3
Siꞌei, ba fai lomi haiꞌouna utofaꞌaipaꞌia, haiꞌounawe nara ba haiꞌoupoꞌo guta ua yei Athens. 2 Haiguna aloaa Timothy, mei lofuu oꞌou, mei rarafii haigua aꞌa fei bigiꞌaa mei Haidaa,a ba haiguꞌaa fatalainaa fei rawaniꞌa wareaa Christ ba inei faweꞌia ma faꞌunuwenuweaa naranaraa hamuꞌou aꞌa fei narafaweꞌiaa hamuꞌou 3 ba lomi nemea i maꞌaurere wagii ei manimania. Hamonamina aidafarawani ba oꞌaa tonaa ei manimania ei. 4 Uaa ei oꞌou gutafipui, haiꞌounaꞌo warefanaa hamuꞌou ba haiꞌouꞌaa tonaa haperaraia. Ma ana naree aleꞌei wareaa haiꞌou ma hamona apaꞌia. 5 Uaa wagii fei, fai lomi una gutapaꞌi, siꞌei a aloawii fei iꞌigaia ba batanai fei narafaweꞌiaa hamuꞌou. Una mamaꞌau ba mei manimania ipoꞌo manipaꞌaa hamuꞌou wagii hefiꞌa tala ma fei bigiꞌaa haiꞌou aꞌa hamuꞌou, lomi hanuna.Fei Wareaa Timothy na Faꞌunuwenuweaa Paul
6 Maꞌuaa Timothy, ana eni hadiweꞌaianamai aꞌa hamuꞌou ma na warefanaa haigua fei rawaniꞌa warea ba batanai fei narafaweꞌia ma haguaa hamuꞌou. Ina warefanaa haigua ba ranimai, hamona narahadiweꞌinaa ei rawaniꞌaa haigua ma ba nunumiaa hamuꞌou ba hamuꞌou maꞌa haigua ana aleꞌei haigua, ba haigua maꞌa hamuꞌou. 7 Siꞌei, ena lofuu, wagii minaa ei naranara watauaa haigua ma haperararaia haiguna tonia, fei naranaraa haigua na unuwenuwe uaa fei narafaweꞌiaa hamuꞌou. 8 Uaa eꞌeni haigunawe gutafarawani ua, hamatee hamona ufaweꞌi aꞌa mei Fasu. 9 Lomi haiguꞌaa warepaꞌia fei warea ‘ta’ aꞌa mei Haidaa wagii fei unuwenuwea haiguana paꞌi inamoaa mei Haidaa uaa hamuꞌou. 10 Poi ma arewaa haigunamina lafulafu ba haiguawii maꞌadiai hamuꞌou ma fanaa hamuꞌou tamanu ba i faweꞌiaa ei narafaweꞌiaa hamuꞌou.
11 Ma na rawani ba mei Haidaa, mei Amaa oꞌou mawe mei Fasuu oꞌou Jesus i fani talaa haiꞌou ba haiꞌou nomai, mi maꞌa hamuꞌou. 12 Na rawani ba mei Fasu i fagipeia ma faꞌapoidinaa fei fihaguiaa hamuꞌou ma aꞌa hefiꞌadiai ana aleꞌei fei haguaa haiꞌou hamuꞌou. 13 Na rawani ba i faweꞌiaa naranaraa hamuꞌou ba lomi hepalo tataa hamuꞌou ma hamonei fafaꞌarai inamoaa mei Haidaniaa oꞌou, mei Ama, ena na nomai mei Fasuu oꞌou Jesus fipui aꞌa ei apunaiana.