Paul ma ei Apostle Sifisifi
11
Nunumiau ba hamonei guainaa hefiꞌa warefifigaiau; maꞌuaa hamoꞌei guainia eꞌeni. 2 Una paꞌi fei mau punepuneaa mei Haidaa aꞌa hamuꞌou. Una faꞌunai aꞌa hamuꞌou ba hamonei paꞌi hemea ua haroo hamuꞌou—mei Christ, ba uꞌa fanaa hamuꞌou aꞌana aleꞌei hemea pifine atawe hainofipui aꞌa hemea wawane. 3 Maꞌuaa una mamaꞌau, uaa ana aleꞌei ba na sifiꞌaa Eve fei waꞌa, ei naranaraa hamuꞌou, i faꞌasisidiꞌininaa fei ba hamona fafaꞌarai ma nenegiꞌuaiaa Christ. 4 Uaa, nabaa nemea i nomai aꞌa hamuꞌou ma na uꞌugaa hemea Jesus, abaa mei Jesus onadii uꞌugia, o nabaa hamona tonaa hepalo uꞌugai spiriti laraa fei hamona todigia, o guainaa hepalo uꞌugai rawaniꞌa wareaa laraa fei hamona guaidigia, nabaa aleꞌei, hamona toꞌuaia. 5 Maꞌuaa hamoneiꞌaa nara ba rona muainau ei “baua-apostle.” 6 Lomi una feroi aꞌa fei mau warewarea, maꞌuaa una paꞌi apaꞌau. Aꞌa minaa ei tala, haiꞌounamina faꞌarewaia aꞌa hamuꞌou ba una paꞌi apaꞌau. 7 Haa, na hafelo fei ba una fafafaunau pu aleꞌei ba uꞌa poronaa hamuꞌou pafea aꞌa fei ba una uꞌufanaa hamuꞌou fei rawaniꞌa wareaa mei Haidaa ma lomi ponoꞌau? 8 Hanuna aleꞌei ba una fafanaonaa hefiꞌadiai losuu, uaa una tonaa ei hadumaa roꞌou ma farawaninaa hamuꞌou. 9 Ma ei a gutafipui aꞌa hamuꞌou ma na nunuminaa hefaa manumanu, lomi una fani awataa aꞌa hemea, uaa ei lofu, noramiaa roꞌou Macedonia, rona fanau tamanu una nunuminia. Lomi una fani awataa aꞌa hamuꞌou wagii hepalo manumanu ma bigilao ana aleꞌei. 10 A warefaꞌuai aꞌa fei mau Christ laloo iau ba lomi hemea yei malalaa Achaia ba i lawagipaꞌaa fei warefaꞌaguꞌaguau. 11 Tani aleꞌei? Siꞌei ba lomi una haguaa hamuꞌou? Mei Haidaa na aida ba una haguaa hamuꞌou! 12 Ma a bigiꞌualao ei fi bigiꞌaa eni ba uꞌa fawaiwainaa talaa ei ba roꞌaa fafiminaꞌei aꞌa haiꞌou wagii tamanu ei rona warefaꞌaguꞌagu wagina.
13 Uaa ei mau ramaꞌa aleꞌei, roꞌou apostle sifisifi, rona bigifasifi ma sifi ua ba roꞌou apostle Christ. 14 Woro ba na aleꞌei, uaa Satan ana na sifisifi ua ba hia hemea aloꞌaloo fei weꞌai. 15 Siꞌei, lomi una baꞌarofo ba ei paniaa panina, rona sifisifi ua ba roꞌou, nafii fei wanewanea. Aꞌa fei pedupeduu roꞌou, rowe to aree roꞌou aꞌa ei bigiꞌaa roꞌou.
Paul na Warefaꞌaguꞌagui wagii ei Fiꞌiana
16 A waredinia ba: hamoneiꞌaa nara ba yau poapoa. Maꞌuaa nabaa nemea na nara aleꞌei, te, hamonei taufagutanau aleꞌei hemea poapoa ba a warefaꞌaguꞌagu maꞌida. 17 Aꞌa fei warefaꞌaguꞌaguia fei, lomi una ware aleꞌei mei Fasu, maꞌuaa aleꞌei hemea poapoa. 18 Siꞌei ba watauda, rona warefaꞌaguꞌagu aleꞌei fei mau feni ano, yau ana a warefaꞌaguꞌagu. 19 Hamona niꞌeniꞌe aꞌa ei poapoa hamatee hamona paꞌi baua apaꞌaa hamuꞌou! 20 Ana hamona niꞌeniꞌe aꞌa hini na fahumuwainaa hamuꞌou o fafeloaa hamuꞌou, o na bigiꞌuaiaa nunumiana aꞌa hamuꞌou, o ba minaa hia, o laparaa hamuꞌou. 21 Ina famamafaiau, maꞌuaa paꞌaa faꞌua ba namina rataiaa haiꞌou fei.
Aleꞌei ba yau poapoa, una wareaa tamanu rona mamaꞌau hefiꞌa ba roꞌaa wareia. 22 Roꞌou Hebrew? Yau anaa. Roꞌou Israel? Yau anaa. Roꞌou upuu Abraham? Yau anaa. 23 Roꞌou paniaa panii Christ? Yau na muainaa roꞌou. Fei mau warewareau aleꞌei, na poapoai. Yau na bigifaweꞌidiai laraa ei bigiꞌaa roꞌou. Una boboꞌai wataudadiai, ei babu una tonia namina babaodiai ma ranimai anaa i paꞌau maꞌea. 24 Haipanipoa ei Jew, rona babuinau odufua paꞌania ma faimpalo babu. 25 Odupoa, hefiꞌa, rona hafugau aꞌa ei hafuhafu, hepoa, hefiꞌa, rona nafanaa yau mugoo, odupoa una tafe pafoo wa, una lafelafe tau lama heai poi ma heai arewaa, 26 Ranimai una tatalai ua. Anaa ba a maꞌe aꞌa ei ranu na poni batafa, ba roꞌaa panarofau ei hafeloꞌa, ba roꞌaa fafeloau ei gufuu mawe ei Gentile ma anaa a tonaa hafeloꞌau laloo ei baua gufu ma sugutataꞌaia ma yei lama ma aꞌa ei lofu sifisifi. 27 Una bigimaguhagu ma watauda poi, lomi una maꞌigupaꞌi; unaꞌaida bao ma sigigi; watauda arewaa, lomi hanau; unaꞌaida waiwa ma lomi lawalawau. 28 Ma pafoo minaa ei namina fiꞌi naranarau minaa ei arewaa, uaa minaa ei losuu. 29 Hini na maralele ma yau loꞌe? Hini na pasi aꞌa ei hafeloꞌa ma lomi na fiꞌi naranarau wagina?
30 Nabaa a warefaꞌaguꞌagui, a warefaꞌaguꞌagu aꞌa tamanu na famaꞌaiaa ei maraleleau. 31 Mei Haidaa, mei Amaa mei Fasu Jesus, mei ba onei uduginia ranimai ranimai, na aida ba una warefaꞌuai. 32 Yei Damascus, mei gavanaa, mei hia paniaa panii mei Hapara Aretas, na augaa ei omaꞌamaꞌaa laloo fei baua gufu Damascenes ba ronei panarofau. 33 Maꞌuaa hefiꞌa, rona faꞌasisiau laloo hepalo pa aꞌa fei gigei fei nono ma una ponipaꞌai aꞌa roꞌou.