5
Siꞌei, ena lofu, wagii ei au ma arewaa, lomi paꞌafina ba haiꞌou neꞌifanaa hamuꞌou, 2 uaa hamona aidafarawanidigia ba fei arewaa mei Fasu, iwe nomai aleꞌena nemea fafanao na nomai na poi. 3 Ena rona ware aleꞌena ei ramaꞌa ba, “Gutafara-wani ua ma lomi manumanu,” fei hafeloꞌa i nopoponinamii roꞌou aleꞌei fiꞌiaa mei pifine ba i wanini ma lomi rowe telapaꞌi. 4 Maꞌuaa hamuꞌou, ena lofu, abaa hamuꞌou i laloo fei rorormaa ba fei arewaa fei, aleꞌei noramiaa nemea fafanao ba i fabaꞌarofoaa hamuꞌou. 5 Minaa hamuꞌou naꞌuu fei weꞌai ma naꞌuu fei arewaa. Aꞌa ba oꞌou manu-manuu fei poi o fei roromaa. 6 Siꞌei, oneiꞌaa aleꞌei hefiꞌa, ei rona maꞌigu, maꞌuaa onei ofafaufau ma apitainaa ana oꞌou. 7 Uaa ena ramaꞌa rona maꞌigu, rona maꞌigu na poi ma ena rona hunu poapoai, rona hunu na poi. 8 Maꞌuaa, siꞌei ba oꞌou manumanuu fei arewaa, onei apitainaa ana oꞌou ma hawai aꞌa fei narafaweꞌia ma fei hagua aleꞌei rapirapii niniwai ma fei oꞌonaia unuu fei telaꞌana aleꞌei tao rapirapii taba. 9 Uaa abaa na rafeinaa oꞌou mei Haidaa ba onei tonaa ei sibaa, maꞌuaa ba onei to fei telaꞌana aꞌa mei Fasuu oꞌou Jesus Christ. 10 Ina maꞌe uaa oꞌou ba nabaa ona werawera o maꞌigu, onei oafipui aꞌana. 11 Siꞌei, faꞌunuwe-nuweaa naranaraa hememea ma fipalagii ana aleꞌei hamoꞌei bigiꞌia eni.
Ei Aꞌapoo Feroia
12 Ma haiꞌouꞌei iꞌiginaa hamuꞌou, ena lofu, ba hamonei maꞌauaa ei rona bigifaweꞌi dupuaa hamuꞌou, ei rona famamoaa hamuꞌou aꞌa mei Fasu ma suahadumaa hamuꞌou. 13 Poronaa roꞌou pafea fininaa hagua, uaa fei bigiꞌaa roꞌou. Hamonei gutafirawanii ua. 14 Ma haiꞌouꞌei iꞌigifaweꞌi aꞌa hamuꞌou ena lofu ba hamonei aweinaa ena rona tamafoi, faꞌunuwenuweaa ena mamafaa, hadumaa ei rona rafilele ma fawiwiꞌai fipui aꞌa minaa ei ramaꞌa. 15 Apuna fafelo aꞌa mei na fafelo aꞌa hamuꞌou, maꞌuaa ranimai, hamonei firawanii ana aꞌa hamuꞌou mawe aꞌa hefiꞌadiai.
16 Ranimai hamonei wiwiwidi; 17 hamoneiꞌo lafulafu; 18 hamuꞌou ena hamona oafipui aꞌa Christ Jesus, hamonei ware ‘ta’ aꞌa minaa ei manumanu, uaa sifei fei nunumiaa mei Haidaa.
19 Apuna pereaa fei hafii fei Spiriti; 20 apuna narafasiba aꞌa ei diwareꞌauga. 21 Manimaꞌaa minaa ei manumanu. Panarofaa tamanu na rawani. 22 Faraua aꞌa ei manitoai hafeloꞌa.
23 Na rawani ba mei Haidaa, ana unaia Haidaniaa fei gutafarawania, i fafaꞌarainaa hamuꞌou ranimai. Na rawani ba minaa fei spiritii hememea hamuꞌou, fei naranaraa hamuꞌou ma fei hudi unuu hamuꞌou nei ude fafaꞌarai ua aꞌa fei noramiaa mei Fasuu oꞌou Jesus Christ. 24 Mei i lalaꞌaa hamuꞌou na oafagugu ma ipowe bigiꞌia.
25 Ena lofu, lafulafunaa haiꞌou. 26 Famafufuoinaa minaa ei lofu aꞌa hefaa mau hatofaa puda, fei na apunai. 27 A warefaweꞌi aꞌa hamuꞌou i pudaa mei Fasu ba hamonei igoaa feni neꞌia aꞌa minaa ei lofu.
28 Fei rawaniꞌaa mei Fasuu oꞌou Jesus Christ nei oa aꞌa hamuꞌou.