Fei Meifii Paul ma fei Oroꞌoroaa Lamii Pigiona
12
Unei warefaꞌaguꞌaguꞌualao. Lomi rawaniꞌana wagina, maꞌuaa unei uꞌugaa ei aleꞌei mefi ma ei na faꞌarewaiaa mei Fasu. 2 Una apaꞌaa hemea ramaꞌa maroaa Christ, mei hefua ma obao igisimasi i didii na dinaa aꞌa fei faꞌoduaiaa gufu pafea. Ina oa aꞌa fei hudi ununa, o loꞌe, lomi una aida—mei Haidaa na aida. 3 Ma una aida ba mei ramaꞌa mei—aꞌa fei hudi ununa, o loꞌe, lomi una aida, maꞌuaa mei Haidaa na aida— 4 ina dinaa aꞌa fei fananamaiaa gufu. Ina guainaa hefiꞌa manumanu lomi i warepaꞌia, ei ba roneiꞌaa wareia ei ramaꞌa. 5 A uꞌugaa mei ramaꞌa aleꞌei fininaa mamagugua, maꞌuaa lomi ba a famamagugui ba yau batanai, maꞌuaa sifei ua ba batanai ei maraleleau. 6 Ma nabaa una warefaꞌaguꞌagu, aꞌa ba yau poapoa, uaa una warefaꞌuai. Maꞌuaa una gutafamadumu ba nemea neiꞌaa nara ba yau na pafeaidiai aꞌa tamanu ei una bigiꞌia o wareia. 7 Ma ba uneiꞌaa mamagugu uaa eni paꞌaa rawaniꞌa mefi, ina faꞌoroꞌoroaa lamii pigiou, hemea talaitonaa wareaa Satan ba i fafeloau. 8 Odupoa una iꞌigifaweꞌi aꞌa mei Fasu ba nei tonia aꞌau. 9 Maꞌuaa ina warefanau ba, “Fei rawaniꞌau na hawio, uaa fei faufau napaꞌaa mua ei ona maralele.” Siꞌei, awe warefaꞌaguꞌagui aꞌa ei maraleleau ba fei faufau Christ nei oa aꞌau. 10 Hamatee Christ, siꞌei a niꞌeniꞌe aꞌa ei maraleleau, aꞌa ei warefalalasiaa hefiꞌa yau, aꞌa ei hafeloꞌa ma haperaraia ma ei awataa. Uaa ei una maralele, na to faufau.
Paul na Naranara Watauda aꞌa ei Corinth
11 Una fafaiau aleꞌei hemea poapoa, maꞌuaa hamona susuninau wagina. Nabaa hamonadoꞌo warefarawaninau, ipowe rawani, uaa, lomi rona muainau ei “baua-apostle,” maꞌuaa lomi harau. 12 Tamanu ei na famaꞌaia ba apostle—ei hilala, ei fananawalaa puda ma ei foigia—una bigiꞌia i dupuaa hamuꞌou fininaa fei mau apitaia. 13 Ma hepalo manumanu una bigiꞌia aꞌa hefiꞌadiai losuu ma lomi aꞌa hamuꞌou, sifei ua ba lomi una fani awataa aꞌa hamuꞌou. Futoaa feni hafeloꞌau!
14 Eꞌeni ba uꞌamii bigiꞌaa fei faꞌodupoaiaa maꞌau hamuꞌou ma lomi ba a fani awataa aꞌa hamuꞌou, uaa ei nunumiau abaa ei manumanuu hamuꞌou, maꞌuaa nunumiau hamuꞌou. Uaa, ei baduu, lomi ba roꞌaa omaꞌaiaa ei ama ma inaa roꞌou, maꞌuaa ei ama ma ina, rona omaꞌiaa ei naꞌuu roꞌou. 15 Siꞌei, una niꞌeniꞌe ba uꞌa fapedugaa minaa ei mugoo poꞌi una paꞌi, uaa hamuꞌou ma ba a fanaa ana yau. Nabaa na gipelao fei haguau hamuꞌou, i paꞌailao fei haguaa hamuꞌou aꞌau? 16 Abaa a fani awataa aꞌa hamuꞌou. Maꞌuaa una forapaꞌaa pinee hamuꞌou, uaa rafeu bigiꞌaa ei mau fifigaia! 17 Haa, una fafeloaa hamuꞌou aꞌa hemea aloawiau aꞌa hamuꞌou? 18 Una iꞌigifaweꞌi aꞌa Titus ba nei dinaa aꞌa hamuꞌou ma una aloaa hemea lofuu haiꞌou aꞌana. Lomi na fafeloaa hamuꞌou Titus, na? Ma fei mau bigiꞌaa haiꞌou ma fei spiritii haiꞌou na fiminaꞌei.
19 Hamona naranara ba haiꞌouna wareaa pepei aꞌa haiꞌou? Haiꞌouna uꞌu i pudaa mei Haidaa aleꞌei ei maroaa Christ; ma minaa ei bigiꞌaa haiꞌou, ena rawaniꞌa tafiu, paꞌafina ba inei faweꞌinaa hamuꞌou. 20 Uaa, una maꞌau ba ena unawii maꞌa hamuꞌou, tamanu una nunuminia aꞌa fei maumau hamuꞌou, lomi uꞌawe fanunuꞌapaꞌia. Ma ana lomi hamowe fanunuꞌapaꞌau aleꞌei ei nunumiaa hamuꞌou. Una maꞌau ba i paꞌi ua fihareia, punepunea, sibaparararaia, fiꞌiꞌareia, warefafeloa, wiwitoia, mamagugua ma lomi firawania. 21 Una mamaꞌau ba ena una hadiweꞌidimai, mei Haidaniau i we fapududuau i maꞌaa hamuꞌou ma uꞌapowemina faloloaꞌi, uaa watauda, ei ronadoꞌo bigiꞌaa ei hafeloꞌa, lomi rona filoginaa naranaraa roꞌou wagii ei loloaa, ei fitatafipaꞌaia ma hafeloꞌa bigiꞌaa roꞌou.