Panii Arerei
8
Ma ena lofuu, nunumiaa haiꞌou ba hamonei apaꞌaa fei rawaniꞌa, fei na fanaa ei losuu yei Macedonia mei Haidaa. 2 Namina hafelo gutanaa roꞌou, maꞌuaa ronamina wiwiwidi ua ma ana lomi manumanuu roꞌou, maꞌuaa ronamina panii arerei. 3 Uaa, a paꞌaa warefaꞌuai ba rona fani ua aleꞌei na hawiaa roꞌou ma eꞌei namina rataiaa roꞌou anaa ma ei fanaa roꞌou na muainaa tamanu rona paꞌi. 4 Ronamina iꞌigifaweꞌi aꞌa haiꞌou ba ana roꞌaa fani aꞌa ei apunaiaa mei Haidaa. 5 Ma lomi rona bigiꞌia aleꞌei haiꞌounadoꞌo nara ba roꞌaa bigiꞌia, maꞌuaa ronadoꞌo fanaa ana roꞌou aꞌa mei Fasu ma nene, aꞌa haiꞌou—aleꞌei ba ro neneraa ei nunumiaa mei Haidaa. 6 Siꞌei ba doꞌofamaꞌa Titus na faꞌasiꞌanaa fei mau fana aleꞌei, haiꞌouna iꞌigifaweꞌi aꞌana ba nei dinaa aꞌa hamuꞌou ma fapedugaa fei rawaniꞌa fana hamonadoꞌo faꞌasiꞌania. 7 Maꞌuaa ana aleꞌei ba hamona mua aꞌa minaa ei manumanu—aꞌa fei weꞌiaa naranara, aꞌa ei warewareaa hamuꞌou, aꞌa ei mau apaꞌa, aꞌa tamanu ei na faꞌuai ma aꞌa fei haguaa hamuꞌou haiꞌoua —ana hamonei mua aꞌa fei rawaniꞌa mau fana.8 Lomi una ware ba hamonei bigiꞌaa fei, maꞌuaa ba a mania ba na faꞌua fei haguaa hamuꞌou laraa hefiꞌadiai. 9 Uaa, hamona aida fei rawaniꞌaa mei Fasuu oꞌou Jesus Christ ba hia na paꞌi watauda manumanu, maꞌuaa na filoginia ma wagii fei ba hia pani ua, hamonei paꞌi manumanu.
10 Ma sifeni, feni aweiau hamuꞌou wagina: Fei igisimasi i didii, hamuꞌou, rawarawa aꞌa ei rona fani ma abaa uniaa fei ba hamonei fani, maꞌuaa ana paꞌaa naraa hamuꞌou ba hamoꞌaa fani. 11 Siꞌei, hamonei fapedugaa feni bigiꞌa ba fei refuaa hamuꞌou ba hamoꞌaa bigiꞌia nei fiboꞌii aꞌa fei fapedugaa hamuꞌou aleꞌei hawii hamuꞌou. 12 Uaa nabaa hamona paꞌi fei nunumia aleꞌei, te, ei fanaa hamuꞌou i rawani ua aleꞌei tamanu hemea na paꞌi ma abaa tamanu lomi ina paꞌi.
13 Fei nunumiaa haiꞌou, aꞌa ba hefiꞌadiai ronei guta ua ma ba hamuꞌounei paꞌi awataa, maꞌuaa ba hamonei fiminaꞌei. 14 Aꞌa feni au eꞌeni, ei watauda hamona paꞌi, iwe fawanewaneaa ei lomi rona paꞌi ba ei watauda rona paꞌi, ana iwe fawanewaneaa tamanu lomi hamona paꞌi. Ma wagii fei mau aleꞌei, hamowe fiminaꞌei, 15 ana aleꞌei fei neꞌia ba: “Mei na hufuꞌaa watauda, lomi i watauda dufuna ma mei na hufuꞌaa maꞌida, na hawiaa fei.”
Rona Alonaa Titus yei Corinth
16 Una ware ‘ta’ aꞌa mei Haidaa, uaa na fani naranaraa Titus ana fei naranara una paꞌi aꞌa hamuꞌou. 17 Uaa Titus na tofarawaninaa fei iꞌigaiaa haiꞌou ma ifi nowau aꞌa hamuꞌou fininaa refurefua ma ana paꞌaa nunumiana. 18 Ma haiꞌouꞌaa alofipuinawii aꞌana mei lofu, mei ronamina niꞌeniꞌe aꞌana minaa ei losuu, uaa fei bigiꞌana wagii fei rawaniꞌa warea. 19 Ma hepalodiai, rona rafeinia ei losuu ba inei talaiporofipui aꞌa haiꞌou fei fana, fei haiꞌouna alaginia ba i fani honua aꞌa mei Fasu ma famaꞌaia ba haiꞌouna refurefu aꞌa fei ba haiꞌou fani haduma. 20 Lomi haiꞌouna nunuminia ba nemea, i warewareaa fei mau alagiaa haiꞌou aꞌa feni baua fana. 21 Uaa haiꞌouna omaꞌafarawaninaa haiꞌou ba haiꞌounei bigiꞌaa ei na wanewane i pudaa mei Haidaa mawe i pudaa ei ramaꞌa.
22 Ma fipui aꞌa lagua, haiꞌouꞌaa aloawii hemea lofuu oꞌou, mei naꞌaida famaꞌaia ba hia wiaa ramaꞌa ma eꞌeni na refurefu apoidiai, uaa napaꞌaa bauanai fei oꞌugana aꞌa hamuꞌou. 23 Ma Titus, hia mei rarafiu ma na bigifipui aꞌau i dupuaa hamuꞌou. Ma ei lofuu haiꞌou, roꞌou, aleꞌei umuiaa ei losuu ma rona fani honua aꞌa Christ. 24 Siꞌei, hamonei famaꞌaiaa roꞌou fei mau hagua hamona paꞌi ma i paꞌaa paꞌi paꞌafii fei mamaguguaa haiꞌou aꞌa hamuꞌou ma ba ei losuu, ronei fanunuia.