Fei rawaniꞌa ma fei gutafarawania i ude aꞌa hamuꞌou.^b

2 Ranimai haiꞌounaꞌaida ware ‘ta’ aꞌa mei Haidaa uaa hamuꞌou ma lalaꞌaa hamuꞌou aꞌa ei lafulafuaa haiꞌou. 3 I maꞌaa mei Haidaa, mei Amaa oꞌou, haiꞌounaꞌaida nonominaa fei bigiꞌaa hamuꞌou, fei i nomai uaa fei narafaweꞌia, fei i faꞌasiꞌania fei hagua ma fei ba lomi hamona faꞌadudu uaa na oꞌonai unuu hamuꞌou aꞌa mei Fasuu oꞌou Jesus Christ.

4 Uaa, haiꞌouna aida, ena lofu, hamuꞌou ena haguu mena Haidaa ba ina rafeinaa hamuꞌou, 5 uaa fei rawaniꞌa wareaa haiꞌou, lomi na noꞌuamai aꞌa hamuꞌou aleꞌei warea ua. Agia, ana na paꞌi faufauna fininaa fei Spiriti Apuna ma na bigi laloo iaa hamuꞌou ba paꞌaa faꞌua. Ma hamona aida ba fei gutanaa haiꞌou aꞌa hamuꞌou ba fararawani hamuꞌou. 6 Hamona neneraa fei maumau haiꞌou ma fei maumau mei Fasu; hamona tonaa baua fiꞌia, maꞌuaa hamona tonaa fei warea fininaa niꞌeniꞌea, fei fanaa fei Spiriti Apuna. 7 Ma hamuꞌou aleꞌei famaꞌamaꞌa aꞌa ei narafaweꞌia yei Macedonia ma Achaia. 8 Abaa uniaa fei ba hamona uꞌugaa fei wareaa mei Fasu yei Macedonia ma Achaia—minaa ei gufu tadiweꞌai, ronawe aidadii ba namina weꞌi naranaraa hamuꞌou aꞌa mei Haidaa. Siꞌei, lomi ba o warewarediai wagina, 9 uaa ana roꞌou, rona uꞌu ba batanai fei fagutanaa hamuꞌou haiꞌou. Rona warefanaa haiꞌou ba hamona momoꞌinaa aꞌa mei Haidaa, diꞌininaa ei haidaa sifisifi ba hamoꞌaa bigiꞌaa fei bigiꞌaa mei faꞌua Haidaa, mei fi guta. 10 Ma rona uꞌu ba hamoꞌaa gutaꞌomaꞌaa fei noramiaa mei Naꞌuna pafea, mei ina faꞌasiꞌania aꞌa fei maꞌea—Jesus, mei i fatelaiaa oꞌou aꞌa fei sibaa, fei ifi nomai.