9
Lomi a neꞌifanidinaa hamuꞌou ba batanai fei bigihadumaa ei apunaia. 2 Uaa una aida ba hamona refurefu ba hamoꞌaa fani haduma ma una warewareꞌuaia aꞌa ei Macedonia ma warefanaa roꞌou ba aꞌa fei igisimasi i didii, hamuꞌou ena yena Achaia na fani ma ei refurefuaa hamuꞌou na faꞌasiꞌanaa watauda roꞌou ba ana roꞌaa fani. 3 Maꞌuaa a aloawii ei lofu ba ina paꞌi paꞌafina fei warefaꞌaguaa haiꞌou hamuꞌou ma ba hamonei bigiꞌaugaa fei fana, ana aleꞌei una waredii ba hamowe bigiꞌia. 4 Uaa nabaa hefiꞌa Macedonia, ro nofipuimai aꞌau ma bapaꞌaa hamuꞌou ba lomi hamonadii bigiꞌaugaa fei fanaa hamuꞌou aꞌa haiꞌou, haiꞌouwepaꞌaa mafa ba haiꞌouna oꞌugaa hamuꞌou ma ana hamowe mamafa. 5 Siꞌei, una nara ba unei fabatafainaa ei lofu ba roneiwii maꞌa hamuꞌou ma fawanewaneꞌaugaa fei baua fana, fei hamonadii faꞌunainia. Naꞌaa aleꞌei, iwe ude ua aleꞌei hepalo rawaniꞌa fana ma abaa aleꞌei fei mau faniꞌoaꞌoaia.Faro Watauda
6 Nonominaa feni: hini i faro maꞌida ua, ana i hufuꞌaa maꞌida ua. Ma mei i faro watauda, ana i hufuꞌaa watauda. 7 Hememea nei fani tamanu na nara ba i fani ma abaa faniꞌoaꞌoai o aleꞌei ba i nei fani, uaa mei Haidaa na nunuminaa ei rona faniwiwiwidi ua. 8 Ma mei Haidaa na hawia ba i fanaa fei rawaniꞌana i aꞌa hamuꞌou, ba aꞌa minaa ei manumanu ranimai, hamonei paꞌi minaa ei hamonapaꞌaa nunuminia ba hamoꞌaa bigipaꞌaa minaa ei rawaniꞌa bigiꞌa. 9 Ana aleꞌei fei neꞌia ba,
“Ina fatalaneneneinaa ei fanana aꞌa ei lomi rona paꞌi;
fei wanewaneana, i oalao ranimai.”
10 Mei i fani lau aꞌa mei faroa ma faraa pidaua ba duꞌua, ana i fani ma fapepesuaa ei palee hapee hamuꞌou lau ma fagipeaa fei hufuꞌaa hamuꞌou aꞌa tamanu na wanewane. 11 Hamowe paꞌi watauda ba hamoꞌaa pani arererei ua ranimai ma ei fanaa hamuꞌou aꞌa haiꞌou, iwe fawareaa ei ramaꞌa ba ‘ta’ aꞌa mei Haidaa.
12 Feni bigiꞌaa hamuꞌou abaa sifei ua ba i hadumaa ei apunaia aꞌa ei nunumiaa roꞌou, maꞌuaa ana na faꞌasiꞌanaa fei mau warea ‘ta’ aꞌa mei Haidaa. 13 Aꞌa fei bigiꞌaa hamuꞌou, fei ina famaꞌaia ba batanai maumau hamuꞌou, ei ramaꞌa, rowe uduginaa mei Haidaa wagii fei guaiaa warea, fei na nofininamii fei wareaa hamuꞌou ba faꞌua fei rawaniꞌa wareaa Christ ma wagii fei mau pani arereaa hamuꞌou aꞌa roꞌou ma aꞌa minaa ei ramaꞌa. 14 Ma laloo ei lafulafuaa roꞌou hamuꞌou, ei naranaraa roꞌou, i dinaa aꞌa hamuꞌou, uaa fei baua rawaniꞌa na fanaa hamuꞌou mei Haidaa. 15 Fei warea ‘ta’ i dinaa aꞌa mei Haidaa uaa fei fanana, fei lomi a warepaꞌia!