Fei Bigiꞌaa Paul yei Thessalonica
2
Ena lofuu, hamona aida ba fei tatalaiaa haiꞌou aꞌa hamuꞌou, na paꞌi hanuna. 2 Haiꞌounadoꞌo to fiꞌia ma haperaraia yei Philippi, aleꞌei hamona aidadii, maꞌuaa wagii fei hadumaa mei Haidaniaa oꞌou, faꞌua ba na paꞌi baua fadugedugea wagina, maꞌuaa haiꞌouna uꞌufaniꞌuaiawii hamuꞌou fei rawaniꞌa warea. 3 Uaa fei iꞌigiaa haiꞌou hamuꞌou, abaa asiꞌanamai aꞌa ei tata o hafeloꞌaa naranara ma ana abaa haiꞌou fi sifiꞌaa hamuꞌou. 4 Agia, hamatee mei Haidaa na ugainaa haiꞌou wagii fei rawaniꞌa warea ba haiꞌounei uꞌugia. Abaa haiꞌoufi faniꞌeniꞌeaa ramaꞌa, maꞌuaa mei Haidaa, mei i maniaa ei naranaraa haiꞌou. 5 Hamona aidadii ba lomi haiꞌouna hofeaa hamuꞌou o bigifarawani ba oꞌopaꞌai ei maumau wawaꞌai poa—ma mei Haidaa na apaꞌaa fei. 6 Lomi ba haiꞌouna nunuminaa udugiaa ramaꞌa—hamuꞌou o hefiꞌadiai.Siꞌei ba haiꞌou, apostle Christ, nabaa haiꞌouna nunumai, haiꞌou fani awataa aꞌa hamuꞌou, 7 maꞌuaa haiꞌouna famadumui aꞌa hamuꞌou, ana aleꞌei hemea ina aꞌa ei naꞌuna. 8 Siꞌei ba haiꞌounapaꞌaa haguaa hamuꞌou, haiꞌouna niꞌeniꞌe ba haiꞌouna uꞌugaa fei rawaniꞌa wareaa mei Haidaa aꞌa hamuꞌou ma gutafipui aꞌa hamuꞌou anaa, uaa haiꞌounapaꞌaa haguaa hamuꞌou. 9 Ena lofu, woro ana hamona nonominia, ei baua bigiꞌaa haiꞌou ma ei awataa haiꞌou uaa hamuꞌou; haiꞌouna bigibigi poi ma arewaa ba lomi haiꞌou fani awataa aꞌa nemea ena haiꞌouna uꞌufanaa hamuꞌou fei rawaniꞌa wareaa mei Haidaa.
10 Hamona fanunuia ma mei Haidaa anaa ba batanai fei mau gutanaa haiꞌou dupuaa hamuꞌou ena narafaweꞌia ma ba haiꞌouna fafaꞌarai, wanewane ma lomi hepalo tata. 11 Uaa hamona aida ba haiꞌouna suahadumaa hememea ana aleꞌei hemea ama aꞌa ei naꞌuna. 12 Hamatee haiꞌouna faꞌunuwenuweaa ei naranaraa hamuꞌou, farawaninaa hamuꞌou ma sualaparaa hamuꞌou ba hamonei talaifarawani i pudaa mei Haidaa, mei i lalaꞌaa hamuꞌou ba hamonei oa i haroo fei haparaiana ma hawerana.
13 Ma ana haiꞌounaꞌaida ware ‘ta’ aꞌa mei Haidaa, uaa, ei hamoꞌaa tonaa fei wareaa mei Haidaa, fei hamona guainia aꞌa haiꞌou, lomi hamona tonia aleꞌei wareaa ramaꞌa, maꞌuaa ba paꞌaa wareaa mei Haidaa, fei ifi bigi laloo iaa hamuꞌou, hamuꞌou ena narafaweꞌia. 14 Uaa hamuꞌou, ena lofu, hamona neneraa fei maumau ei losuu mei Haidaa yei Judea, ei rona oafipui aꞌa Christ Jesus. Hamona to fiꞌia aꞌa ei gufuu hamuꞌou ana aleꞌei eꞌei losuu eꞌei, rona tonia aꞌa ei Jew, 15 ei rona foꞌafamaꞌeaa mei Fasu Jesus mawe ei mamamaꞌa ma tetefaꞌasiꞌanaa haiꞌou. Lomi rona faniꞌeniꞌeaa mei Haidaa ma rona siba aꞌa minaa ei ramaꞌa 16 ba roꞌaa pauninaa haiꞌou ba haiꞌou neiꞌaa wareware aꞌa ei Gentile ba roꞌaa tela. Aꞌa fei, ranimai, ronaꞌaida fapepesuaa ei hafeloꞌaa roꞌou. Fei sibaa mei Haidaa nawea nomai pafoo roꞌou.
Fei Nunumiaa Paul ba i Maꞌa ei Thessalonica
17 Maꞌuaa ena lofuu, laloo maꞌidei au roꞌaa fiꞌalaginaa oꞌou, lomi rona fiꞌalagipaꞌaa ei naranaraa oꞌou. Ma wagii fei au fei, siꞌei ba fei ude nunumiaa haiꞌou aꞌa hamuꞌou, haiꞌouna labagifaweꞌi tala ba haiꞌouꞌaa maꞌa hamuꞌou. 18 Uaa, ba haiꞌoupaꞌamii maꞌa hamuꞌou—paꞌaa yau Paul—watauda au ba a nomai, maꞌuaa Satan na lawaraa talaa haiꞌou. 19 Uaa tamanu fei na faꞌoꞌonainaa unu, o faniꞌeniꞌe, o fei tao haiꞌou, fei ba haiꞌou faꞌupeꞌupei inamoaa mei Fasuu oꞌou Jesus ena na nomai? Haa, aꞌa ba hamuꞌou? 20 Hiꞌi. Hamuꞌou ena hawera ma faniꞌeniꞌeaa haiꞌou.