aida fei mau omaꞌaa fei hudi ununaa aleꞌei ba ina apunai ma rawani ua, 5 abaa aleꞌei laraa huwii ei roromaa, ei lomi rona apaꞌaa mei Haidaa 6 ma wagii fei, nemea lomi i fafeloaa mei lofuna o fababibiyeiꞌuaia. Mei Fasu, ipaꞌaa fanimaꞌaiaa ei ramaꞌa rona bigiꞌaa ei mau hafeloꞌa aleꞌei, ei haiꞌouna warewagiꞌidigaa hamuꞌou. 7 Uaa mei Haidaa abaa na lalaꞌaa oꞌou ba onei loloa, maꞌuaa ba onei gutafafafaꞌarai ua. 8 Siꞌei, hini i barafeaa fei feroia fei, aꞌa ba ifi barafeaa ramaꞌa, maꞌuaa mei Haidaa, mei i fanaa hamuꞌou fei Spiriti Apuna.
9 Ma aꞌa fei mau haguaa ei filolofui, lomi ba haiꞌouꞌaa neꞌifanidinaa hamuꞌou, uaa ana hamuꞌou, hamona todigaa fei feroiaa mei Haidaa ba batanai hamona fihagui. 10 Ma ana faꞌua ba hamona haguaa ei lofu yei tadiweꞌaiaa Macedonia. Maꞌuaa haiꞌouꞌei iꞌigifaweꞌi aꞌa hamuꞌou, ena lofu, ba hamonei faꞌapoidinaa fei haguaa hamuꞌou aꞌa roꞌou.
11 Hamonei augaa naranaraa hamuꞌou aꞌa fei ba hamonei gutafama-dumu, abaa papaꞌaa manumanuu hefiꞌa, maꞌuaa biginaa ana panii hamuꞌou aleꞌei haiꞌou warefanaa hamuꞌou 12 ba fei gutanaa hamuꞌou hepapalo arewaa nei rawani ua i pudaa ei ramaꞌaa feni ano ma abaa minaa guta ua panii hefiꞌa.
Fei Noramiaa mei Fasu
13 Ena lofu, lomi haiꞌouna nunuminia ba hamoꞌaa polatabai aꞌa ei rona maꞌigu, o ba hamoꞌaa gutafaloloaꞌi aleꞌei ei lomi rona paꞌi oꞌonaia unu. 14 Oꞌounapaꞌaa aida ba Jesus na maꞌe ma asiꞌadiai ma siꞌei, ona aida ba mei Haidaa i dugifipuinamii Jesus mawe ei rona maꞌe aꞌana. 15 Ana aleꞌei fei wareaa mei Fasu, haiꞌouꞌei warefanaa hamuꞌou ba oꞌou eni, ana oifi guta nopaꞌaloo fei noramiaa mei Fasu, paꞌaa lomi oꞌadoꞌo nonoo aꞌa ei rona maꞌigu. 16 Uaa mei Fasu, ana hia iwe norai i pafea fininaa fei warefabauaniana, fininaa fei lao mei paꞌaa bauaniaa ei aloꞌalo ma fininaa fei haroharofaa fei maniwaa mei Haidaa ma ei maꞌea aꞌa Christ, rodoꞌo asiꞌaa. 17 Nenee fei, oꞌou eni ana oifi guta, eni dufu, owe nobapaꞌaloo roꞌou i aꞌa ei papalei ba oꞌaree suafinaa mei Fasu i haroo pafea. Ma siꞌei, opowemina gutafipui aꞌa mei Fasu ranimai, ranimai. 18 Siꞌei, hamonei faꞌasiꞌanaa naranaraa hamuꞌou aꞌa eni warea eni.