Paul na Wareaa Pepei aꞌana Uaa fei Bigiꞌana
10
Wagii fei mau Christ aleꞌei madumuia ma warefagigia, uꞌei iꞌiginaa hamuꞌou—yau, Paul, mei rona ware ba una warefagigii i pudaa hamuꞌou, maꞌuaa ba una warefaweꞌi nabaa una raua! 2 Uꞌei iꞌiginaa hamuꞌou ba ena na nomai, lomi na nunumiai ba a warefaweꞌi aꞌa hefiꞌa, ei rona nenegiꞌuaiaa fei maumau feni ano. 3 Uaa, faꞌua ba ona guta yeni malagufu, maꞌuaa lomi ona foꞌa aleꞌei fei maumau foꞌaa feni ano. 4 Ei finefinee foꞌaa aꞌa oꞌou, abaa aleꞌei ei finefinee foꞌaa feni ano. Agia. Ei finefine aꞌa oꞌou na paꞌi fei faufau mei Haidaa ba i bigosipaꞌaa ei aleꞌei ei humuu foꞌaa roꞌou. 5 Ona muainaa ei fihareia ma minaa ei mau sifisifi, ei na lawaraa fei tala i dinaa aꞌa fei apaꞌaa mei Haidaa ma ona wagiꞌinaa minaa ei naranaraa oꞌou ba nei nenegiꞌuaiaa Christ. 6 Ma haiꞌouna ofafaufau ba haiꞌouꞌaa fanimaꞌaa minaa ei bigiꞌaa barafea, maꞌuaa famaꞌa, hamonei guainaa haiꞌou.7 Hamoꞌei fanunuꞌuaiaa ei na parepare. Nabaaa nemea na nara ba hia maroaa Christ nei naramaꞌadiai ba haiꞌou maroaa Christ ana aleꞌei hia. 8 Uaa lomi ba a mamafa nabaa una warefaꞌaguꞌagu aꞌa fei faufau na fanaa haiꞌou mei Fasu ba haiꞌounei farawaninaa hamuꞌou ma aꞌa ba haiꞌounei fapasiaa hamuꞌou. 9 Lomi na nunumiai ba ei neꞌiau aꞌa hamuꞌou, i famaꞌauaa hamuꞌou. 10 Uaa hefiꞌa, rona ware ba, “Ei neꞌiana na paꞌi awatana ma na warefaweꞌi, maꞌuaa nabaa hia yeni, abaa aleꞌei maumau ei baua ramaꞌa ma lomi hanuu ei wareana.” 11 Ei rona ware aleꞌei, ronei apaꞌia ba fei maumau haiꞌou laloo ei neꞌiaa haiꞌou, ana rowe nanamuinia ena haiꞌouna nomai yena i maꞌaa roꞌou.
12 Paꞌaa lomi ba haiꞌouna nara ba haiꞌou fihawawaginaa haiꞌou aꞌa hefiꞌadiai, ei rona ware ba rona rawani. Nabaa rona fipupuduinaa ana roꞌou ma fihawawaginaa ana roꞌou, rona famaꞌaia ba lomi apaꞌaa roꞌou. 13 Maꞌuaa lomi ba haiꞌouꞌamina warefaꞌaguꞌagu watauda. Haiꞌou warefaꞌaguꞌagu ua aꞌa ei na fanaa haiꞌou mei Haidaa. Ma hamuꞌou, aleꞌei hepalo fanana aꞌa haiꞌou. 14 Lomi na rata ei warefaꞌaguꞌaguaa haiꞌou, ana aleꞌei nabaa lomi hamona apaꞌaa haiꞌou, maꞌuaa haiꞌouna nobapaꞌaloo hamuꞌou aꞌa fei rawaniꞌa wareaa Christ. 15 Ana lomi ba haiꞌouna warefaꞌaguꞌagu aꞌa ei bigiꞌaa hefiꞌadiai.b Fei oꞌonaia unuu haiꞌou, sifei ba fei weꞌiaa naranaraa hamuꞌou nei gipelao ma fei bigiꞌaa haiꞌou i dupuaa hamuꞌou neimina larelao, 16 ba haiꞌounei uꞌugaa fei rawaniꞌa warea aꞌa ena gufu opaꞌawiaa hamuꞌou, uaa lomi ba haiꞌouꞌaa warefaꞌaguꞌagu aꞌa fei bigiꞌa yei fawelei na uꞌudii hemea. 17 Maꞌuaa “Mei ba i warefaꞌaguꞌagu nei warefaꞌaguꞌagu uaa mei Fasu.” 18 Uaa abaa mei i ware ba hia na rawani ba napaꞌaa rawani, maꞌuaa mei i wareia mei Fasu ba na rawani.